Lukas 5 - Dakota Wowapi Wakan Kin

¹ Unkan oyate kin Wakantanka oie kin naḣonpi kta e aohduteyapi qehan, Geneseret mde kin icahda inajin.

² Qa mde kin en wata nonpa wanka wanyaka; tuka hokuwapi kin iś wanna tokan iyayapi, qa ho kin hdujajapi.

³ Unkan wata unma Simon tawa kin he en ope c̣a, kitanna canan wapa iyayeye kta cin. Hehan en iyotanke c̣a, wata kin etanhan oyate kin waonspewicakiya.

⁴ Unkan wanna ayaśtan qehan Simon heciya; Mini śbe kin ekta iyaye c̣a ho kin minin iyoḣpeya wo.

⁵ Unkan Simon waayupte, c̣a heciya; Waonspekiye cin, hanyetu osan ḣtaunnipi, qa takudan unktepi śni; tuka nioie kin on ho kin iyoḣpewaye kta ce.

⁶ Unkan heconpi qehan, hogan utkanna yuzapi; unkan ho kin papsakapi.

⁷ Unkan tawaśitkupi wata unma en opapi qon hena namwicakicawinpi, en upi qa owicakiyapi kta. Unkan en hipi qa wata napin ojukiyapi, hecen iyujimnana hiyeya.

⁸ Unkan Simon Inyan he wanyake c̣ehan, Jesus hupahu kin en makata eḣpeic̣iye c̣a heya; Itancan, eḣpeya imayaya wo, wicaśta waḣtani sa hemaca ce.

⁹ He iye qa tona om un qon hena hogan yuzapi kin on etanhan owasin inihanpi.

¹⁰ Unkan Jakob qa Johannes Zebede cinhintku kin hena oza, Simon tawaśitkuwicaya, iś eya inihanpi. Unkan Jesus Simon heciya; Wikope śni wo, detanhan wicaśta kin wicaduze kta ce.

¹¹ Unkan wata qon hutata ahdihunipi qehan, owasin eḣpekiyapi, qa iyahna yapi.

¹² Unkan otonwe wan en un qehan, iho, wicaśta wan lepros ececa ḣinca, he Jesus wanyake c̣ehan, ite makipuskin eḣpeic̣iye c̣a, cekiye c̣a heya; Itancan, yacin kinhan mayaduska kta oyakihi.

¹³ Unkan nape yekiye, c̣a yutan, qa heya; Wacin ce; ska un wo, eya. Unkan wancake lepros ececa qon asni hinhda.

¹⁴ Unkan tuwedan okiyake śni śi; tuka wawayuśna kin ekta ye c̣a wanyagic̣iye kta, qa wayuskapi kta on token Moses econ wicaśi qon he ecen econ kta, keya; hecen wowicakiyake kta.

¹⁵ Tuka heon iyotan tankaya wicoḣan kin he oyakapi; hecen wicota en mniciyapi, naḣonpi kta, qa wayazankapi wicayuhapi kin asniwicaye kte cin heon.

¹⁶ Hehan icunonpa makotahedan wan ekta ye c̣a wocekiye eya.

¹⁷ Unkan anpetu wan waonspewicakiya icunhan, Pharisee qa wicoope onspekiye cin hena, Galile otonwe kin owasin, qa Juda qa Jerusalem etanhan, en ahi kin hena en iyotankapi; unkan Itancan towaśake kin asniwicaye kta e en un.

¹⁸ Unkan iho, wicaśta wanṭaṭake cin he owinja ohna wicaśta yuha upi: qa timahen ayapi qa itokam ehnakapi kta akitapi:

¹⁹ Tuka wicota kin on token en aipi kte śni wanyakapi qehan, tipi akan inajinpi, qa akaḣpe yuḣdokapi eciyatanhan cokaya Jesus itokam kun hiyuyapi.

