Lukas 9 - Dakota Wowapi Wakan Kin

¹ Unkan waonspewicakiya akenonpapi kin hena wicakico, qa wowasake wookihi ko, wakanśica owasin on, qa wowayazan asniyanpi kta hecen wicaqu.

² Qa Wakantanka tokiconze kin oyakapi kta, qa wayazankapi kin asniwicayapi kta ye wicaśi.

³ Qa hewicakiya; Icimayanipi kte cin on cansagye, qa wojuhadan, qa waneya, qa mazaska takudan eyakupi śni po; qa nakun onḣdoḣda nomnom yuhapi śni po.

⁴ Qa tukte tipi wan en yaipi kinhan, hen ece yukan po, qa hetanhan iyoopta ya po.

⁵ Qa tuwe kaśta iyowinniciyapi sni kinhan, otonwe kin he inayapapi kinhan, nisihapi watuśekśeca onistakapi kin hee kaeś katata po, he owicayake kta ce.

⁶ Unkan iyayapi, qa otonwe iyaza yapi, qa wootanin waśte oyakapi, qa owancaya waasniyanpi.

⁷ Unkan taku econ kin owasin, Herod wicaśtayatapi kin naḣon; qa hehan token cante yuza nun tanin śni; apa Johannes wiconṭe kin etanhan kini keyapi kin heon etanhan:

⁸ Qa apa iś, Elias hi ce, eyapi; qa apa tokeca iś, Wannakaja waayatapi qon hena etanhan wanji kini ce, eyapi.

⁹ Unkan Herod heya, Johannes pa bawaksa ce: tuka de tuwe e on taku decekceca nawaḣon he. Unkan wanyake kta cin.

¹⁰ Unkan wahośiyapi kin hena wanna hdipi qehan, taku token econpi kin owasin okiyakapi. Unkan ewicahdaku qa naḣmanna icunonpa makotahedan wan ekta i, he otonwe wan Bethsaida eciyapi kin ahankeya.

¹¹ Unkan oyate kin sdonyapi qehan, ihakam eyaya: unkan iyowinwicakiye c̣a, Wakantanka tokiconze kin he iwowicakiyake c̣a, tona asniyanpi cinpi kin hena asniwicaya.

¹² Unkan wanna ḣtayetu aye c̣ehan, akenonpapi kin upi, qa heciyapi, Wicota kin tokan yewicaśi wo; hecen otonwe qa ihdukśan makoce wanke cin hena ektakta yapi, qa taku yutapi oic̣idepi, qa iwankapi kta ce; den makotahedan unyakonpi heon etanhan.

¹³ Tuka hewicakiya; Niye wo wicaqu po. Unkan heyapi; Aguyapi zaptan qa hogan nonpa henana unhapi; oyate denakeca woyute opewicakiciton unyanpi śni kinhan.

¹⁴ Wicaśta kektopawinge zaptan ecetupi. Unkan waonspewieakiye cin hewicakiya; Wikcemna zaptanptan ptaptaya iyotang wicakiya po, eya.

¹⁵ Unkan ecen econpi, qa owasin iyotang wicakiyapi.

¹⁶ Hehan aguyapi zaptan qa hogan nonpa qon hena icu; qa maḣpiya ekta etonwan, qa yawaśte, qa yuśpaśpa, qa waonspewicakiye cin wicaqu; qa iye oyate kin wicitokam ewicakicihnakapi kta.

¹⁷ Unkan wotapi qa owasin wipipi; unkan onśpaśpa iwicakiciyaye cin hena pahipi, makanopiye akenonpa.

¹⁸ Unkan iśnana wocekiye eya un qehan, waonśpewicakiye cin hena kici unpi: unkan wiwicawange c̣a heya; Miye matuwe oyate kin keyapi he.

¹⁹ Unkan waayuptapi qa, Johannes baptem wicaqu qon; qa apa iś, Elias; qa apa tokeca iś; Wanakaja waayatapi qon hena etanhan wanji kini ce, eyapi ce, eyapi.

²⁰ Unkan hewicakiya; Tuka niye matuwe kehapi he. Unkan Inyan waayupte c̣a heya; Wakantanka etanhan Messiya kin.

