Lukas 22 - Dakota Wowapi Wakan Kin

¹ Unkan aguyapi napoḣyapi śni yutapi woacakśin eciyapi kin, he wanna ecadan iyehantu kte.

² Unkan wawayuśnapi itancanpi, qa wowapi kagapi kin, hena token econpi, qa ṭeyapi kte cin he akitapi; tuka oyate kin kowicakipapi.

³ Unkan akenonpapi kin etanhan, wanji Judas Iskariot eciyapi kin he Satan tancan mahen iyaya.

⁴ Unkan he ekta ye c̣a, wawayuśna itancanpi, qa akicita itancanpi kin hena om wohdaka, token econ qa wicaqu kte cin heon.

⁵ Unkan iyuśkinpi, qa mazaska qupi kta keciyapi.

⁶ Hecen wicada, qa wicota kin en unpi śni icunhan wicaqu kta akita.

⁷ Unkan aguyapi napoḣyapi śni anpetu en woacakśin ktepi kte cin wanna hehantu.

⁸ Hehan Inyan qa Johannes ye wicaśi qa heya; Ya po, woacakśin untapi kte cin ho wiyeya unkicihnaka po.

⁹ Unkan heciyapi; Tukten wiyeya unhnakapi kta yacin he.

¹⁰ Unkan hewicakiya; Otonwe kin en yaipi kinhan, wicaśta wan wakiśkokpa mini ohnaka yuha itkonicipapi kta; iho, iye tukten tin kihde cinhan, iyahna ya po.

¹¹ Qa tipi tawa kin heciya po; Waonspekiye cin heniciya ce; Wotapi tipi ohna woacakśin kin he waonspewicawakiye cin om wate kte cin he tukte e he.

¹² Kinhan, wankan tipi wan tankaya, qa ayucopi e nicipazopi kta; hen wiyeya hnaka po, eya.

¹³ Unkan iyayapi, qa token ewicakiye ciqon ecen iyeyapi; qa woacakśin wiyeya hnakapi.

¹⁴ Unkan wanna iyehantu qehan, en iyotanka, qa wahośiyapi akenonpapi kin nakun.

¹⁵ Unkan hewicakiya; Makakije kte cin he itokamya woacakśin kin de untapi kte cin nina wacin qon.

¹⁶ Qa heciciyapi ce; tohan Wakantanka tokiconze kin ekta yuecetupi śni kin, hehanyan detanhan ake wate kte śni ce, eya.

¹⁷ Unkan miniyatkan kin he icu, qa wopida eye c̣a heya; De icupi qa kicipamni po:

¹⁸ Qa heciciyapi ce; Wakantanka tokiconze kin he tohan hiyohi śni kin, hehanyan hastanhanka iyuwi waskuyeca kin etanhan mdatke kte śni ce, eya.

¹⁹ Unkan aguyapi kin icu, qa wopida eye, c̣a yuśpaśpa, qa wicaqu, qa heya; Mitancan niyepi on qupi kin he dee ce; decen miksuya econ po.

²⁰ Unkan miniyatkan kin iś eya wotapi iyohakamya wicaqu, qa heya; Mawe niyepi kin on papsonpi kin, en okodakiciye teca kin, miniyatkan kin he dee ce.

²¹ Tuka iho, wiyopemaye kte cin he nape kin wahna wotapi kin akan miciun.

²² Unkan Wicaśta Cinhintku kin token kiconzapi qon ecen ye kta e hecetu; tuka tuwe he wiyopeya hecinhan he wicaśta kin woteḣi kiciyanka ce.

²³ Unkan hinakaha iye iyakitedan tukte wanji hecon kte cin he ikiciwanḣ yeyapi.

²⁴ Unkan tukte wanji iyotan yawapi kte cin he nakun hdokinicapi.

²⁵ Unkan hewicakiya; Oyate kin wicaśtayatapi wicayuhapi kin hena iś iwicadakapi, qa tona wicookihiya owicakiḣanyanpi kin hena ohanwaśtepi, ewicakiyapi ece.

