Lukas 2 - Dakota Wowapi Wakan Kin

¹ Unkan anpetu kin hena en, Kesar Agustus, maka kin owancaya wicaśta owicawapi kta, wakiconza.

² Kurenios Suria en wicaśtayatapi yanke cin he ehan tokaneya owicawapi kin de yuśtanpi.

³ Unkan owasin toketken tonwanyanpi qon owicawapi kta e ektakta kipi.

⁴ Unkan Joseph, Dawid ti qa wicowazi tawa kin hetanhan, heon iś eya, Galile en Nazareth otonwe kin etanhan ye c̣a, Bethlehem Dawid totonwe kin ekta ki;

⁵ Mary tawicuye kte cin he kici owapi kta; he wanna cinca ton kta ikiyedan.

⁶ Unkan hen yukanpi kin icunhan, anpetu en cinca ton kte cin wanna iyehantu.

⁷ Hecen cinhintku tokapa kin ton, qa śina on hduskite c̣a, wanunyanpi en wotapi wan en ohnaka; timahen owicakan śni heon etanhan.

⁸ Unkan makoce kin he en taḣincaska awanwicayakapi kin heca hanyen optaye tawapi kin awanwicahdakapi.

⁹ Unkan iho, Itancan taohnihde wan en wicahi, qa Itancan tawookitanin kin ohomni iyojanjanwicaya; unkan nina wikopapi.

¹⁰ Unkan ohnihde wakan kin hewicakiya; Wikopapi śni po; iho, wopida tanka wootanin waśte oyate kin owancaya ecen ye kte cin, he eca hośi cicahipi ce.

¹¹ Anpe dehan Dawid totonwe kin en Wanikiya wan nicitonpi, Messiya Itancan kin he hee.

¹² Qa on sdonyayapi kte cin he dee; Hokśiyoqopa kin śina on yuskiskitapi qa wanunyanpi en wotapi wan ohna wanka iyeyayapi kta ce.

¹³ Unkan ihnuhanna maḣpiya ekta unpi kin wicota ohnihde wakan kin kici hiyeya, Wukantanka yatanpi qa heyapi;

¹⁴ Iyotan wankantu ekta Wakantanka wowitan yuha nunwe, maka akan wookiye qa wicaśta ekta wicokiciyuwaśte.

¹⁵ Unkan maḣpiya ohnihde kin hena eḣpeya wicakiyahdapi qehan, wicaśta taḣincaska awanwicayakapi kin hekiciyapi; Wanna Bethlehem ekta unyanpi, qa taku hiyohi Itancan unkokiyakapi kin de wanunyakapi kta ce.

¹⁶ Hecen koyaḣanna upi, qa Mary Joseph kici, qa hokśiyoqopa kin wanunyanpi en wotapi wan ohna wanka iyeyapi.

¹⁷ Unkan wanyakapi qehan, hokśiyoqopa kin on iapi naḣonpi qon, he owancaya yaotaninpi.

¹⁸ Unkan taḣincaska awanwicayakapi taku yaotaninpi kin he tona naḣonpi kin owasin yuśinyayapi.

¹⁹ Tuka Mary wicoie kin dena owasin cante mahen okihnake c̣a awakicin un.

²⁰ Unkan taḣincaska awanwicayakapi kin hena kihdapi, qa taku naḣonpi qa wanyaknpi kin on Wakantanka yaonihanpi qa yatanpi; taku owicakiyakapi qon he iyececa.

²¹ Unkan wanna anpetu iśahdogan, hokśiyoqopa baḣdayapi kta hehan Jesus eciyapi; nahaḣin itpihnakapi śni he ehan maḣpiya ohnihde kin hecen caśton.

²² Unkan Moses woope kage cin iyecen, anpetu en ihdukaśote kte śni hena wanna henakeca, hehan Itancan kin qupi kta e Jerusalem ekta hdoupi.

²³ Itancan woope tawa kin en owapi qon iyececa; Tona tokapapi, wica eca, otoiyohi Itancan kin ekta wakan eciyapi kta ce.

²⁴ Qa nakun wawayuśnapi kta, token Itancan toope kin en eyapi qon he iyececa; Wakiyedan tawanjidan, qa iś wakiyedan cinca nonpa ce.

²⁵ Unkan iho, Jerusalem en wicaśta wan Simon eciyapi; he wicaśta owotanna qa cekiya ece kin heca, qa Israel Wokicanpte kin ape un; unkan Woniya Wakan kin kici un.