²⁰ Unkan wacinyanpi kin he wanyake c̣ehan, heciya; Wicaśta, wayaḣtani kin nicicajujupi ce.

²¹ Unkan wowapi kagapi qa Pharisee kin iś waakinicapi qa heyapi; De tuwe e taku śica decen eya he. Tuwe woaḣtani kajuju kta okihi he; Wakantanka ecedan okihi.

²² Tuka tawacinpi kin Jesus iwicayukcan, hehan waayupte c̣a hewicakiya; Taku e cante mahen aynkinicapi he:

²³ Wayaḣtani kin nicicajujupi ce; qa iś, Najin qa mani wo, eyapi kte cin unma tukte waśakadan he

²⁴ Tuka Wicaśta Cinhintku kin he iś maka akan woaḣtani kajuju kta okihi sdonyayapi kta; hehan ṭaṭake cin he heciya; Najin qa nitowinja ehdaku qa yati kin ekta hda wo, eciciya ce, eya.

²⁵ Unkan wancake wicitokam najin hiyaye, c̣a akan wanke ciqon he ehdaku, qa iye ti kin ekta hde, c̣a Wakantanka yatan.

²⁶ Unkan owasin inihanpi, qa Wakantanka yatanpi; qa wikopapi ḣince, c̣a heyapi; Wicoḣan nakaka toktokeca wanunyakapi ce, eyapi.

²⁷ Unkan taku kin dena iyohakam hetanhan ye, c̣a wamnayanpi kin heca wanji Lewi eciyapi, wamnayanpi oyanke kin en iyotankehan yanka e wanyaka; qa, Miyahna u wo, eciya.

²⁸ Unkan taku owasin eḣpeye c̣a, najin hiyaye c̣a, ihakam iyaya

²⁹ Unkan Lewi iye ti kin en wohanpi tanka kicaga; unkan wamnayanpi kin iś wicota, qa toktokeca nakun en opeya wotapi kta iyotankapi.

³⁰ Tuka wowapi kagapi wicayuhapi qa Pharisee kin hena waonspewicakiye cin wicakigepi, qa heyapi; Tokeca e wamnayanpi qa waḣtanipi sa om wayatapi qa wadatkanpi ece he.

³¹ Unkan Jesus waayupte c̣a hewicakiya; Tona zanipi kin hena pejihutawicaśta cinpi śni, tuka wayazanpi kin.

³² Owotanpidan kin hena iyopeic̣iyapi kta e wicakico wahi śni, tuka waḣtanipi sa.

³³ Unkan heciyapi; Tokeca e Johannes waonspewicakiye cin hena ijehan wote śni unpi qa wocekiye eyapi he, qa Pharisee tawapi kin iś eya; tuka nitawa kin wotapi qa wayatkanpi ece.

³⁴ Unkan hewicakiya; Hihnaton ti kin cinca kin hena tawicu ton kin he iś owicapeya un kin icunhan wote śni wicayakiyapi kta oyakihipi he.

³⁵ Tuka anpetu kin u kta, en tawicu ton kin he ewicakiciyakupi kta; hehan anpetu kin hena en wote śni unpi kta.

³⁶ Unkan wiyacinpi wan owicakiyaka: Wicaśta tuwedan śina teca onśpa śina tanike cin en akihdagye śni ece; heconpi kinhan teca qon iś yuḣdeca ece, qa onśpa teca etanhan kin he tanike cin kicica śni ece.

³⁷ Qa nakun wicaśta tuwedan miniśa teca ojuha tanike cin en okaśtan śni ece; heconpi kinhan miniśa kin skepe kta, qa ojuha kin atakuni kte śni.

³⁸ Tuka minima teca kin he ito ojuha teca en ohnakapi kta; qa sakim yutehanpi ece.

³⁹ Iś eya wicaśta tuwedan miniśa tanika wanna yatke c̣a, hehan hinnakaha teca cin śni; Tanike cin eeś waśte ce, eya ece.