Lukas 19 - Dakota Wowapi Wakan Kin

¹ Unkan Jeriko en i, qa iyoopte iyaya.

² Unkan iho, wicaśta wan Zakeus eciyapi, wamnayanpi itancan kin wanji hee, qa wijica.

³ Unkan Jesus tuwe kin hecinhan he wanyag akita; tuka tancan ptecedan, hecen wicota kin on tokadan okihi śni.

⁴ Unkan tokata inyang ye c̣a sukamin can wanji adi, wanyake kta e heon, hen hiyaye kta nakaes.

⁵ Unkan Jesus wanna ehan i qehan, wankan etonwe c̣a wanyaka, qa heciya, Zakeus koyaḣanna kun hdicu wo, anpetu kin de yati kin en ito manke kta ce.

⁶ Unkan koyaḣanna kun ku, qa iyuśkinyan iyowinkiya.

⁷ Unkan he wanyakapi qehan owasin ikapapi qa heyapi, Wicaśta wan waḣtani sa he kici wote kta iyaya ce.

⁸ Unkan Zakeus najinhan najin qa Itancan kin heciya; Itancan wanyaka wo, woyuha mitawa kin hanke wahpanicapi kin wicawaqu ece; qa tuwe oitonśniyan taku iwecicu kinhan, topa akihde wecu kta ce.

⁹ Unkan Jesus heciya; Anpetu kin de wanikiyapi tipi kin de hiyohi; Abraham cincaye cin wanji hee nakaeś.

¹⁰ Wicaśta Cinhintku kin taku atakuni śni qon he akite c̣a niye kta e heon hi ce, eya.

¹¹ Unkan hena naḣonpi qehan nakun wiyacinpi wan owicakiyaka; wanna Jerusalem ikiyedan un, qa Wakantanka tokiconze kin ecadan u kta kecinpi kin heon etanhan:

¹² Qa heya; Wicaśta ihdawa wan makoce itehan wan ekta iyaya, wokiconze icu qa ku kta.

¹³ Unkan taokiye wikcemna wicayuhe cin, hena wicakico, qa mazaska tkeutapi wikcemna wicaqu, qa hewicakiya; Tohanyan wahdi śni hehanyan un po.

¹⁴ Tuka taoyate kin waḣtedapi śni, qa tuwe iyahna yeśipi, qa heyapi; Wicaśta kin de unkidakapi kta uncinpi śni ce.

¹⁵ Unkan wokiconze kin icu qa hdi qehan, taokiye mazaska wicaqu qon hena wicakicopi kta keya; wopetonpi kin on tona wanna hdamnanpi hecinhan, he sdonye kta.

¹⁶ Unkan tokaheya kin he u, qa heya; Itancan kin, mazaska nitawa qon, he wanna mazaska wikcemna kamna ce.

¹⁷ Unkan heciya; Han, ookiye niwaśte; taku tonana on wacinyepica yaun, heon etanhan ito otonwe wikcemna idaka wo.

¹⁸ Unkan iyokihe kin he u, qa heya; Itancan kin, mazaska nitawa qon, he wanna mazaska zaptan kamna ce.

¹⁹ ynkan iś eya heciya; Niś otonwe zaptan idaka wo.

²⁰ Unkan wanji tokeca u, qa heya; Itancan kin, wanyaka wo, mazaska nitawa wanapin ohna yuha waun, he dee:

²¹ Wicaśta niśake cin heon kocicipa ce; taku eyahnake śni kin, he ece edaku; qa woyaju śni kin he ece duksa ce, eya.

²² Unkan heciya; Nii kin eciyatanhan ciyaco kta, ookiye winicaśtaśni; wicaśta maśake cin he sdonyaya; taku ewehnake śni kin he ece emdaku, qa wowaju śni kin hee mduksa ece.

²³ Hecen tokeca mazaska mitawa kin he iciyopekiciyapi kin en ade śni he; kinhan wahdi kin ekta mitawa kin oicage ahna weca kta tuka ce.

²⁴ Hehan hen najinpi kin hena hewicakiya; Mazaska kin he ikicicupi qa tuwe mazaska wikcemna yuhe cin hee qu po.

²⁵ Unkan heciyapi; Itancan kin, he wanna mazaska wikcemna yuha ce.