²⁶ Unkan he ṭe śni itokam Itancan Messiya tawa kin he wanyake kta, Woniya Wakan kin okiyaka.

²⁷ He Woniya kin on tipi wakan kin en tin hiyu; unkan hunkakewicaye cin hokśiyoqopa Jesus, wicoope kin eciyatanhan ecakiconpi kta e en hdoupi;

²⁸ Hehan adoksohan yuze, c̣a Wakantanka yawaśte, qa heya;

²⁹ Mayuha, nitaokiye kin wanna wookiye yuha iyayeyaye kta;

³⁰ Wowanikiye nitawa kin he miiśta kin on wanmdaka ce;

³¹ Oyate kin owasin wicitokam wiyeya yehnake cin he;

³² Ojanjan wan oyate kin aojanjanwicaye kte cin, qa nitaoyate Israel wookitanin kin, he hee ce, eya.

³³ Unkan taku eeiyapi kin hena on hunku qa Joseph yuśinyayapi.

³⁴ Unkan Simon wicayawaśte, qa hunku Mary heciya; Inyun, Israel en wicota hicahanpi, qa ake inajinpi kte cin on hokśiyopa kin de ehdepi, qa nakun wowapetokeca ienhdepi kte cin ee kta;

³⁵ Qa nakun mazasagye wan on nitaniya kin canipapi kte; qa hecen wicacanteoze ota yuotaninpi kta ce, eya.

³⁶ Unkan waayate wanji Anna eciyapi, Phanuel cunwintku, qa Aser wicowazi kin etanhan; he wanna wakanka ḣinca, qa hihnaton kin etanhan waniyetu śakowin hehanyan hihnaku kici un:

³⁷ Qa he wanna wiwazica, waniyetu wikcemna śahdogan sanpa topa ecetu, qa tipi wakan kin en ece un, qa wote śni unpi wocekiye eya ahna on ohoda ece.

³⁸ Unkan he hehantudan ḣin en u, qa iś eya Itancan kin yatan, qa Jerusalem en tona opewicakitonpi kin ape unpi kin hena owasin Jesus cajewicakiyata.

³⁹ Unkan Itancan wicoope taw a kin owasin ecekcen yuśtanpi qehan, Galile en iye otonwe tawapi Nazareth he ekta kihdapi.

⁴⁰ Unkan hokśiyopa kin icage, c̣a woniya kin en waśaka aye, c̣a wicoksape kin on ojudan; unkan Wakantanka towaśte kin he kici un.

⁴¹ Woacakśin wotapi eca, hunkakewicaye cin waniyetu towanakeca Jerusalem ekta ipi ece.

⁴² Unkan Jesus wanna waniyetu akenonpa, hehan wotapi wicoḣan kin iyececa, Jerusalem ekta ipi.

⁴³ Unkan anpetu kin yuśtanpi qehan, hdicupi, tuka hokśiyopa Jesus hekta Jerusalem en yanka; tuka hunku Joseph kici he sdonyapi śni.

⁴⁴ Tuka ptaya hdapi kin en opa kecinpi, hecen anpetu wanjidan iyooptapi, qa takuwicayapi kici sdonkiciyapi ko wicehna okidepi.

⁴⁵ Qa iyeyapi śni, hehan Jerusalem ekta ake icicawin akin ipi.

⁴⁶ Unkan yamni can, hehan tipi wakan kin en waonspekiyapi kin wicacokam waanawicagoptan, qa wiwicawanḣ yanka iyekiyapi.

⁴⁷ Unkan wacin ksape cin, qa waayupte cin tona naḣonpi qon owasin inihanpi.

⁴⁸ Unkan wanhdakapi qehan yuśinyayapi; qa hunku kin heciya; Cinś, tokeca decen unkoyakiḣandapi he; iho we, niyate kici wacin iyokiśinya ocide ce.

⁴⁹ Unkan hewicakiya; Tokeca omayadepi he: Atewaye cin wicoḣan tawa kin he ito owecipe kta kecannipi śni he.

⁵⁰ Unkan taku ewicakiye cin he okaḣnigapi śni.

⁵¹ Hecen om hde, c̣a Nazareth ekta ki, qa anawicakigoptan un. Unkan hunku kin wicoie kin dena owasin cante mahen yuha un.

⁵² Unkan Jesus sanpa ksape c̣a hanska icaga; qa Wakantanka wicaśta ko ekta waśtedakapi.