²⁶ Tuka niś henicecapi kte śni; tuka niyepi kin ekta tukte wanji tokapa kinhan, hee hakakta kin iyecece kta ce.

²⁷ Wota yanke cin, qa wayutankiyapi kin, hena unma tukte iyotan tanka he. Tuwe wota yanke cin hee śni he. Tuka miś wayutankiyapi kin he iyecen cicipi waun ce.

²⁸ Wawiyutanmayanpi kin en kici maunpi kin he niyepi:

²⁹ Heon Atewaye cin he wokiconze wan maqu kin he iyecen cic̣upi:

³⁰ Qa hecen wokiconze mitawa kin en, wahna wotapi mitawa kin ekta wayatapi, qa wadatkanpi kta; qa wicaśtayatapi oyanke kin heca akan idotankapi kta, qa Israel wicoun akenonpapi kin wicadacopi kta ce.

³¹ Hehan Itancan kin heya; Simon, Simon, iho, Satan niyuhe c̣a, aguyapi su iyecen niyucan kta e cin tuka ce.

³² Tuka wacinyaye cin he iyotpani kte śni e wocekiye eciciya; qa tohan niś niyuhomnipi kinhan, nihunkawanji wicahduwaśaka wo, eya.

³³ Unkan heciya; Itancan, wicokaśke wiconṭe ko en nici mde kta wiyeya waun ce.

³⁴ Unkan heya; Simon, anpetu kin de anpaohotonna hoton śni, ecen yamni akihde sdonmayaye cin he anayakiḣbe kta, eciciya ce.

³⁵ Unkan hewicakiya; Mazaska ojuha, qa wojuhadan, qa hanpa, hena codan yeciśipi qon he ehan, taku wanjidan kaeś iniciyotpanipi he. Unkan, Takudan śni ce, eyapi.

³⁶ Hehan hewicakiya; Tuka nakaha tuwe mazaska ojuha ton kinhan, ehdaku kta; qa wojuhadan nakun: qa tuwe mazasagye nice cinhan, wokoyake tawa kin wiyopekiye, c̣a wanji opeton kta.

³⁷ Taku wowapi en kagapi qon, Wicoḣan śica econpi kin om yawapi ce, eyapi kin he miye en yuecetupi kta, eciciyapi: Unkan dena miye on ecen econpi kta ce.

³⁸ Unkan heciyapi; Itancan, wanyaka wo, den mazasagye nonpa ce. Unkan, Henakeca ce, ewicakiya.

³⁹ Unkan tankan hdicu, qa Oliwe paha kin ekta i ece qon, he ake ekta ya; unkan waonspewicakiye cin iś iyahna yapi.

⁴⁰ Unkan wanna ehan i qehan, hewicakiya; Wowiyutanye kin en idadapi kte śni e cekiya po.

⁴¹ Hehan wicicunonpa inyan ekta eḣpeyapi kin hehanyan ecen i, qa canpeśka makehde inajin qa cekiya,

⁴² Qa heya; Ate hecen nitawacin kinhan, miniyatkan kin de tokan imiciyaye kta; tuka miye mitawacin kin hee śni, niye nitawacin kin hee ecen econpi nunwe.

⁴³ Hehan maḣpiya eciyatanhan ohnihde wan en hi qa yuwaśaka.

⁴⁴ Unkan nina ḣin yazanhda qehan, iyotan wokitanyan cekiya; qa temni kin he we ośbuye tankinkinyan makata hinḣpaya se ececa.

⁴⁵ Unkan cekiye cin hetanhan wanna najin hiyaye, c̣a waonspewicakiye cin en wicahdi qehan, wacin iyokiśicapi kin on iśtinmapi iyewicaya.

⁴⁶ Qa hewicakiya; Tokeca niśtinmapi he: najinpi qa cekiya po; hecen wowiyutanye kin en yaipi kte śni.

⁴⁷ Hena hecen eya icunhan, iho, wicota, qa akenonpapi kin etanhan wanji Judas eciyapi kin, he wicitokam u, qa Jesus i iputake kta e ikiyedan hiyu.

⁴⁸ Tuka Jesus heciya; Judas, Wicaśta Cinhintku kin i iputakapi wan on wicayaqu he.

