Lukas 8 - Dakota Wowapi Wakan Kin

¹ Unkan he iyohakam, otonwe tankinkinyan otonwe cikciqadan ko, owasin iyaza un, qa wootanin waśte Wakantanka tokiconze ahna yaotanin. Unkan akenonpapi kin kici unpi:

² Qa winoḣinca wanjikji taku wakan śica yuhapi qa wayazankapi, tuka asniwicayapi, Mary he Magdalene eciyapi, he etanhan wakan śica śakowin hinanpapi qon hee;

³ Qa Joanna, Cuza Herod waawanyagkiye ciqon he tawicu, qa Susanna, qa nakun toktokeca ota, hena woyuha yuhapi kin on okiyapi ece.

⁴ Unkan wicota mniciyapi, qa otonwe otoiyohi etanhan en ahi qehan, wiyacinpi on wowicakiyaka:

⁵ Woju heca wan taku su kin oju iyaya. Woju, unkan apa canku icahda hinḣpaya; unkan naaṭinzapi, qa maḣpiya okinyanpi kin temyapi,

⁶ Unkan apa imnija wan ahinḣpaya; unkan uye c̣ehan, spaye śni on wancake śnija.

⁷ Unkan apa wapepeka ehnahna hinḣpaya; unkan wapepeka opeya uye, c̣a aoṭinsya.

⁸ Unkan apa is maka waśte ahinḣpaya; unkan uye, c̣a opawingege suton, eya. Unkan hena hecekcen eye c̣ehan, heya niyan; Tuwe noge winaḣon yukan hecinhan, ito naḣon kta ce, eya.

⁹ Unkan waonspewicakiye cin wiwangapi, qa heciyapi; Wiyacinpi kin de toketu he.

¹⁰ Unkan heya; Niyepi Wakantanka tokiconze woanaḣbe kin hena oyakaḣnigapi kta nic̣upi; tuka tokan kin iś wiyacinpi ece: hecen etonwanpi keś wanyakapi kte śni, qa wanaḣonpi keś okaḣnigapi kte śni ce.

¹¹ Wiyacinpi kin he dee: Su kin he Wakantanka oie kin ee.

¹² Canku icahda qon he tona naḣonpi kin heepi; hehan wakan śice cin en hi, qa wicoie kin cantepi kin etanhan eyaku ece, awacinpi qa niwicayapi kte śni heon.

¹³ Tona wicoie naḣonpi eca iyuśkinyan icupi ece kin hena imnija akan un qon hena ee; hena hutkan nicapi, qa cistiyedan wicadapi, tuka taku iyutanwicayapi hehan ayuśtanpi ece.

¹⁴ Qa tona wanna naḣonpi, qa hehan tokiya yapi, qa wiconi kin de woawacin kin, qa wowijice, qa wowiyuśkin kin, hena on aoṭinzapi, qa hecen tanyan sutonpi śni kin hena wapepeka ehna hinḣpaye ciqon eepi ce.

¹⁵ Tuka tona wanna wicoie naḣonpi ec̣a, cante waśte qa owotanna mahen yuha unpi, qa wacintankaya sutonpi kin hena maka waśte akan un qon hena eepi ce, eya.

¹⁶ Wicaśta kin tuwedan petijanjan wan ideye, c̣a wakśica wan iyahdapśinyan eḣpeye śni, qa nakun owinja wan oḣdateya ehnake śni ece; tuka petijanjan ihupa akan ehde ece: hecen tona en ipi kinhan, ijanjan kin wanyakapi kta.

¹⁷ Taku anaḣmanpi qa yuotaninpi kte śni wanic̣a; qa nakun taku yutaninśniyan hnakapi qa yutaninyan eyakupi kte śni wanica ce.

¹⁸ Heon token nayaḣonpi hecinhan itonpa po; tuwe wayuhe cin he nakun qupi kta; qa tuwe wayuhe śni kin he taku yuha kecin kin hee ikicicupi kta ce, eya.

