Lukas 21 - Dakota Wowapi Wakan Kin

¹ Unkan wankan etonwe, c̣a wicaśta wijicapi kin womnaye opiye kin en taku wicaqupi kin eḣpeya ayapi wanyaka.

² Unkan wiwazica wanji waḣpanica kin iś mazaśadan nonpa en eḣpeya e wanyaka.

³ Unkan heya; Awicakehan heciciyapi, Wiwazica waḣpanica kin de iśnana ota en eḣpeya ce.

⁴ Dena owasin taku iwicakiciyaye cin hee Wakantanka taku qupi kin en eḣpekiyapi ece; tuka iye taku ton śni, etanhan taku on ni kte cin ocowasin en eḣpeya ce.

⁵ Unkan apa iś tipi wakan kin inyan waśteśte, qa taku wicaqupi kin on ayucopi kin, he cajeyatapi qehan, heya;

⁶ Anpetu hiyohi kta, en taku wandakapi kin dena inyan nonpa icitakihna wanke śni eḣpeyapi kta ce.

⁷ Hehan wiwangapi, qa heyapi; Waonspekiye cin, tohan kinhan hena hecetu kta he; qa hena hecetu kte cin wanna iyehantu kinhan, taku on sdonyapi kta he.

⁸ Unkan heya; Ihnuhan nihnayanpi kinhan; wicota micaje kin on upi qa, He miye ce, qa wanna ecadan iyehantu kta ce, eyapi kta: tuka wicihakam yapi sni po.

⁹ Tuka okicize owodutatonpi ko cajeyatapi nayaḣonpi kinhan, nihinciyapi śni po; ito tokaheya hena hecen hiyohi kta iyececa, tuka owihanke kin hinyaḣinke kte śni ce.

¹⁰ Hehan hewicakiya; Oyate wan oyate tokeca azuye kta, qa wokiconze wan wokiconze tokeca on inajin kta:

¹¹ Qa otakiya raaka kin nina śkanśkan, qa wicaakiḣan, qa makośiksice, qa wowanyake wokokipe, qa maḣpiya kin eciyatanhan wowapetoktokeca, hena hecekcen yuke kta ce.

¹² Tuka taku kin dena owasin itokaptu, micaje kin on etanhan iyaniḣpayapi, qa śicaya nicuwapi, qa omniciye tipi, kaśka wicahnakapi tipi ko en aniyanpi, qa wicaśtayatapi wicaśta iwicadakapi kin ko wicitokam aniyanpi kta ce:

¹³ Unkan hecen on oniyakapi ece e kta.

¹⁴ Hecen icantekic̣un po; token waaduptapi kte cin he kanyehan awacinpi śni po:

¹⁵ Wicai wicoksape ahna cic̣upi kta, hecen tokaniyanpi kin tuwedan taku iennihdepi kte śni, qa iyakapeniyanpi kte śni.

¹⁶ Tuka hunkake wicayayapi, qa hunkawanjin wicayayapi, qa takuwicayayapi, qa koda wicayayapi kin, hena e wiyopeniyanpi kta; qa apa ṭeniyanpi kagapi kta ce:

¹⁷ Qa micaje kin on etanhan owasin niciyuśepi kta.

¹⁸ Tuka paha wanjidan kaeś awinitukapi kte śni ce.

¹⁹ Wacinnitankapi kin on nicantepi kin hduha po.

²⁰ Jerusalem ihdukśan ozuye yankapi wandakapi kinhan, ihangyapi kte cin he wanna kiyadan e sdonya po.

²¹ Hehan tona Juda makoce kin en unpi kinhan, ḣe kin ekta najicapi kta; qa tona cokaya en unpi kinhan tankan inapapi kta; qa okśan makoce wanke cin tona en yakonpi kinhan, ekta hdicupi kte śni.

²² Tokic̣onpi anpetu kin hena ee; hecen taku token owapi qon hena owasin ecen yuśtanpi kta ce.

²³ Tuka anpetu kin hena en tona ihduśakapi, qa tona hokśin azinwicakiyapi kin hena woteḣi wicakiciyanke kta; maka kin akan wokakije tanka kta, qa wocanniye oyate kin de en awicaun kta.

²⁴ Qa mazasagye ope kin on wankahanpi kta; qa oyate kin owasin ektakta wayaka awicahdapi kta; qa Ikcewicaśta kin Jerusalem naaṭinzapi kta, ecen Ikcewicasta kin taku iyewicakicihantu kta ce.

²⁵ Anpetu wi, qa hanyetu wi, qa wicanḣpi kin hena ekta wowapetokeca yuke kta; qa maka akan oyate kin yazanhdapi kta, qa wicotoketu tanin śni; qa miniwanca otaja ko sa wanke kta.

²⁶ Wicaśta kin kopa, qa maka akan taku hiyohi kte cin he ape hiyeye cin, hena on cante toki wicayanka tanin kte śni ece; maḣpiya wowaśake kin hena huhuzahe kta heon.

²⁷ Hehan Wicaśta Cinhintku kin maḣpiya śapa wan akan, wowaśake qa wookitanin tanka hduha u wandakapi kta.

²⁸ Unkan dena decen aye cinhan, hehan wankan etonwanpi, qa pa yuwankan icu po; openicitonpi kin he wanna kiyadan u ce, eya.

²⁹ Unkan wiyacinpi wan owicakiyaka: Suken can, qa can kin owasin, hena wanyaka po;

³⁰ Canwapa paḣa eca, mdoketu wanna ikiyedan, niye cinka wandakapi, qa sdonyayapi ece.

³¹ Iho he iyececa, taku kin dena iyecetu wandakapi kinhan, Wakantanka tokiconze kin he wanna ikiyedan un e sdonya po.

³² Awicakehan heciciyapi, Wicoicage kin de tokan iyaye śni, ecen dena owasin iyecetu kta ce.

³³ Maḣpiya kin maka ahna tokan iyaye kta, tuka mioie kin e tokan iyaye kte śni ce.

³⁴ Unkan itonic̣ipa po; okinni tukten wotapi, qa witkopi, qa wiconi kin de awacinpi kin, hena on nicantepi kin niyuśakapi kta naceca; qa hecen sdonyakiyapi śni ecen anpetu kin he nihiyohipi kte.

³⁵ Maka ite kin akan yakonpi kin owaain wohmuke wan iyecen wicahiyohi kta ce.

³⁶ Heon ohinniyan wakta po, qa cekiya po; hecen taku hiyohi kte cin dena owasin icunom idadapi, qa Wicaśta Cinhintku kin itokam nayajinpi kta iyececa niyawapi kta ce.

³⁷ Unkan anpetu icunhan tipi wakan kin ohna waonspekiya un; qa hanyetu hehan tankan hdicu, qa paha wan Oliwe eciyapi kin he en yanka.

³⁸ Unkan hanḣanna ḣinca oyate kin owasin oie naḣonpi kta e tipi wakan kin en ahi.