Lukas 3 - Dakota Wowapi Wakan Kin

¹ Unkan Tiberius Kesar wicaśtayatapi un waniyetu iakezaptan, Pontius Pilate Juda en itancan, Herod Galile en itancan, qa iye sunkaku Philip Itureya qa Trakonitos en itancan, qa Lusanius Abilene en itancan;

² Qa Annas Kaiaphas kici wośna kaga itancanpi qon he ehan, ḣewotahedan ekta, Johannes Zacariyas cinhintku kin Wakantanka oie kin hiyohi.

³ Unkan he Jordan kahda makoce kin owancaya en u, qa woaḣtani kajujupi kta on iyopeic̣iyapi baptem wicaqupi kin he oyaka:

⁴ Wicaśta wokcan Isaya oie wowapi kin en owapi qon he iyececa; Wicaho wan tuwe makotahedan ekta heya niyan; Itancan tacanku kin wiyeya kicaga po, ocanku tawa kin kiciyuowotan po:

⁵ Kaksiza owasin ojuyapi, qa ḣeyaka paha ko owasin kahukun iyeyapi kta, qa pakśikśan kin hena yuowotanpi, qa ocanku taḣtage cin hena yumdayapi kta ce;

⁶ Qa wicaceḣpi kin owasin Wakantanka wowanikiye kin wanyakupi kta ce.

⁷ Unkan wicota baptem wicaqu kte cin en ahi kin hena hewicakiya; Wamduśka wicoicage kin, tuwe wocanniye u kte cin etanhan nape niśipi he.

⁸ Hecen iyopeiciyapi iyececa waskuyeca icaḣya po, qa, Abraham ateunyanpi ce, cante mahen ecinpi śni po; miye heciciyapi; Wakantanka inyan kin dena etanhan Abraham cinca kicage kta okihi.

⁹ Unkan iś eya onspe kin wanna can hute kin en ehnakapi; heon etanhan can kin tona waskuyeca waśte aicage śni kin hena owasin kawankapi qa petan eḣpeyapi ece.

¹⁰ Unkan oyate kin, Hehan unkiye token econkupi kta he, eya iwangapi.

¹¹ Waayupte c̣a hewicakiya; Tuwe onḣdoḣda nonpa yuhe cinhan, he tuwe nice cin unma qu kta; qa tuwe woyute ton kinhan, iś eya ecen econ kta ce.

¹² Hehan wamnayanpi kin iś nakun baptem wicaqu kta on en hipi qa heciyapi; Waonspekiye unkiye token econkupi kta he.

¹³ Unkan hewicakiya; Wakiconzapi kin isanpa kicapi śni po, eya.

¹⁴ Unkan akicita kin iś eya wiwangapi qa heeiyapi; Qa unkiś token econkupi kta he. Unkan hewicakiya; Wicaśta kin tuwedan wakokipe kicagapi śni, qa tuwedan oitonśniyan taku iyaonpapi śni po; qa wokajuju nic̣upi kin he on cante waśte po.

¹⁵ Unkan oyate kin owasin wakta hiyeya, qa wicasta owasin Johannes on awacinpi, he Messiya kin hee, qa iś hee śni hecinhan;

¹⁶ Hehan Johannes waayupte c̣a owasin hewicakiya; Awicakehan mini on baptem cic̣upi; tuka wanji mikapeya waśaka u, he iye tahanpe hankpan kin weciyuśke kta iyemacece śni; he qe Woniya Wakan peta ko on baptem nic̣upi kta.

¹⁷ He iye wicaduge nape ohna hduhe, c̣a owanka tawa kin tanyan hduska kta; qa aguyapi su kin he tpahi, qa canwohnaka kin en okihnake kta; tuka ha kin e peta kasnipica śni wan on ḣuḣnaḣye kta ce, eya.

¹⁸ Unkan wahokonwicakiye cin en taku toktokeca nakun ota oyate kin owicakiyaka.

¹⁹ Unkan Herod wicaśta itancan kin, iye sunkaku tawicu Herodias hee on, qa taku śica Herod econ kin owasin on iyopeya;

²⁰ Hecen taku owasin sanpa akicage c̣a, wicakaśka tipi kin en Johannes kaśka hnaka.

²¹ Unkan oyate kin owasin baptem wicaqupi, qa Jesus iś eya baptem qupi, qa cekiya un qehan, maḣpiya kin yuzamnipi;

²² Qa Woniya Wakan kin wakiyedan kaḣya tantonyan kun u, qa en iyahan; unkan maḣpiya eciyatanhan wicaho wan hiyu, qa heya; Micinkśi waśtewakidake cin he niye; niye on iyomakipi ḣinca.

²³ Unkan Jesus iye wanna waniyetu wikcemna yamni kta, Joseph cinhintku kin hee kecinpi, he Heli etanhan,

²⁴ He Matthat etanhan, he Lewi etanhan, he Melki etanhan, he Janna etanhan, he Joseph etanhan,

²⁵ He Mattathias etanhan, he Amos etanhan, he Naum etanhan, he Esli etanhan, he Nagge etanhan,

²⁶ He Maath etanhan, he Mattathias etanhan, he Seme etanhan, he Joseph etanhan, he Juda etanhan,

²⁷ He Joanna etanhan, he Resa etanhan, he Zorobabel etanhan, he Salathiel etanhan, he Neri etanhan,

²⁸ He Melki etanhan, he Addi etanhan, he Kosam etanhan, he Elmodam etanhan, he Er etanhan,

²⁹ He Jose etanhan, he Eliezer etanhan, he Jorim etanhan, he Matthat etanhan, he Lewi etanhan,

³⁰ He Simeon etanhan, he Juda etanhan, he Joseph etanhan, he Jonan etanhan, he Eliakim etanhan,

³¹ He Melea etanhan, he Menan etanhan, he Mattatha etanhan, he Nathan etanhan, he Dawid etanhan,

³² He Jesse etanhan, he Obed etanhan, he Booz etanhan, he Salmon etanhan, he Naasson etanhan,

³³ He Aminadab etanhan, he Aram etanhan, he Esrom etanhan, he Phares etanhan, he Juda etanhan,

³⁴ He. Jakob etanhan, he Isaak etanhan, he Abraham etanhan, he Thara etanhan, he Nacor etanhan,

³⁵ He Seruk etanhan, he Ragu etanhan, he Phalek etanhan, he Eber etanhan, he Sala etanhan,

³⁶ He Kenan etanhan, he Arphaksad etanhan, he Sem etanan, he Nowa etanhan, he Lamek etanhan,

³⁷ He Mathusala etanhan, he Enok etanhan, he Jared etanhan, he Maleleel etanhan, he Kanan etanhan,

³⁸ He Enos etanhan, he Seth etanhan, he Adam etanhan, he Wakantanka etanhan.