Lukas 18 - Dakota Wowapi Wakan Kin

¹ Unkan wicaśta kin ohinnian wocekiye eyapi kta, qa iyakicunnipi kte śni e on wiyacinpi wan owicakiyaka;

² Qa heya; Otonwe wan en wiyukcan wanji Wakantanka kokipe śni, qa nakun wicaśta wicakinihan śni.

³ Unkan otonwe kin he en wiwazica wan, he wiyukcan kin ekta hi qa, Makipajin kin he tomicic̣on ye, eya.

⁴ Unkan tokaheya econ wacin śni; tuka ocim cante mahen heya; Wakantanka kowakipe śni, qa nakun wicaśta kin wicawakinihan śni qeyaś;

⁵ Wiwazica kin de nagiyemaye cin on etanhan ito towecic̣on kta; okinni ohinni hecetu u kinhan wacin iyokiśinmaye kta naceca ce.

⁶ Unkan Itancan kin heya; Wiyukcan owotanna śni ie cin he naḣon po.

⁷ Unkan Wakantanka tona wicakaḣnige, c̣a anpetu hanyetu ko cekiyapi kin, hena tehan towicakicic̣on śni qeyaś, ocim econ kte śni he.

⁸ Ihnuhanna towicakicic̣on kta, eciciyapi ce. Tuka Wicaśta Cinhintku kin he tohan hi kinhan, maka akan wacinyanpi iyeye kta he.

⁹ Unkan apa iye oḣan owotanna ic̣idapi, qa tokan kin waḣtewicadapi śni kin, hena wiyacinpi kin de owicakiyaka.

¹⁰ Wicaśta nonpa tipi wakan kin ekta cekiya ipi; unma kin Pharisee heca, qa unma iś wamnayanpi kin heca.

¹¹ Unkan Pharisee kin iśnana najin, qa kaken wocekiye eya; Wakantanka, wicaśta tokeca iyemacece śni, wawicakipi sa, oḣan owotanpidan śni, wawiciḣaḣapi econpi sa, qa wamnaye cin dee kaeś iyemacece śni heon wopida eciciya.

¹² Anpetu wakan okitahedan nonpa akiḣanmic̣iye c̣a taku mduhe cin owasin etanhan iwikcemnamna kin wicawaqu ece.

¹³ Unkan wamnaye cin iś itehanyan inajin, qa iśta ee kaeś wankan maḣpiya kin ekta ikikcu śni; tuka maku kin ohna aic̣ipe, ca heya; Wakantanka onśimakida wo, wawaḣtani sa.

¹⁴ Wicaśta kin de yuowotanpidan tiyata kihda, qa unma qon hee śni, eciciyapi ce: Qa tuwe ihduwankantuya kinhan, he yuhukun iyeyapi kta: qa tuwe ihduhukuye cinhan, hee yuwankan ayapi kta ce.

¹⁵ Unkan hokśiyoqopa kin nakun wicayutan kta e en awicahipi tuka waonspewicakiye cin he wanyakapi qehan, wicakiśicapi.

¹⁶ Tuka Jesus wicakico, qa heya; Hoksiyoqopa kin ekta mahipi kte cin iyowinwicakiya po, qa teḣindapi śni po; Wakantanka tokiconze kin he hececapi etanhan ece.

¹⁷ Wowicake eciyatanhan heciciyapi; Tuwe hokśiyoqopa iyececa Wakantanka tokiconze kin icu śni kinhan, he tokadan en ope kte śni ce.

¹⁸ Unkan wicaśta ihdawa wanji wiwange c̣a heya; Waonspekiyo waśte, token ecamon, qa owihanke wanin wiconi ohimic̣iye kta he.

¹⁹ Unkan Jesus heciya; Tokeca e waśte emayakiya he; tuwedan waśte śni; Wakantanka hecedan waśte.

