Lukas 7 - Dakota Wowapi Wakan Kin

¹ Unkan oyate naḣon hiyeye cin en iapi kin dena owasin wanna ecen yaśtan qehan, Kapernaum en i.

² Unkan akicita opawinge wicayuhe cin wanji taokiye wan teḣinda kin he wayazanke c̣a wanna ṭe kta.

³ Unkan he wanna Jesus on naḣon qehan, Juda hunkayapi kin hena ekta ye wicaśi, u kta qa taokiye kin asniye kte cin he icekiya.

⁴ Unkan hena Jesus ekta hipi qehan, awicakehan cekiyapi, qa, Hecakiconpi kte cin wicaśta kin he iyececa ce;

⁵ Unkoyatepi kin cantewicakiye c̣a, omniciye tipi wanji wanna unkicagapi ce, eyapi.

⁶ Unkan Jesus hena om hda. Unkan wanna tipi kin itehan śni qehan, akicita opawinge wicayuhe ciqon he iś kodawicaye cin hena ekta yewicaśi, qa heciya; Itancan kin, nagiyeiciye śni wo, wati kin en tin yahidu kte cin iyemacece śni ce:

⁷ Heon etanhan miye ekta ciu kta nakun iyececa mic̣ida śni: tuka oie kin ecen eya wo, kinhan mitaokiye kin asni kta.

⁸ Miś eya wicaśta wicookihi ihukuya hnakapi kin hemaca, qa mihukuya akicita wicamduha; qa wicaśta kin de, Ya wo, ewakiya eca, ya ece; qa wanji tokeca, U wo, ewakiya eca, u ece; qa mitaokiye kin, Decon wo, ewakiya eca, ecen econ ece, eya.

⁹ Unkan Jesus hena naḣon qehan, on yuśinyaye c̣a, ihduhomni, qa oyate ihakam unpi kin hewicakiya; Israel hee kaeś en wowacinye hinsko tanka kin iyewaye śni, eciciyapi ce.

¹⁰ Unkan ye wicaśipi qon icicawin tiyata kipi qehan, ookiye wayazanke cin he wanna asni iyeyapi.

¹¹ Unkan ianpetu qehan otonwe wan Nain eciyapi kin en i; unkan waonspewicakiye cin etanhan ota qa oyate ota hena kici yapi.

¹² Unkan otonwe tiyopa kin he ikiyedan wanna ehan i qehan, inyun, wicaśta wan ṭa tankan aupi; hunku kin wiwazica heca, qa cinhintku hecedan. Unkan otonwe kin etanhan wicota opapi.

¹³ Unkan he Itancan kin wanyake c̣ehan, onśida qa heciya; Ceye śni wo.

¹⁴ Unkan canakiyuhapi kin en u, qa yutan. Unkan akiyuhapi qon is owanji najinpi. Unkan heya; Kośka, bosdan yanka wo, eciciya ce, eya.

¹⁵ Unkan ṭe ciqon iyotanke, c̣a ia. Unkan hunku kin kicu.

¹⁶ Unkan owasin nina wikopapi, qa Wakantanka yatanpi qa heyapi; Waayate wanji tanka unkiyopeyapi icaga ce, qa Wakantanka taoyate kin wanna wicahiyohi ce, eyapi.

¹⁷ Unkan Juda makoce qa okśan makoce wanke cin owancaya he yaotaninpi.

¹⁸ Unkan Johannes waonspewicakiye cin dena taku kin owasin okiyakapi.

¹⁹ Hehan Johannes waonspewicakiye cin nom wicakico, qa Jesus ekta ye wicaśi, qa heya; Tuwe u kte ciqon he niye, qa iś wanji tokeca unkapepi kta he.

²⁰ Unkan wicaśta kin hena wanna ekta hipi qehan, heyapi; Johannes baptem wicaqu ece qon he niye ekta unkuśipi, qa, Tuwe u kte ciqon he niye he, qa iś tuwe tokeca unkapepi kta he, eya ce.

²¹ Unkan hehantudan ḣinca wayazankapi, qa makośica ececapi, qa woniya śikśtca ececapi, hena wicota asniwicaya; qa iśtagongapi kin heca ota tonwewicaya.

²² Henan Jesus waayupte c̣a hewicakiya; Hda po, qa taku wandakapi qa nayaḣonpi kin hena Johannes okiyaka po: Iśtagongapi kin hena tonwanpi, qa huśtepi kin iś manipi, qa lepros ececapi kin iś wicayuskapi, qa nogetpapi kin is wanaḣonpi, qa ṭapi kin iś kiniwicakiyapi, qa waḣpanicapi kin iś wootanin waśte kin he owicakiyakapi.

²³ Qa tuwe miye on śinhda śni kin he yawaśtepi ce.

²⁴ Unkan Johannes wahośiyapi tawa kin wanna kihdapi, hehan Johannes on oyate kin hewicakiya; Taku e makotahedan ekta wanyag yaipi he. Cedi hu wan tate kahuhuze cin heca he.