¹⁹ Hehan hunku qa hunkawanjitku kin hena en hipi, qa wicota kin on ikiyedan upi kta okihipi śni.

²⁰ Unkan okiyakapi qa heyapi; Nihun qa nihunkawanji tankan najinpi, qa wannihdake kta cinpi ce.

²¹ Unkan waayupte, c̣a hewicakiya; Wakantanka oie naḣonpi, qa ecen econpi kin dena ina qa mihunkawanji eepi ce, eya.

²² Unkan anpetu kin hena wanji en, waonspewicakiye cin om wata wan en opa; qa heiyicakiya; Mde kin akasanpa unyanpi kta ce. Hecen canan eyaya.

²³ Tuka śina watopekiyapi icunhan iye iśtinma: unkan tate iyumni wan mde kin en u; qa mini ojudan yakonpi, hecen ṭapi kta kokipapi.

²⁴ Hehan en hipi qa yuḣicapi qa heyapi; Itancan, Itancan, untakunipi śni. Unkan najin hiyaye c̣a, tate qa mini taja ko kiśica: hecen ayuśtan, qa amdakedan tanka.

²⁵ Unkan hewicakiya; Wacinyayapi kin tukte e he. Unkan iś wikopapi, inihanpi qa hekiciyapi; De taku wicaśta he; tate mini kici ee kaeś okiya eca, anagoptan ece.

²⁶ Unkan Galile itakasanpa Gadarene tamakocepi kin en ipi.

²⁷ Unkan ḣen ihe c̣ehan, wicaśta wannakaja tanhan wakanśica yuhe, c̣a wokoyake koyake śni, qa tuktedan tipi oti śni, tuka wicaśta hnakapi kin en ece un kin, heca wan otonwe kin eciyatanhan itkokipa.

²⁸ He Jesus wanyake c̣ehan, hoyeye c̣a itokam makata eḣpeic̣iye c̣a hotankakiya heya; Jesus Wakantanka Iyotan Wankantu Cinhintku kin, token unyakon kta he. Ceciciya ce, Kakiśmaye śni wo.

²⁹ Taku wakan śape cin wicaśta kin etanhan hinanpe śi heon etanhan. He ijehan yuza ece; unkan mazaicicaḣiḣa wicaśke ko on kaska hnakapi; tuka wicaśke kin yupsapsake c̣a, wakanśice makotahedan ekta iyayeya ece.

³⁰ Unkan Jesus wiwange c̣a heya; Token eniciyapi he. Unkan, Wicota, eya: taku wakan śica ota tan mahen ipi kin heon etanhan.

³¹ Unkan ośbe kin ekta ye wicaśi kte śni, keya icekiyapi.

³² Unkan ḣe kin en kukuśe ota optaye wan won unpi; hecen en iwicayayapi kte cin he iyowinwicakiye kta keya cekiyapi; unkan iyowinwicakiya.

³³ Hecen wakanśice cin wicaśta kin etanhan tankan hinapapi, qa kukuśe kin en iwicayayapi; unkan optaye maya ḣinca wan en apamahde nina ḣin naśdog iyayapi, qa mde kin en iyoḣpeic̣iyapi, qa minin ṭapi.

³⁴ Unkan taku econpi kin he kukuśe wo wicaqupi qon wanyakapi qehan, nakipapi, qa otonwe qa makoce kin ekta ohdag kipi.

³⁵ Unkan taku econpi qon he wanyag ai, qa Jesus ekta ahi, qa wicaśta wakanśica etanhan hinapapi qon he ogeton, qa tawacin ekicetu, qa Jesus siha kin en iyotankahan yanka wanyakapi; unkan wikopapi.

³⁶ Tona wanyakapi qon iś eya wicasta wakan śica yuhe ciqon token asniyanpi kin he owicakiyakapi.