²¹ Unkan nina owicakiye, c̣a wicaśta kin tuwedan okiyake śni wicaśi;

²² Qa heya; Wicaśta Cinhintku kin taku otakiya on ito iyotanhan iyekiye kta, qa wicaśta tokapapi, qa wawayuśnapi itancanpi, qa wowapi kagapi kin hena ḣeyata iyeyapi, qa ṭeyapi kta ce: unkan anpetu iyamni kinhan kini kta ce, eya.

²³ Unkan owasin hewicakiya; Tuwe miyahna u wacin kinhan, waipiic̣ida, qa anpetu otoiyohi cansusbeca kin kic̣in, qa miyahna u kta.

²⁴ Tuwe kaśta wiconi kin hduhe wacin kinhan, togeḣpekiye kta ce; tuka tawe kaśta miye on wiconi kin togeḣpekiye cinhan, hee hduhe kta ce.

²⁵ Wicaśta togeḣpeic̣iya, qa iś tokan eḣpeyapi hecinhan, maka kin ocowasin ohiic̣iya eśta, taku ecin on tanyan un kta he.

²⁶ Tuwe miye qa mioie kin on iśtece cinhan, hee on Wicaśta Cinhintku kin iśtece kta, tohan iye towitan, qa Atkuku tawa qa taohnihde wakan tawapi kin hduha u kinhan.

²⁷ Tuka awicakehan heciciyapi; Den najinpi kin apa Wakantanka tokiconze kin tohanyan wanyakapi śni kin hehanyan ṭapi kte śni.

²⁸ Unkan wicoie kin dena iyohakam anpetu śahdogan ecetu, hehan Inyan, qa Johannes, qa Jakob, hena ewicayaku, qa cekiye kta paha wan ekta i.

²⁹ Unkan cekiya icunhan ite kin tokeca hinhda, qa tawokoyake kin ska qa wiyatpatpa.

³⁰ Unkan iho, wicaśta nonpa kici wohdakapi, Moses qa Elias hena eepi.

³¹ Hena wokitaninyan hinajinpi, qa iye iyaye kte cin, Jerusalem ekta hduśtan kte cin he iwohdakapi.

³² Tuka Inyan qa om un kin hena nina iśtinmapi; unkan kiktapi qehan wookitanin tawa kin he wanyakapi, qa nakun wicaśta nonpa kici najinpi kin hena.

³³ Unkan hena eḣpeya kihdapi icunhan, Inyan Jesus heciya; tancan, den unkanpi kte cin he waśte; ito wakeya yamni unkagapi kta, wanji niye, qa wanji Moses, qa wanji Elias, hecen unnicicagapi kta; taku eye cin he sdonkiye śni.

³⁴ Hena hecen eya icunhan, maḣpiya śoka wan u, qa aohanziwicaya. Unkan maḣpiya śoka kin en hiyayapi hehan nina wikopapi.

³⁵ Unkan maḣpiya qon etanhan wicaho wan hinape, c̣a heya; Micinkśi waste wakidake cin he dee ce: he anagoptan po.

³⁶ Unkan wicaho qon yaśtan qehan, Jesus iśnana en najin. Unkan iye inina unpi, qa taku wanyakapi qon anpetu kin hena en wicaśta kin tuwedan okiyakapi śni.

³⁷ Unkan ianpetu qehan, paha qon eciyatanhan wanna en hdipi qehan, oyate ota itkokipapi.

³⁸ Unkan iho, wicota kin etanhan wicaśta wanji hoyekiye c̣a heya; Waonspekiye cin, ceciciya ce, micinkśi kin atonwan wo; micinca hecedan:

³⁹ Unkan iho, woniya wan yuza ec̣a, ihnuhana śicahowaya ece; qa yuḣdeḣdec̣a, qa hecen minitaga apaśdiya, qa onśiya kuwa, qa kitan se ayuśtan ece.

⁴⁰ Unkan waonspewicayakiye cin cewicawakiye, c̣a napeye wicawaśi; tuka okitpanipi, eya.

⁴¹ Unkan Jesus waayupte c̣a heya; Wicoicage wicada śni qa tawacin teḣika, tohanyan cicipi waun kta, qa iyowinciciyapi kta he: nicinkśi kin den au wo.

