Markos 10 - Dakota Wowapi Wakan Kin

¹ Hetanhan najin hiyaye c̣a, Jordan akasanpatanhan, Juda makoce kin en hi: unkan ake oyate kin en witaya kata iheya; qa econ ece qon he iyecen ake wowicakiyaka.

² Unkan Pharisee kin en hipi qa wiwangapi, Wicaśta tawicu eḣpeye kta iyececa hecinhan, he iyutanyanpi.

³ Unkan waayupte c̣a hewicakiya; Moses token econ niśipi he.

⁴ Unkan; Moses kpaganpi wowapi kage c̣a eḣpeye kta iyowinyan ce, eyapi:

⁵ Unkan Jesus waayupte c̣a hewicakiya; Cante niteḣipi kin heon Moses woope kin he nicagapi.

⁶ Tuka wicoicage otokaheya tanhan Wakantanka hena wica winyan ahna wicakaga:

⁷ Heon etanhan wicaśta wan atkuku hunku ko eḣpewicaye kta, qa tawicu en iyaihdaśke kta:

⁸ Qa henaoza wicaceḣpi wanjidan kta ce. Hecen hetanhan nonpapi śni, tuka wicaceḣpi wanjidan.

⁹ Heon taku Wakantanka yuokonwanjidan kin he ihnuhan tuwe yujuju kinhan.

¹⁰ Unkan ti mahen yukanpi, hehan waonspewicakiye cin he akta wiwangapi.

¹¹ Unkan hewicakiya; Tuwe winoḣinca eḣpekiye c̣a wanji tokeca yuze cinhan, he wawiciḣaḣapi ecakicon ece.

¹² Qa winoḣinca wan hihnaku eḣpeye c̣a wanji tokeca hihnaye cinhan, he nakun wawiciḣaḣapi econ ece.

¹³ Hehan hokśiyoqopa en awicahipi, wicayutan kta heon; tuka waonspewicakiye cin tona awicaupi kin iyowicakipiśni.

¹⁴ Tuka Jesus he wanyaka, hehan nina iyokiśice c̣a hewicakiya; Hokśiyoqopapi en maupi kta iyowinwicakiya po, qa teḣindapi śni po; tona dececapi kin Wakantanka tokiconze kin eepi ce.

¹⁵ Awicakehan heciciyapi; Tuwe Wakantanka tokiconze kin hokśiyoqopa iyecen icu śni kinhan he mahen ye kte śni.

¹⁶ Hehan poskin wicayuza, qa nape awicaputake c̣a wicayawaśte.

¹⁷ Unkan canku kin ohna iyaye c̣ehan, wanji inyang u, qa en canpeśka makehde inajin, qa wiwanga; Waonspekiye waśte, wiconi owihanke wanice cin he ohimic̣iye kta e on taku ecamon kta he.

¹⁸ Unkan Jesua heciya; Tokeca waśte emayakiya he; tuwedan waśte śni; Wakantanka iśnana.

¹⁹ Woahope kin sdonyaya; Wawiciḣaḣapi econ śni wo, Tinwicakte sni wo, Wamanon śni wo, Woitonśni oyake śni wo, Wawicaki śni wo, Niyate nihun kici wicahduonihan wo.

²⁰ Unkan waayupte c̣a heciya; Waonspekiye, dena owasin homakśiyopa ehantanhan ecamon ece.

²¹ Hehan Jesua atonwe c̣ehan waśtekidake c̣a heciya; Taku wanji ninica; hde c̣a taku duhe cin wiyopeya, qa waḣpanicapi kin wicaqu wo, kinhan maḣpiya ekta wowijice duhe kta; hehan ku, can susbeca kic̣in, qa mihakam u wo.

²² Unkan oie kin he on iyokiśica, qa cante śica hda; taku ota yuha nakaeś.

²³ Unkan Jesus ihdukśan etonwe c̣a waonspewicakiye cin hewicakiya; Tona watonpike cin hena Wakantanka tokiconze kin en yapi kte cin he teḣika ce.

²⁴ Unkan oie kin on waonspewicakiye cin yuśinyayapi. Tuka Jesus ake waayupte c̣a hewicakiya; Hokśiyoqopa, tona wowijice wacinyanpi kin hena Wakantanka tokiconze kin en yapi kte cin he teḣike ḣinca.

²⁵ Wicaśta wijica Wakantanka tokiconze kin en ye kta he teḣika, qa kamel wan tahinśpaciqadan oḣdoka ohna ye kte cin he aoptetu.

²⁶ Unkan heon nina yuśinyayapi qa hekiciyapi; Hehan tuwe ni kta he.

²⁷ Jesus awicatonwe c̣a heya; Wicasta ekta he okihipica śni, tuka Wakantanka ekta hecece śni; Wakantanka ekta taku owasin okihipica ece.

²⁸ Hehan Inyan heciya; Iho, unkiye taku owasin eḣpeunyanpi, qa nihakam unyakonpi.

