Lukas 24 - Dakota Wowapi Wakan Kin

¹ Unkan anpetu wakan en anpetu tokaheya, hanḣanna ḣinca, hehan wicaśta hnakapi kin ekta, pejihuta waśtemna wiyeya ehnakapi qon hena yuha en upi; qa toktokeca nakun owicapapi.

² Unkan wicaśta hnakapi kin etanhan inyan kin wanna tokan iyeyapi e wanyakapi:

³ Qa mahen ipi, tuka Jesus Itancan tancan kin he iyeyapi śni.

⁴ Unkan token iyukcanpi nun tanin śni qehan, iho, wicaśta nonpa wokoyake wiyatpatpa unpi icahda nawicajinpi.

⁵ Unkan kokipapi, qa ite kin makipuskin eḣpeic̣iyapi qehan, hewicakiyapi; Tokeca e ṭapi kin wicehna ni un kin ayakitapi he.

⁶ Den un śni; tuka kini ce. Nahanḣin Galile en un qon ehan token eniciyapi qon he kiksuya po:

⁷ Wicaśta Cinhintku kin wicaśta śica napepi kin en wicaqupi kta, qa icipaweḣ okatanpi kta; tuka anpetu iyamni kinhan kini kta ce, eya ce.

⁸ Unkan hecen eye ciqon he kiksuyapi.

⁹ Unkan wicaśta hnakapi kin etanhan kihdapi, qa akewanjipidan uninapi ko hena owasin owicakiyakapi.

¹⁰ Unkan wahośiyapi kin hena hecen owicakiyakapi qon, Mary Magdalene, qa Joanna, qa Mary Jakob hunku kin, qa toktokeca om unpi qon hena eepi.

¹¹ Unkan oiepi kin ikcekceya hitunkakanpi kin iyececa dakapi, qa wicawicadapi śni.

¹² Hehan Inyan najin hiyaye c̣a wicaśta hnakapi kin ekta inyang iyaya; qa en eyokasin qehau miniḣuha wokoyake kin iśnana ehnakapi wanyaka; hehan hdicu qa cante mahen taku econpi kin on inihanyan awacin un.

¹³ Unkan iho, anpetu kin he en, iyepi kin etanhan wicaśta nonpa otonwe wan Emmaus eciyapi kin he ekta yapi, Jerusalem etanhan maka iyutapi wikcemna śakpe ecetu.

¹⁴ Unkan taku hiyohi kin dena owasin on wohdakapi.

¹⁵ Unkan wohdakapi, qa iyukcan awacinpi icunnan, Jesus iye ḣinca kiyedan u, qa om wicaya.

¹⁶ Tuka iśta on iyekiyapi kte śni wicayapi.

¹⁷ Unkan hewicakiya; Wicoie kin dena tukte e he, mayanipi icunhan woyahdakapi qa iyokiśin yaunpi kin.

¹⁸ Unkan unma Kleophas eciyapi kin he waayupte c̣a heciya; Jerusalem en yaun śni ece, dehan en taku hiyohi kin dena sdonyaye śni he.

¹⁹ Unkan hewicakiya; Hena taku he. Unkan heciyapi; Jesus Nazareth etanhan kin on, he wicaśta wokcan, wicoḣan wicoie ko on waśaka, Wakantanka qa oyate kin owasin wicitokam.

²⁰ He wawayuśna itancanpi qa itancanwicunkiyapi kin hena ṭe kta kiconzapi qa icipaweḣ okatanpi.

²¹ Tuka Israel opewicakiton kte cin hee unkiś unkecinpi tuka; unkan heconpi kin ehantanhan wanna anpetu kin de iyamni.

²² Nakun unkanpi kin etanhan winoḣinca wanjikji hanḣanna ḣinca wicaśta hnakapi kin ekta ipi, qa inihanunyanpi:

²³ Iye tancan kin iyeyapi śni qehan, hdicupi qa ohnihde wakan kin heca wanwicayakapi, qa hena he ni un keyapi ce, eya unkokiyakapi.

²⁴ Hehan om unkanpi kin wanjikji wicaśta hnakapi kin ekta ipi, qa winoḣinca oyakapi qon iyececa ḣinca iyeyapi: tuka iye kin wanyakapi śni ce.

²⁵ Unkan hewicakiya; Witkotkokapi qa wicaśta wokcan taku oyakapi qon hena owasin wicada cante hunkapi śni kin:

²⁶ Messiya dena decekcen ito kakije c̣a wowitan tawa kin en hde kte cin he hecetu śni he.