³⁷ Hehan ihdukśan Gadarene tamakocepi kin owancaya taku econpi qon he naḣonpi qehan, owasin nina wikopapi on etanhan cekiyapi, qa tokan yesipi. Unkan wata kin en okipe, c̣a icicawin kihda.

³⁸ Unkan wicaśta etanhan wakan śice cin hinanpapi qon he kici un kta keya cekiya. Tuka Jesus hde śi, qa heya;

³⁹ Niye yati kin ekta hde, c̣a Wakantanka taku ḣinca ecanic̣on kin he yaotanin wo, eya. Unkan kihde, c̣a Jesus taku ḣinca ecakicon qon he otonwe owancaya ohdaka.

⁴⁰ Unkan Jesus hdi qehan, oyate kin iyowinkiyapi; owasin ape hiyeya nakaeś.

⁴¹ Unkan iho, wicaśta wan Jairus eciyapi kin he en u, omniciye tipi itancan kin wanji hee; unkan he Jesus siha kin en makata eḣpeic̣iye c̣a, iye ti kin ekta u kta icekiya.

⁴² He cunwintku wanjidan, wanna waniyetu akenonpa ecetu; unkan iś wanna ṭe kte wanka. Tuka ekta ye cin hepiya oyate kin aohduteyapi.

⁴³ Unkan winoḣinca wan waniyetu akenonpa hehanyan we au, qa taku yuha owasin pejihutawicaśta on wanna hdusota; tuka hecen tuwedan asniye kta okihi śni;

⁴⁴ Hee tapetepa tanhan u, qa tawokoyake opapun kin yutan: unkan hecehnana we au qon he anapta.

⁴⁵ Unkan Jesus heya; Tuwe mayutan he. Unkan owasin anakiḣmanpi qehan, Inyan qa tona kici unpi qon hena heyapi; Waonspekiye cin, wicota Kin aohduteniyanpi, qa aoṭinsniyanpi; heca eśta, Tuwe mayutan he, eha ce.

⁴⁶ Unkan Jesus heya; Tuwe mayutan; wowaśake ematanhan hiyu kin he sdonwakiya ce.

⁴⁷ Unkan winoḣinca qon wanna inaḣbe śni e wanhdake c̣ehan, cancanyan u, qa itokam makata eḣpeic̣iye, c̣a oyate kin owasin wicitokam, taku on yutan, qa token wancake asniyanpi kin he okiyaka.

⁴⁸ Unkan heciya; Cunś, cante waśte wo; wacinyaye cin he asniniyan ce: wookiye on hda wo.

⁴⁹ Unkan Jesus iahan icunhan, omniciye tipi idaka ti kin eciyatanhan tuwe u, qa heciya; Waonspekiye cin nagiyeye śni wo; nicunkśi wanna ṭa ce, eya.

⁵⁰ Tuka Jesus he naḣon qehan, waayupte c̣a heciya; Wikope śni wo; awicakehan wicada wo, kinhan niyanpi kta ce.

⁵¹ Unkan tipi kin en tin hiyu qehan, tuwedan tin ye kta iyowinkiye śni; Inyan, qa Jakob, qa Johannes, qa wikośka atkuku hunku kici henana en ipi.

⁵² Unkan owasin aceyapi qa waśinhda enapeyapi ece. Tuka heya; Ceyapi śni po; ṭe śni, tuka iśtinma ce.

⁵³ Unkan wanna ṭa sdonyapi kin heon wowiḣayapi.

⁵⁴ Unkan owasin tankan iyayewicaye, c̣a napata yuze, c̣a kipan qa heya; Wikośka najin wo, eya.

⁵⁵ Unkan nagi kin kiyoḣpaya, qa hecehnana najin hiyaya: hehan wo qu wicasi.

⁵⁶ Unkan hunkakeku kin inihanpi: tuka taku econ kin he tuwedan okiyake śni wicaśi.