²⁵ Tuka taku e wanyag yaipi he. Wicaśta wan wokoyake panpanna koyake cin heca he. Iho, tona waśteya wakoyakapi, qa tanyan nipi kin hena wicaśtayatapi tipi ain en unpi ece.

²⁶ Tuka taku e wanyag yaipi he. Wicaśta wokcan he. Han, eciciyapi, qa wanji wicaśta wokcan isanpa tanka.

²⁷ Iho, wahośiya mitawa kin he niite itokam ye waśi, nitokam canku wiyeya nicicage kta ce, eya owapi qon he dee.

²⁸ Qa miye heciciyapi; Winoḣinca eciyatanhan wicatonpi kin wicaśta wokcan tuwedan Johannes baptem wicaqu qon isanpa tanka śni: tuka Wakantanka tokiconze kin en tuwe iyotan cistinna kin he he kapa ce.

²⁹ Unkan oyate kin qa wamnayanpi kin tona naḣonpi owasin Wakantanka yaowotanpi, Johannes baptem wicaqu kin en opapi.

³⁰ Tuka Pharisee kin, wicoope aiapi kin om, Wakantanka wahokonwicakiye cin en iyapaṭoic̣iyapi, Johannes baptem wicaqu śni nakaeś.

³¹ Unkan Itancan kin heya; Wicaśta wicoicage kin de taku e imdacin kta he; qa taku iyececapi he.

³² śiceca iciyopekiciyapi kin en iyotankapi, qa hoyekiciyapi qa heyapi; Unniciyajopi, tuka wayacipi śni; waśinunnicihdapi, tuka yaceyapi śni ce, eyapi kin he iyececapi ce.

³³ Johannes baptem wicaqu qon he aguyapi yute śni, qa miniśa yatke śni u; unkan, He taku wakan śica yuha ce, ehapi.

³⁴ Wicaśta Cinhintku kin he wote c̣a wayatke hi; unkan hehapi; Wan, wicaśta wan wote sa, qa miniśa yatke sa, wamnayanpi qa waḣtanipi sa takodawicaya ece.

³⁵ Tuka Woksape iye cinca kin owasin on yaowotanpi ece.

³⁶ Unkan Pharisee wanji kici wote kta e cinkiya. Hecen Pharisee ti kin en tin iyaye c̣a, wote kta iyotanka.

³⁷ Unkan iho, otonwe kin en winoḣinca waḣtani sa kin heca, he, Pharisee ti kin en wota iyotanka sdonye c̣ehan, inyan opiye ihepi ohna yuha en hi;

³⁸ Qa tapetepa tanhan siha kin en ceya najin, qa iśta minihanpe kin on siha kiciyujaja, qa paha kin on kicipakinta c̣a, siha kin ikiciputake, c̣a ihepi qon on sdakiciciya.

³⁹ Unkan Pharisee kico qon he wanynke c̣ehan, cante mahen awacin qa heya; Wicaśta kin de wicaśta wokcan unkanś, yutan kin he tuwe qa taku winoḣinca kin sdonye kta tuka; he waḣtani sa kin heca.

⁴⁰ Unkan Jesus Waayupte c̣a heciya; Simon taku eciciye kta mduha ce. Unkan iś, Waonspekiya, katinyan eya wo, eya.

⁴¹ Wicaśta wan wicaśta nonpa oicazo wicaqu: unma kin kaśpapi opawinge zaptan iyohiye śni, qa unma kin iś wikcemna zaptan.

⁴² Unkan taku on hdajujupi kte cin yuhapi śni qehan, wancake sakim wicakicicajuju ce. Hecen unma tukte iyotan waśtedake kta hecinhan, he omakiyaka wo.

⁴³ Simon waayupte c̣a; Tuwe ota kicicajuju hee nace epca ce, eya. Unkan, Tanyan idukcan ce, eciya.

⁴⁴ Hehan winoḣinca qon ekta ihduhomni, qa Simon heciya; Winoḣinca kin de wandaka he: Yati kin en wahi, unkan mini on siha wahdujaja kta mayaqu śni; tuka iye kin iśta minihanpe kin on siha mayujaja, qa paha kin on pakinta.

⁴⁵ I imayaputake śni; tuka winoḣinca kin de wahi kin ehantanhan siha imaputaka ayaśtan śni.

⁴⁶ Pa kin wihdi on sdamayaye śni; tuka winoḣinca kin de ihepi on siha sdamayan ce.

⁴⁷ Hecen on heciciya ce, Waḣtani kin hena ota eśta kicicajujupi; he nina waśtedaka nakaeś: tuka tuwe waniqadan kicicajujupi kin he iwaśtedan waśtedaka ece.

⁴⁸ Hehan winyan qon heciya; Nioḣan śice cin hena nicicajujupi ce.

⁴⁹ Unkan tona kici wota iyotankapi kin hena hehan cante mahen heyapi; De tuwe e woaḣtani nakun kajuju he.

⁵⁰ Unkan winoḣinca qon heciya; Wacinyaye cin he niniyan ce; wookiye on hda wo.