⁴⁹ Unkan kici unpi qon hena, taku toketu kte cin wanna wanyakapi qehan heciyapi; Itancan, mazasagye on waaunpapi kta he.

⁵⁰ Unkan wanji wawayuśna itancan taokiye wanji ape, c̣a etapa kin eciyatanhan noge kin kaśpa.

⁵¹ Unkan Jesus waayupte c̣a, Hehanyan iyowinmakiya wo, eye c̣a noge yutan, qa asniyan.

⁵² Hehan Jesus wawayuśna itancanpi, qa tipi wakan kin en itancanpi, qa tokapapi en au qon, hena hewicakiya; Mazasagye can ko yuha wamanon sa wan tatpe yapi se iyecen yahipi he.

⁵³ Anpetu iyohi tipi wakan kin ohna opeya ciunpi qon ehan, tuwedan nape kin itkom hiyumayakiyapi śni; tuka dehan nakaha kin he niye nitawapi, qa otpaza wowaśake kin, eya.

⁵⁴ Hehan yuzapi qa ayapi, qa wawayuśna itancan ti kin ekta aipi. Unkan Inyan itehan ihakam u.

⁵⁵ Unkan itankan tipi kin en cokaya cetipi, qa ptaya iyotankapi qehan, Inyan iś eya wicehna iyotanka.

⁵⁶ Tuka petkahda iyotankehan yanke cin, hehan wikośka wan wanyake c̣a, opaḣte c̣a heya; Wicaśta kin de iś eya he kici un tuka ce, eya.

⁵⁷ Unkan anakiḣbe, c̣a, Winoḣinc̣a, he tuwe kin sdonwaye śni ce, eya.

⁵⁸ Unkan iecadan wanji tokeca wanyake c̣a heya; Niś eya henitannan ce. Unkan Inyan heya; Wicaśta, hematanhan śni ce.

⁵⁹ Unkan iyohakam wihiyayedan oape wanji ecetu, hehan wanji tokeca yaaṭinze c̣a heya; Galile wicaśta kin de heca, on etanhan awicakehan iś eya he kici un tuka ce.

⁶⁰ Unkan Inyan heya; Wicaśta, token ehe cin he sdonwaye śni ce. Unkan hecehnana, iahan icunhan, anpaohotonna kin hoton.

⁶¹ Unkan Itancan kin ihduhomni, qa Inyan atonwan. Hehan Itancan kin, Anpaohotonna hoton śni kin itokam yamni akihde anamayakiḣbe kta ce, eye ciqon, oie kin he Inyan kiksuya.

⁶² Hehan Inyan tankan kihde c̣a nina ḣin ceya.

⁶³ Unkan wicaśta Jesus yus unpi kin hena iḣaḣapi qa apapi.

⁶⁴ Qa ite kin akaḣpetonpi hehan, ite kin ohna apapi, qa heya iwangapi; Tuwe anipa hecinhan ito iyukcan wo.

⁶⁵ Qa taku toktokeca ota itkom waośtehdaya eciyapi.

⁶⁶ Unkan wanna anpao qehan, oyate kin en tona tokapapi, qa wawayuśna itancanpi, qa wowapi kagapi kin, hena mniciyapi, qa omniciye kin en aupi;

⁶⁷ Qa heyapi; Messiya he niye hecinhan unkokiyaka po. Unkan hewicakiya; Ociciyakapi eśta wicayadapi kte śni.

⁶⁸ Qa wiciwangapi eśta amayaduptapi kte śni, qa amayaduśtanpi kte śni.

⁶⁹ De iyohakam Wicaśta Cinhintku kin Wakantanka towaśake etapa kin eciyatanhan iyotanke kta ce, eya.

⁷⁰ Unkan owasin heyapi; Hecen Wakantanka Cinhintku kin he niye he. Unkan, He miye kehapi ce, ewicakiya.

⁷¹ Unkan heyapi; Iye i kin eciyatanhan unkiyepi ḣinca wanna naunḣonpi ce; hecen tokeca ecin sanpa wayaotaninpi unkodepi kta he.