Lukas 4 - Dakota Wowapi Wakan Kin

¹ Unkan Jesus Woniya Wakan kin ojudan, Jordan eciyatanhan hdi; qa Woniya kin makotahedan ekta iyayeya;

² Anpetu wikcemna topa hehanyan Wakanśica wawiyutanyan. Unkan anpetu kin hena en takudan yute śni; tuka hena ihunniyan hehan wotektehda.

³ Hehan Wakanśica heciya; Wakantanka Cinhintku kin he niye hecinhan, inyan kin de aguyapi icage kta, keya wo.

⁴ Unkan Jesus waayupte c̣a heciya; Aguyapi ecedan on wicani kte śni; tuka Wakantanka oie kin owasin on wicani kta ce, eya owapi ce.

⁵ Hehan Wakanśica paha wan tehanwankantu ekta aye c̣a, wancake maka wokiconze kin owasin kipazo.

⁶ Unkan Wakanśica heciya; Wicowaśake kin de wicookitanin ko owasin cic̣u kta; hena owasin yuhemakiyapi, qa tuwe wacin kinhan waqu kta.

⁷ Heon etanhan niś mitokam makata eḣpenic̣iye cinhan, owasin nitawa kta ce.

⁸ Unkan Jesus waayupte c̣a heciya; Satan, mitapetepa tanhan ya wo: Itancan Wakantanka nitawa kin, he iye itokam makata eḣpenic̣iye kta, qa iye iśnana ahoyape kta ce, eya owapi ce.

⁹ Hehan Jerusalem ekta ahi, qa tipi wakan inkpa kin akan ehde, qa heciya; Wakantanka Cinhintku kin he niye hecinhan, hetanhan kun eḣpeic̣iya wo.

¹⁰ Kaken wowapi en kagapi qon; Ohnihdewicaye cin hena niye on econ wicaśi, niyuhapi kta;

¹¹ Qa napepi kin ohna yuwankan niyuzapi kta; qa hecen tukten inyan kin en siha ibonito kte śni, eya owapi ce, eya.

¹² Unkan Jesus waayupte c̣a heciya; Itancan Wakantanka nitawa kin he iyutanyaye kte śni ce, eya owapi qon.

¹³ Unkan Wakanśica wowiyutanye kin owasin yuśtan qehan, tona can eḣpeya kihda.

¹⁴ Hehan Jesus Woniya towaśake kin yuha Galile en hdi; unkan ihdukśan makoce wanke cin owancaya he oyakupi.

¹⁵ Unkan omniciye tipi tawapi kin ohnahna waonspekiya ece, hecen owasin yuonihanpi.

¹⁶ Unkan Nazareth en icaḣyapi qon he ekta hdi; qa econ ece kin he iyecen, anpetu wakan icunhan, omniciye tipi kin en tin iyaye c̣a, wowapi yawa kta inajin.

¹⁷ Unkan Isaya wicaśta wokcan tawowapi kin qupi. Unkan wowapi kin yumdaye c̣ehan, decen owapi kin iyeya;

¹⁸ Itancan Woniya tawa kin he akan maun; heon waḣpanicapi kin wotanin waśte kin owicawakiyake kta e sdamakiya; tona cante psakawahanpi kin asniwicawaye kta on u maśi; wayaka unpi kin wicakiyuśkapi kta, qa iśtagongapi kin ake tonwanpi kte cin omdake kta; tona kaḣdeḣdecapi kin hena wicawakiyuśke kta;

¹⁹ Qa Itancan omaka oiyokipi tawa kin omdake kta ce.

²⁰ Unkan wowapi kin ecen eyaku, qa ookiye kin he kicu, qa iyotanka. Unkan omniciye tipi kin ohna hiyeye cin owasin opaḣtapi.

²¹ Unkan hehan hewicakiya; Anpetu kin de ninogepi kin en wowapi kin de yuecetupi ce.

²² Unkan owasin yaotaninpi, qa wowaonśida oie iye i kin etanhan inanpe cin on yuśinyayapi; qa heyapi; Joseph cinhintku kin he dee śni he.