²⁶ Tona taku yuhapi kin hena owasin nakun wicaqupi ece e kta; qa tuwe taku yuhe śni kinhan, taku yuhe cin hee kaeś ekiciyakupi kta ece, eciciyapi ce.

²⁷ Tuka tokamayanpi iwicawadake kta cinpi śni qon hena den awicaupi qa mitokam wicakte po, eya ce.

²⁸ unkan hena hecen eye c̣ehan, tokata ye c̣a Jerusalem ekta itawankanhde iyaya.

²⁹ Qa Bethphage qa Bethani, paha wan Oliwe eciyapi kin, he wanna ikiyedan ehan i qehan, waonspewicakiye cin etanhan nonpa ye wicaśi;

³⁰ Qa heya; Otonwe iyotakons wanke cin he ekta ya po; qa tokaheya en yaipi kinhan śukcincadan wan iyeyayapi kta, wicaśta tuwedan tohinni akan iyotanke śni; he kiyuśkapi qa aku po.

³¹ Qa, Tokeca yakiduśkapi he, tuwe eya iniwangapi kinhan, niś hehan, Itancan kin cin ce, eyakiyapi kta.

³² Unkan ye wicaśi qon hena iyayapi, qa token ewicakiye cin ecen iyeyapi.

³³ Unkan śukcincadan kiyuśkapi icunhan, tuwe tawapi kin hena hewicakiyapi; Tokeca yakiduśkapi he.

³⁴ Unkan, Itancan kin cin ce, eyapi.

³⁵ Unkan Jesus kahdipi; qa wokoyake tawapi kin śukcinca kin aiḣpeyapi, qa Jesus akan yankekiyapi.

³⁶ Qa ye cin tahepi canku ohna wokoyake kin hdumdayapi.

³⁷ Unkan ikiyedan Oliwe paha kin apamahde iyayapi kin hehan wanna i qehan, waonspewicakiya wicota owasin, wicowaśake wicoḣan wanyakapi qon owasin on etanhan hinakaha iyuśkinpi, qa hotankakiya Wakantanka yatanpi,

³⁸ Qa heyapi; Wicaśtayatapi tuwe Itancan caje kin on u kin he yawaśtepi ce; maḣpiya ekta Wookiye, qa iyotan wankantu ekta wowitan un nunwe.

³⁹ Unkan Pharisee wicota en opapi qon apa heciyapi; Waonspekiye cin, waonspewicayakiye cin wicakiśica wo.

⁴⁰ Unkan waayupte c̣a hewicakiya; Dena inina unpi kinhan, inyan kin wancake howaye kta ce, eciciyapi ce.

⁴¹ Unkan wanna ikiyedan u, qa otonwe wanyake c̣ehan, aceye, c̣a heya;

⁴² Niye kin anpetu nitawa kin de en taku on wookiye duhe kte cin sdonyakiya unkanś: tuka wanna icimana iśta on wanyahdake kte śni.

⁴³ Anpetu kin hiyonihipi kta, tona tokaniyanpi kin nihdukśan maka qapi, qa okśan niyankapi kta qa ohomni ohinniyan anapte nanijinpi kta:

⁴⁴ Qa makata eḣpeniyanpi kta, nicinca en niunpi kin hena koya; qa inyan nonpa icitakihna wanke śni eḣpeniyanpi kta; anpetu en taku waśte nihiyohipi kin he sdonyakiye śni heon etanhan.

⁴⁵ Unkan tipi wakan kin en tin iyaye, c̣a tona ohna wiyopeyapi, qa wopetonpi qon, hena tankan eḣpewicaya;

⁴⁶ Qa hewicakiya; Tipi mitawa kin he wocekiye tipi, eya owapi qon; tuka niye owamanonpi kin heca yakagapi ce.

⁴⁷ Unkan anpetu iyohi tipi wakan kin ohna waonspekiya. Tuka wawayuśnapi itancanpi, qa wowapi kagapi, qa oyate kin en wicaśta ihdawapi kin, hena ṭeyapi kta akitapi;

⁴⁸ Tuka token econpi kta takudan iyeyapi śni; oyate kin owasin oie kin naḣonpi kta cinpi ece.