Markos 13 - Dakota Wowapi Wakan Kin

¹ Unkan tipi wakan kin etanhan kinanpa hehan waonspewicakiye cin wanji heciya; Waonspekiya, inyan tankinyanyan kin dena, qa tipi kagapi kin dena wanyaka wo.

² Unkan Jesus waayupte c̣a heciya; Tipi tankinyanyan kin dena owasin wandaka he. Inyan wanji inyan itakihna wanke kte śni, owasin jujuwahe kta.

³ Unkan Oliwe Paha kin akan iyotanka, tipi wakan kin iyotakons, hehan Inyan qa Jakob qa Johannes qa Andrew naḣmana wiwangapi;

⁴ tohan hena hecetu kta he, qa dena owasin iyecetu kta e wowapetokeca tukte e hecinhan, unkokiyaka po.

⁵ Unkan Jesus waayupte c̣a hewicakiya; Iwanihdaka po, okinni tuwe nihnayanpi kta.

⁶ Wicota micaje on hipi qa; He miye ce, eyapi kta, qa wicaśta ota wicahnayanpi kta.

⁷ Unkan tohan wicokicize qa kicizapi kta oyakapi kin nayaḣonpi kinhan, nihinciyapi śni po: hena hecetu kta, tuka owihanke kin hinaḣinke śni.

⁸ Oyate wan oyate tokeca on najin kta, qa wokiconze wan wokiconze tokeca on; qa tuktekten maka śkanśkan yuke kta, qa wicaakiḣan qa wicokicize yuke kta. Dena wicoiyokiśice tokaheya kin ee.

⁹ Tuka iwanihdaka po; omniciye tanka kin en aniyanpi kta; qa omniciye tipi kin ohna nicaśtakapi kta; qa miye on wicaśta itancanpi wicaśtayatapi ko en aniipi kta, owicayakapi kta heon.

¹⁰ Tuka tokaheya wotanin waśte kin he oyate owasin owicakiyakapi kta.

¹¹ Tuka tohan aniyanpi qa wicanic̣upi kinhan, itokam taku ehapi kta awacinpi śni po, qa on cante śicapi śni po; tuka wihiyayedan oape kin he en taku nic̣upi kin he ohna eya po; eye kte cin he niyepi śni, tuka Woniya Wakan kin hee kta.

¹² Hunkawanjinkiciyapi wiconṭe en kicic̣upi kta, qa wicaśta wan iye cinca nakun; qa wicacinca inajinpi kta qa hunkakewicayapi kin ṭewicayapi kta.

¹³ Unkan miye on owasin śicenidapi kta; tuka tuwe owihanke kin hehanyan ope cinhan he ni kta.

¹⁴ Tuka tohan wośice woihangye, Daniel wicaśta wokcan cajeyate ciqon, tukten najin kta iyecece śni, hen wandakapi, kinhan, tuwe yawa kinhan okaḣnige kta, hehan tona Juda makoce kin en unpi kin ḣe kin ekta najicapi kta:

¹⁵ Qa tuwe tipi akan yanke cin he kun ku, qa timahen tanhan takudan ehdaku kte śni:

¹⁶ Qa nakun tuwe magata un kinhan, wokoyake ehdaku kta on hdicu kte śni.

¹⁷ Tuka anpetu kin hena en tona ihduśakapi qa hokśiyoqopa azinwicakiyapi kin hena teḣiya unpi kta.

¹⁸ Unkan waniyetu icunhan nayapapi kte śni e icekiya po.

¹⁹ Anpetu kin hena en wicokakije yuke kta, tokaheya Wakantanka taku kage cin ehantanhan, qa dehanyan takudan iyecece śni, qa nakun tokata ekta iyecece kte śni.

²⁰ Unkan Itancan kin anpetu kin hena yuptecedan śni kinhan, wicaceḣpi takudan ni kte śni; tuka wicakaḣnigapi tona wicakaḣnige cin hena on anpetu kin hena yuptecedan.

²¹ Unkan hehan tuwe; Iho, Messiya hen yanka ce, qa iś; Kan yanka ce, eniciyapi eśta, wicadapi śni po.

²² Messiya itonpiśni qa wicaśta wokcan itonpiśni kin heca icagapi kta, qa wowapetokeca taku wowinihan ko econpi kta, okihipica unkanś wicakaḣnigapi kin hena eepi kaeś wicahnayanpi kta tuka.

²³ Tuka iwanihdaka po; iho, itokam hena ociciyakapi.

²⁴ Tuka anpetu kin hena en, wicokakije kin iyohakam, anpetu wi kin aotpasyapi kta, qa hanyetu wi kin iyoyanpa kte śni;

²⁵ Qa maḣpiya wicanḣpi kin hinḣpaye kta, qa maḣpiya ekta wowaśake kin yuhuhuzapi kta.

²⁶ Unkan hehan Wicaśta Cinhintku kin wowaśake tanka wowitan ko hduha maḣpiya śapa akan u wandakapi kta.

²⁷ Unkan hehan ohnihdewicaye cin hena ye wicaśi kta, qa tate ouye topa kin etanhan, maka ihanke kin etanhan qa maḣpiya ihanke kin hehanyan, wicakahnige ciqon hena witaya wicakpahi kta.

²⁸ Suken can kin etanhan wiyacinpi kin de okaḣniga po: Can intpa kin hinaḣin wankadan, qa etanhan ape icage cinhan, hehan mdoketu wanna ikiyedan sdonyayapi ece.

²⁹ He iyececa, niś tohan dena owasin iyecetu wandakapi kinhan, wanna ikiyedan, tiyopa kin etu, e sdonya po.

³⁰ Awicakehan heciciyapi, wicoicage kin de tokan iyaye śni, ecen dena owasin econpi kta.

³¹ Maḣpiya maka ko tokan iyaye kta, tuka mioie kin hena tokan iyaye kte śni.

³² Tuka anpetu kin he, qa wihiyayedan oape kin he tuwedan sdonye śni, maḣpiya ohnihde kin heepi kaeś, qa nakun Cinhintkuyapi kin; tuka Ateyapi kin ecedan sdonya.

³³ Iwanihdaka po, wakta unpi qa cekiya po; tohan iyehantu kte cin sdonyayapi śni nakaeś.

³⁴ Wicaśta wan icimani ye kte cin, tipi eḣpeye c̣a taokiyewicaye cin taku econ wicaśi, otoiyohi wicoḣan wicaqu, qa tiawanyake cin he awanyake śi, he iyececa.

³⁵ Heon etanhan waktaya un po; tipi ohna itancan kin tohan hdi kta sdonyayapi śni, ḣtayetu, qa hanye cokaya, qa anpaohotonna hoton, qa iś hanḣanna kinhan.

³⁶ Okinni ihnuhanna hdi kinhan niśtinmapi iyeniyanpi kta.

³⁷ Unkan taku eciciyapi kin he owasin ewicawakiya ece, Waktaya un po.