²³ Unkan hewicakiya; Awicakehan iapi kin de ecen emayakiapi kta; Niye pejihuta wicaśta kin, asniic̣iya wo: Kapernaum ekta token ecanon naunḣonpi kin, makoce nitawa kin den nakun ecen econ wo.

²⁴ Unkan heya; Awicakehan heciciyapi; Wicaśta wokcan tuwedan iye tamakoce kin en iyowinkiyapi śni ece.

²⁵ Tuka awicakehan heciciyapi; Elias taanpetu kin en, waniyetu yamni sanpa wi śakpe hehanyan maḣpiya kin natakapi; qa makoce kin owancaya wicaakiḣan ḣince ciqon he ehan, Israel en wiwazica ota.

²⁶ Tuka hena wanjidan Elias ekta ye śipi śni; Sidon en Sarepta otonwe kin en, winoḣinca wiwazica wan heceedan ekta ye śipi.

²⁷ Nakun Elisha wicaśta wokcan ni un qehan, lepros ececa wicota Israel en unpi, tuka hena wanjidan yuskapi śni, Naeman Suriya wicaśta kin heceedan ce.

²⁸ Unkan omniciye tipi ohna hiyeye ciqon hena naḣonpi qehan, owasin śihdapi ḣinca;

²⁹ Qa najin hiyayapi qa otonwe kin itankan iyayeyapi, qa paha akan otonwe hdepi kin he matete ekta ayapi, qa kun eḣpeyapi kta.

³⁰ Tuka iye wicacokaya tanhan iyoopta iyaye c̣a kihda.

³¹ Qa Galile en Kapernaum otonwe kin he ekta hi, qa anpetu wakan eca waonspewicakiya ece.

³² Unkan waonspewicakiye cin on inihanpi; oie kin he wowaśake kicica nakaeś.

³³ Unkan omniciye tipi kin ohna wicaśta wan wakan śica śapa woniya kin yuha; qa he hotankakiya hoyeya;

³⁴ Qa heya; Hanta wo, Jesus Nazareth, niye qa unkiye taku unkicicapi he; ihangunyayapi kta yahi he; Wakantanka Taku Wakan Wanji tawa kin he niye e sdonciya ce.

³⁵ Unkan Jesus kiśice c̣a heciya; Inina un, qa wicaśta kin etanhan tankan hinapa wo, eya. Unkan wakanśice cin wicaśta qon wicacokam eḣpeye c̣ehan, etanhan tankan hinapa; tuka ksuweye śni.

³⁶ Unkan owasin inihanpi, qa iyakitedan hekiciyapi; De taku oie kin; wicookihi wicowaśake ko on woniya śape cin econ wicaśi eca, tankan hinanpapi ece.

³⁷ Unkan ihdukśan makoce wanke cin owancaya he oyakapi.

³⁸ Unkan omniciye tipi kin etanhan hdicu, qa Simon ti kin en tin iyaya. Unkan Simon kunku kin he tancan wicakata ececa ḣinca; hecen on cekiyapi.

³⁹ Unkan en inajin, qa tancan kata kin he kiśca; unkan asni hinhda: qa hecehnana najinhiyaye c̣a, owicakiya.

⁴⁰ Unkan wi iyaya hehan, woyazan ocaje ota on wicayazan tona wicayuhapi kin hena en awicahipi; unkan otoiyohi nape awicahnake c̣a asniwicaya.

⁴¹ Qa wakan śica iś eya ota wicota etanhan hinanpapi, qa heya niyanpi; Wakantanka Cinhintku Messiya kin he niye ce. Unkan iye wicakiśice c̣a, Messiya hee sdonyapi kin he, eyapi kta iyowicaki śni.

⁴² Unkan wanna anpao hinape c̣ehan tokan iyaye, c̣a makotahedan ekta ya; unkan oyate kin odepi, qa yanke cin ekta ahi, qa eḣpeya iwicayaye kte cin iyanaptapi.

⁴³ Unkan hewicakiya; Wakantanka tokiconze kin otonwe toktokeca nakun ohna omdake kta; heon etanhan u maśipi ce.

⁴⁴ Hecen Galile omniciye tipi kin hena ohnahna woyaka ece.