Markos 12 - Dakota Wowapi Wakan Kin

¹ Hehan wiyacinpi on wowicakiyaka; Wicaśta wan hastanhanka iyuwi wojupi wan oju, qa ohomni natake c̣a, miniśa iyuśkice wan en qe c̣a, cowahe tehan wankantu wan kaga; qa kicanyanpi kte cin owicaqu, qa makoce wan tokeca ekta icimani iyaya.

² Qa wanna iyehantu qehan taokiye wan kicanyanpi kin ekta ye śi, kicanyanpi kin etanhan hastanhanka ojupi kin waskuyeca icu kte cin heon etanhan.

³ Unkan he yuzapi, qa apapi, qa cokadan hde śipi.

⁴ Unkan ake taokiye wanji tokeca ekta ye śi; tuka e qe inyan on kininpi, qa pa kaḣdecapi, qa teḣiya kuwapi hde śipi.

⁵ Unkan ake wanji tokeca ekta ye śi; qa he qe ktepi: unkan nakun wicota, hunḣ awicapapi qa hunḣ wicaktepi.

⁶ Hehan cinhintku wanjidan waśtekidake cin he hinaḣin hduha; unkan he ehake ekta ye śi, qa; Micinkśi yuonihanpi kta ce, eya.

⁷ Tuka kicanyanpi kin hekiciyapi; Tawa kte cin he dee; iho po, unktepi kta; hecen he unkitawapi kta ce.

⁸ Unkan hecen yuzapi qa ktepi, qa wojupi kin etanhan tankan eḣpeyapi.

⁹ Heon hastanhanka ojupi yuhe cin he taku econ kta he. En hi qa kicanyanpi kin hena ihangwicaye kta, qa hastanhanka ojupi kin wicaśta tokeca owicaqu kta.

¹⁰ Wowapi kin de dawapi śni he; Ticagapi inyan wan eḣpeyapi qon he oise en pa icaga ce.

¹¹ He Itancan kin econ, qa unkiśtapi kin en taku wowinihan.

¹² Hehan yuze wacinpi, tuka oyate kin kowicakipapi; wiyacinpi kin de iye wicaka e heya sdonyapi. Unkan eḣpeya kihdapi.

¹³ Hehan Pharisee qa Herodian etanhan wanjikji ekta ye wicaśipi; taku eye cin on yuzapi kta.

¹⁴ Unkan hena en hipi qehan heciyapi; Waonspekiye, iewicayaka qa tuwedan koyakipe śin sdonunyanpi; wicasta tancan ekta eyatonwe śni ece, tuka awicakehan Wakantanka tacanku kin odaka ece; Kesar wamnayanpi qupi kta iyececa he.

¹⁵ Unqupi kta, qa iś unqupi kte śni he. Tuka iye wohnaye hduhapi sdonye c̣a hewicakiya; Tokeca iyutanmayayapi he. Kaśpapidan wanji makau po, wanmdake kta ce.

¹⁶ Unkan kahipi. Hehan hewicakiya; Wicite qa wowapi kin de tuwe tawa he. Unkan, Kesar tawa ce, eciyapi.

¹⁷ Hehan Jesus waayupte c̣a; Kesar taku tawa kin kicu po; qa Wakantanka taku tawa kin kicu po, ewicakiya. Unkan heon inihanpi.

¹⁸ Hehan Saddukee kin, piya iwicacage kte cin wanica keyapi, hena etanhan en hipi; qa wiwangapi qa heyapi;

¹⁹ Waonspekiye, Moses wowapi unkicagapi, wicaśta wan tawicu eḣpeya ṭe c̣a, cinca nice cinhan, sunkaku winoḣinca kin he hduze kta, qa cincu qon cinca kicage kta ce.

²⁰ Hunkawanjinkiciyapi śakowin; unkan tokapa kin winoḣinca wan yuze c̣a, cinca codan ṭa.

²¹ Hehan iyokihe kin he hduze c̣a nakun ṭa, qa cinca nica; unkan iyamni kin iś nakun.

²² Unkan ecen śakowinpi kin hduzapi, qa cinca nicapi: ehake winoḣinca kin iś eya ṭa.

²³ Hecen piya iwicacage cin en inajinpi kinhan, wanji tukte tawicuyapi kta he: śakowin hduzapi tuka.

²⁴ Unkan Jesus waayupte c̣a hewicakiya; Wowapi wakan kin sdonyayapi śni, qa nakun Wakantanka towaśake kin, heon yanunipi.