²⁷ Unkan hecen Moses e tokaheya, qa hehan wicaśta wokcan owasin, taku iye kin on wowapi en kagapi qon hena owasin owicakiyaka.

²⁸ Unkan otonwe ekta yapi qon he wanna ikiyedan ehan ipi qehan, iye sanpa ye kta se ececa.

²⁹ Tuka iyakapeyapi, qa heyapi; Unkicipi un wo, wanna ḣtayetu aya, qa anpetu kin wanna owihanke kta. Unkan om un kta e ti mahen iyaya.

³⁰ Unkan om wota yanke c̣ehan, aguyapi eyaku, qa yawaśte, qa yuśpaśpa, qa wicaqu.

³¹ Hehan iśta kin wicakiciyukawapi, qa iyekiyapi: unkan atanin śni iyaya.

³² Unkan hekiciyapi; Canku kin ohna wounkiyakapi qa wowapi wakan kin unkiciyuzamnipi qon he ehan cante unkata śni he.

³³ Unkan wihiyayedan oape kin he en najin hiyayapi, qa Jerusalem ekta hdapi, qa akewanji tona om unpi ko hena witaye yukanpi iyewicayapi;

³⁴ Qa heyapi; Ehanqon Itancan kin kini, qa Simon en tannin ic̣iya ce

³⁵ Hehan iye canku kin ohna tokenketu, qa aguyapi yuśpaśpa kin on iyekiyapi qon, hena he cekcen owicakiyakapi.

³⁶ Unkan hena hecen eyapi icunhan, Jesus iye ḣinca wicacokaya hinajin qa hewicakiya; Wookiye nicipi un nunwe.

³⁷ Unkan inihanpi, qa kokipapi, qa wanagi wanyakapi kecinpi.

³⁸ Unkan hewicakiya; Tokeca e iyoniciśicapi he; qa tokeca cante mahen taku ceṭunyahdapi he.

³⁹ Minape misiha ko, de miye ḣinca e wanmayaka po; mayutanpi qa iyuk can po; ceḣpi huhu waton wandakapi kin wanagi kin iyecen ton śni ece.

⁴⁰ Unkan hecen eye c̣ehan, nape siha ko wicakipazo.

⁴¹ Unkan wowiyuśkin on wicadapi śni, qa hinyaḣin inihanpi, hehan hewicakiya; Den taku yutapi duhapi he.

⁴² Unkan hogan pasnonpi onśpa tuḣmaga canhanpi ahna qupi.

⁴³ Unkan icu, qa wicitokam yuta.

⁴⁴ Qa hewicakiya; Nahaḣin om ciunpi qon ehan, wicoie ociciyakapi qon he dee ce; Moses wicoope tawa, qa wicaśta wokcan, qa odowan kin, henakiya en miye on taku token owapi qon owasin ecen yuśtanpi kta iyececa ce, eya.

⁴⁵ Unkan hehan tawacinpi kin wicakiciyuzamni, qa hecen wowapi kin okaḣnigapi kte.

⁴⁶ Unkan hewicakiya; Hecen owapi, qa Messiya hecen kakije c̣a, anpetu iyamni kinhan ake kini kte ciqon, he hecetu:

⁴⁷ Qa hecen iye caje kin on ihduecetupi qa woaḣtani kajujupi kin, oyate kin owasin en oyakapi kta, Jerusalem en tokaheya kta.

⁴⁸ Qa taku kin dena oyakapi kte cin he niyepi ce.

⁴⁹ Unkan iho, Ate taku iwahowicaye ciqon he niyepi kin en uwakiye kta; tuka tohanyan wankantanhan wowaśake yuheniciyapi śni kin hehanyan Jerusalem otonwe kin en ece yukan po.

⁵⁰ Hehan tankan awicaya, Bethani hehanyan; unkan nape wicakiyuwinta qa wicayawaśte.

⁵¹ Unkan wicayawaśte icunhan, yutokan ewicakiciyakupi, qa wankan maḣpiya kin ekta ayapi.

⁵² Unkan iye ohodapi, qa wowiyuśkin tanka yuha Jerusalem ekta kipi:

⁵³ Qa ohinniyan tipi wakan kin ohna ece yukanpi, Wakantanka yatanpi qa yawaśtepi ece. Amen.