²⁹ Jesua waayupte c̣a heya; Awicakehan heciciyapi, tuwe, miye qa wotanin waśte kin on, tipi qa hunkawanjitku, qa tawinoḣtin, qa atkuku, qa hunku, qa tawicu, qa cinc̣a, qa makoce eḣpeye cinhan;

³⁰ Nakaha wiconi kin de en opawinge akihde icu kta; tipi, qa hunkawanjitkupi, qa tawinoḣtin, qa hunkupi, qa cincapi, qa makoce ko, wośitkihdapi iyahna; qa wiconi u kte cin he en wiconi owihanke wanica yuhe kta.

³¹ Tuka wicota tokaheya kin hena ehake unpi kta, qa ehake unpi kin hena tokaheyapi kta.

³² Hehan canku ohna Jerusalem ekta yapi; unkan Jesus wicitokam ya; qa iyepi qeś ihakam upi, inihanpi qa kopehdapi. Unkan akeś akenonpapi kin iwicacu, qa taku akipe kte cin hena kohan owicakiyaka:

³³ Iho, Jerusalem ekta itanwankanhde unyanpi; qa Wicaśta Cinhintku kin wośnapi kagapi, wowapi kagapi ko napepi kin en wicaqupi kta; unkan hena ṭe yacopi kta, qa Ikcewicaśta kin iyoopta wicaqupi kta:

³⁴ He qe iḣaḣapi kta qa kapsinpsintapi kta, qa atagośapi kta, qa ktepi kta; unkan anpetu iciyamni kinhan ake kini kta.

³⁵ Hehan Jakob qa Johannes, Zebede cinhintkupi, en hipi qa heciyapi; Waonspekiye, taku uncinpi kin he ecen ecaunyeconpi kta uncinpi.

³⁶ Unkan, Taku e ecaciconpi kta yacinpi he, ewicakiya.

³⁷ Unkan heciyapi; Nitowitan kin en, wanji nietapa qa unma nicatka tanhan unkiyotankapi kta e unqu po.

³⁸ Tuka Jesus hewicakiya; Taku yadapi kin sdonyakiyapi śni. Wiyatke etanhan mdatke kte cin he niś yatkan oyakihipi he; qa baptem miye maqupi kte cin he on niś eya nic̣upi kta oyakihipi he.

³⁹ Unkan, Unkokihipi ce, eciyapi. Unkan Jesus hewicakiya; Awicakehan wiyatke etanhan mdatke cin niś etanhan datkanpi kta; qa baptem maqupi kin he iś nakun nic̣upi kta;

⁴⁰ Tuka mietapa qa micatka tanhan iyotankapi kin wicaqupi kte cin he miye mitawa śni; tuka tona wiyeya wicakicihnakapi kta.

⁴¹ Unkan wikcemna kin he naḣonpi qehan, Jakob qa Johannes nina canniyewicayapi.

⁴² Tuka Jesus wicakico qa hewicakiya; Oyate kin ekta tona itancan unpi kin wowidagwicayapi ece; qa tona tanka unpi kin hena oyate wicayuhapi ece.

⁴³ Tuka niyepi ekta hecece kte śni; tuka tuwe iyotan tanka yaunpi kta hecinhan, he ookiye duhapi kta:

⁴⁴ Qa tuwe tokaheya yaunpi kta hecinhan, he owasin wowidagyapi kta.

⁴⁵ Wicaśta Cinhintku kin hee kaeś waokiyapi kta hi śni, tuka waowicakiye kta, qa wicota opewicakitonpi kta on wiconi tawa eḣpeye kta on hi.

⁴⁶ Unkan Jeriko en hipi; qa Jeriko etanhan oyate ota qa waonspewicakiye cin om hdinanpa, hehan Bartimeus, Timeus cinhintku, iśtagonge ciqon he canku icahda wada iyotanka.

⁴⁷ Unkan he Jesus Nazareth etanhan hee naḣon qehan, hotanin qa heya; Jesus, Dawid Cinhintku, onśimakida wo.

⁴⁸ Unkan wicota iyokipiśni, inina un kta; tuka iye iyotan hotankakiya heya; Dawid Cinhintku, onśimakida wo.

⁴⁹ Unkan Jesus owanji najin qa kicopi kta, keya; hecen iśtagonge cin kicopi qa heciyapi; Cante waśte wo, najin wo, wanna nico ce.

⁵⁰ Unkan iye śina eḣpeya najin hiyaye c̣a Jesus en hi.

⁵¹ Unkan Jesus waayupte c̣a heciya; Taku ecacicon kta yacin he. Iśtagonge cin; Itancan, watonwe kta, eciya.

⁵² Unkan Jesus heciya; Hda wo, wacinyaye cin he asniniyan ce. Unkan hecehnana tonwe c̣a canku ohna Jesus ihakam ya.