⁴² Unkan u kin hepiya, wakanśice cin makata eḣpeye, c̣a yuḣdeḣdec̣a. Unkan Jesus woniya śape cin kiśice c̣a, hokśidan kin asniye c̣a, atkuku kin kicu.

⁴³ Unkan Wakantanka towaśake ḣince cin on owasin inihanpi. Tuka Jesus taku token econ kin on owasin inihanpi icunhan, waonspewicakiye cin hewicakiya;

⁴⁴ Wicoie kin dena ninogepi kin en iyoḣpayapi kte; Wicaśta Cinhintku kin wicaśta napepi kin en wicaqupi kta.

⁴⁵ Tuka iapi kin he okaḣnigapi śni, qa anawicakiḣmanpi, hecen iyukcanpi śni: unkan wicoie kin on iwangapi kte cin itonpapi.

⁴⁶ Unkan hehan wanji tukte iyotan tankapi kte cin he hdokinicapi.

⁴⁷ Unkan cante ekta hdokinicapi kin he Jesus wanyake c̣ehan, hokśiyoqopa wan icu qa iye iyokihe ehde;

⁴⁸ Qa hewicakiya; Tuwe kaśta hokśiyopa kin de micaje on eyaku kinhan, he miye e emayaku; qa tuwe kaśta miye emayaku kinhan, he umaśi kin hee eyaku ece; hecen niyepi owaśin wanji tukte nicistinpidan kinhan, hee tanka kta ce, eya.

⁴⁹ Unkan Johannes waayupte c̣a heya; Itancan, tuwe nicaje on taku wakan śica napewicaya wanunyokapi, qa den ounpapi śni kin on etanhan teunḣindapi.

⁵⁰ Unkan Jesus heciya; Teḣindapi sni po: tuwe unkipajinpi śni kin he unkicicapi ece.

⁵¹ Unkan anpetu en wankan eyakupi kte cin wanna kiyedan aya, hehan Jerusalem ekta ye kta e ite kin hdusuta;

⁵² Qa wahośiyapi kin heca tokata ye wicaśi. Unkan iyayapi, qa taku wiyeya kicihnakapi kta e Samariya wicaśta tonwanyanpi kin wanji en ipi.

⁵³ Unkan Jerusalem ekta ye kta sece cin on etanhan iyowinkiyapi śni.

⁵⁴ Unkan waonspewicakiye cin, Jakob qa Johannes he wanynkapi qehan, heyapi; Itancan, Elias econ qon he iyecen unkiye, maḣpiya eciyatanhan peta kun u, qa ḣuḣnaḣwicaye unśipi kta yacin he.

⁵⁵ Tuka ihduhomni qa wicakiśice, c̣a heya; Tawacin toniketupi kin sdonyakiyapi śni ce.

⁵⁶ Wicaśta Cinhintku kin wicaśta ṭewicaye kta on hi śni, tuka niwicaye kta heon hi ce, eya. Unkan otonwe wan tokeca ekta iyayapi.

⁵⁷ Unkan canku ohna yapi icunhan, tuwe heciya; Itancan kin, tokiya kaśta de cinhan ciyahna mde kta ce, eya.

⁵⁸ Unkan Jesus heciya; Śungidan kin waśun tonpi, qa maḣpiya okinyanpi kin hoḣpi yuhapi, tuka Wicaśta Cinhintku kin iye pa kin tukten iwanke kte cin ee kaeś hduhe śni ce.

⁵⁹ Unkan wanji tokeca heciya; Miyahna u wo. Tuka heya; Itancan, tokaheya ate weḣe mde kte cin he iyowinmakiya ye.

⁶⁰ Jesus heciya; Tona ṭapi kin ta wicayuhapi kin hena ito wicakiḣapi kta; tuka niye qe ye c̣a Wakantanka tokiconze kin he oyaka wo.

⁶¹ Unkan wanji tokeca nakun heya; Itancan, ciyahna waun kta; tuka ito tokaheya wahde, c̣a wati kin ohna un kin tanyan wehnake kte cin he iyowinmakiya wo.

⁶² Unkan Jesus heciya; Wicaśta kin tuwe maḣiyumdu wanna yuze, c̣a hehan hinakaha hakikta kinhan, he Wakantanka tokiconze kin en ope kta iyecece śni ce.