²⁰ Woahope kin hena onnispe; Wawiciḣaḣapi ecanon kte śni; Tin wicayakte kte śni; Wamayanon kte śni; Woitonśniyan wodake kte śni; Niyate ninun kici wicahduonihan wo.

²¹ Unkan heya; Macistina ehantanhan hena owasin ahowapa ce.

²² Unkan Jesus hena naḣon qehan heciya; Nahanḣin taku wanji iyotpani yaun; taku yaton kin owasin wiyopekiye c̣a waḣpanicapi kin wicakipamni wo, kinhan maḣpiya ekta woyuha duhe kta ce; hehan u qa mihakam un wo.

²³ Unkan he naḣon qehan nina iyokiśica; wijice ḣinca nakaeś.

²⁴ Unkan nina wacin iyokiśice cin he Jesus wanyake c̣ehan, heya; Wowijice tonpi kin hena Wakantanka tokiconze kin en yapi kte cin he teḣike ḣinca.

²⁵ Wicaśta wijica wan Wakantanka tokiconze kin en ye kte cin he teḣika, qa kamel heca wanji tahinśpaciqadan oḣdoka kin ohna ye kte cin hee kaeś aoptetu ce.

²⁶ Unkan tona he naḣonpi kin hena heyapi; Hehan tuwe ni kta he.

²⁷ Unkan heya; Wicaśta kin ekta taku econpica śni kin, he Wakantanka ekta econpica ece.

²⁸ Unkan Inyan heya; Iho, unkiś taku owasin untpaganpi, qa niyahna unyakonpi ce.

²⁹ Unkan hewicakiya; Awicakehan heciciyapi ce, Wicaśta kin tuwe ti kin, qa hunkakewicaye cin, qa hunkawanjitku, qa tawicu, qa cinca, hena wanji Wakantanka tokiconze kin on kpagan kinhan,

³⁰ Hee dehan nakaha taku sanpa ota yuhe kta, qa wiconi u kte cin he en wiconi owihanke wanica yuhe kta ce.

³¹ Unkan akenonpapi kin ewicayaku qa hewicakiya; Iho, Jerusalem ekta unyanpi, qa wicaśta wokcan Wicaśta Cinhintku kin on token owapi qon owasin yuecetupi kta.

³² Oyate tokeca napepi kin en wicaqupi kta; hecen iśtenyapi, qa wawicanksiya kuwapi, qa atagośapi kta;

³³ Qa kapsinpsintapi qa ṭeyapi kte; unkan anpetu iyamni kinhan kini kta ce, eya.

³⁴ Unkan ecaca okaḣnigapi śni, qa oie kin de anawicakiḣmanpi, qa taku oyakapi kin sdonyapi śni.

³⁵ Unkan Jeriko ikiyedan wanna u qehan, wicaśta waniśtagonge canku icahda wada yanka.

³⁶ Unkan wicota ahiyaye cin he naḣon qehan, he token kapi hecinhan he iwicawanga.

³⁷ Unkan, Jesus Nazareth etanhan kin he hiyaya ce, eya okiyakapi.

³⁸ Unkan hotankakiya heya; Jesus Dawid Cinhintku kin onśimakida wo.

³⁹ Unkan tokahanpi kin hena iyokipi śni, inina yanke kta; tuka heon iyotan, hotankakiya heya; Jesus Dawid Cinhintku kin onśimakida wo.

⁴⁰ Unkan Jesus inajin qa aupi kta kewicakiya. Unkan wanna kiyedan u qehan, wiwange c̣a,

⁴¹ Token ecacicon kta yacin he, eya. Unkan iye, Itancan, watonwe kta, eya.

⁴² Unkan Jesus heciya; Tonwan wo, wacinyaye cin he niniyan ce.

⁴³ Unkan wancake tonwe c̣a iyahna hiyu, qa Wakantanka yaonihan: unkan oyate kin he wanyakapi qehan, owasin Wakantanka yatanpi.