²⁵ Wiconṭe etanhan piya wicoicage kinhan tawicu tonpi śni qa hihnaku yuhapi śni; tuka maḣpiya ekta ohnihde unpi kin iyececapi.

²⁶ Unkan tona ṭapi kin hena piya icagapi kta, on Moses tawowapi kin en dawapi śni he; can opamna etanhan Wakantanka okiye c̣a heya; Abraham Wakantanka tawa, qa Isaak Wakantanka tawa, qa Jakob Wakantanka tawa kin he miye ce.

²⁷ Wicaśta ṭapi kin Wakantanka tawapi śni, tuka ni unpi kin Wakantanka tawapi: heon etanhan śogya yanunipi.

²⁸ Hehan wowapi kagapi wanji en hi, qa akinicapi kin naḣon, qa tanyan awicayupta iyukcan heon etanhan, Woahope tokaheya kin tukte e he, eya iwanga.

²⁹ Unkan Jesus ayupta; Israel naḣon po, Jehowa Wakantanka unkitawapi kin he Itancan wanjidan, woahope owasin tokapa kin hee ce.

³⁰ Unkan Jehowa Wakantanka nitawa kin he nicante ocowasin on, qa ninagi ocowasin on, qa nitawacin ocowasin on, qa nitowaśake ocowasin on, waśteyakidake kta ce; woahope tokaheya kin hee.

³¹ Qa inonpa kin he he iyececa; Nikiyedan un kin he niye inihdacin waśteyadake kta. Woahope dena isanpa tanka wanica.

³² Unkan wowapi kage cin he heciya; Han, Waonspekiya, wowicake ecen eha, Taku wakan wanjidan, qa icunonpa tanhan wanica.

³³ Qa wicacante ocowasin on, qa wicotawacin ocowasin on, qa wicanagi ocowasin on, qa wicowaśake ocowasin on waśtedakapi, qa wicikiyedan unpi kin wiciye ihdacin waśtewicadapi kin, peta on wośnapi qa ikce wośnapi owasin, he isanpa tanka ece.

³⁴ Unkan he wacinksamya ayupta Jesus wanyaka, hehan heciya; Wakantanka tokiconze kin itehan yaun śni. Unkan hetanhan tuwedan sanpa wiwanga tawaṭenye śni.

³⁵ Hehan Jesus tipi wakan kin ohna wowicakiyaka icunhan waayupte c̣a heya; Wowapi kagapi kin Messiya he Dawid Cinhintku ce, tokeca heyapi he.

³⁶ Dawid iye qe Woniya Wakan on heya; Itancan kin Itancan mitawa heciya; Mietapa ekta iyotanka wo, tona tokaniyanpi kin hena siha oahe nitawa kin wakage kta hehanyan.

³⁷ Heon etanhan Dawid iye qe Itancan eciya; hecen token cincaya he. Unkan oyate ikceka kin wiyuśkinyan naḣonpi.

³⁸ Unkan wowicakiyaka icunhan hewicakiya; Wowapi kagapi kin kowicakipa po, hena wokoyake hanskaska kic̣un waśtedakapi, qa wopeton tipi kin ohna owicakiyapi kta nakun:

³⁹ Qa omniciye tipi kin en oiyotanke tokapapi, qa wotapi kin en oyanke waśteśte kin:

⁴⁰ Hena e wiwazica tipi kin temyapi, qa ihdutaninpi on wocekiye hanska eyapi ece: hena woyaco iyotan tanka yuhapi kta.

⁴¹ Unkan Jesus mazaska opiye kin iyotakons iyotanka, qa token oyate kin mazaska opiye kin en, mazaska eḣpeyapi kin he wanyaka. Unkan wicota wijicapi kin hena odota en eḣpeyapi.

⁴² Unkan wiwazica waḣpanica wan en hi, qa mazaśa onśpadan nom en eḣpeya, he mazaśa wanjidan yawapi.

⁴³ Unkan waonspewicakiye cin hena wicakico qa hewicakiya Dena owasin mazaska opiye kin en eḣpeyapi, tuka wiwazica waḣpanica kin de owasin isanpa en eḣpeya, awicakehan eciciyapi.

⁴⁴ Dena owasin taku ota tonpi kin eciyatanhan en eḣpeyapi ece; tuka iye qe nice cin etanhan taku yuhe cin ocowasin en ehpeya, on ni kte cin ocowasin.