Lukas 16 - Dakota Wowapi Wakan Kin

¹ Hehan waonspewicakiye cin hewicakiya; Wicaśta wijica wanji waawanyake wan yuha; unkan he yuhe cin woyuha tawa yutakuni śni ce, keya okiyakapi.

² Hehan kico qa heciya; Taku eniciyapi kin de toketu he; waawandake cin ito ohdaka wo; wanna waawandake cin aduśtan kta ce.

³ Unkan waawanyake cin cante mahen heya; Token ecamon kta he; waawanmdake cin he mayuhe cin imicicu; maḣqapi kin owakitpani, qa timatayapi kin he imaśteca.

⁴ Taku ecamon kte cin he sdonwakiya, heon tohan waawanmdake cin he etanhan ḣeyata iyemayanpi kinhan, tipi kin en tin hiyumayanpi kta ce.

⁵ Unkan hecen yuhe cin tona ikicazopi qon owasin wicakico, qa tokaheya kin he heciya; Mayuhe cin tona nahaḣin yecu śni he.

⁶ Unkan, Wihdi iyutapi opawinge ce, eya. Unkan heciya; Koyaḣanna wowapi nitawa kin ehdaku, qa iyotanke, c̣a wikcemna zaptan e okiwa wo.

⁷ Unkan wanji tokeca hehan heciya; Qa niś tona nahaḣin yecu śni he. Unkan, Aguyapisu iyutapi opawinge ce, eya. Unkan heciya; Wowapi nitawa kin ehdaku, qa wikcemna śahdogan e okiwa wo.

⁸ Unkan yuhe cin waawanyake owotanna śni kin yaonihan, okiksamya econ kin heon etanhan: maka kin de cincapi kin iwicacage cin en iyoyanpa cinca kin isanpa ksapapi ece.

⁹ Unkan miś heciciyapi; Woyuha owotanna śni kin on tawaśitku icicaga po; hecen tohan niye onic̣ihipi śni kinhan, iye tipi owihśnke kte śni en tin hiyuniciyapi kta ce.

¹⁰ Tuwe taku iyotan cistinna on wicaka hecinhan, hee taku ota nakun on wicaka ece; qa tuwe taku iyotan cistinna kin on owotanna śni hecinhan, hee taku ota kin nakun on owotanna śni ece.

¹¹ Hecen woyuha owotanna śni kin he on wicayakapi śni ehantanhan, wicake cin he tuwe ecin yuheniciyapi kta he.

¹² Qa wicaśta tokeca taku tawa kin on wicayakapi śni ehantanhan, niye nitawapi kin hee tuwe ecin nic̣upi kta he.

¹³ Ookiye kin tuwedan yuhe cin nonpa en wowidagic̣iye kta okihi śni; wanji śicedake kta, qa unma iś waśtedake kta; qa iś wanji en iyaihdaśke kta, qa unma kin iś ekta ewacin kte śni. Wakantanka qa mammon napin en wowidagnic̣iyapi kta oyakihipi śni ce.

¹⁴ Unkan Pharisee kin wakonpi kin, hena owasin naḣonpi; qa wowiḣayapi.

¹⁵ Unkan hewicakiya; Wicaśta kin wicitokam ihdaowotanpidan kin he niyepi; tuka Wakantanka nicante ozepi kin he sdonniyanpi ce: ecaeś wicaśta ekta taku takudapi ḣince cin hee Wakantanka waḣteda śni ece.

¹⁶ Woope qa wicaśta wokcan kin hena Johannes hehanyan; tuka hetanhan Wakantanka tokiconze kin oyakapi ece, qa owasin en opapi kte ḣinca.

¹⁷ Maḣpiya maka ko tokan iyaye kte cin he aoptetu, qa woope oowa wanjidan kaeś yuecetupi kte śni kin hee teḣika ce.

¹⁸ Tuwe tawicu eḣpekiye c̣a wanji tokeca yuze cinhan, hee wawiciḣaḣapi econ ece: qa hihnaku eḣpeye ciqon he tuwe yuze cinhan he wawiciḣaḣapi econ ece.

¹⁹ Wicaśta wanji wijica, he wokoyake stan qa miniḣuha zimzipedan ece koyaka, qa anpetu otoiyohi wiyuśkinyan un.

²⁰ Nakun wicaśta waḣpanica wan Lazaros eciyapi, he tatiyopa kin en ahionpapi, tancan owancaya ḣdihdi;

²¹ Qa wicaśta wijica wahna wotapi tawa kin etanhan osnaśna hinḣpaye cin hena yunkiyapi kta cin. Tuka śunka kin en ahi, qa oḣdiḣdi kin śdipapi.

²² Unkan waḣpanica kin he ṭa; qa maḣpiya ohnihde kin Abraham maku kin ekta ayapi. Wicaśta wijica qon iś eya ṭa, qa ḣapi.

²³ Unkan wakanśica tipi kin en kakiś yanke c̣ehan, wankan etonwe, c̣a tehan tanhan Abraham wanyaka; qa maku kin ohna Lazaros yanka.

²⁴ Unkan heya niyan; Ate Abraham, onśimakida qa Lazaros u śi wo, napsukaza inkpa kin mini en oputkan qa ceji makasni kta; oide kin de ohna makakija ce.

²⁵ Tuka Abraham heya; Cinś, yani qon he ehan taku waśteśte yahduha, qa Lazaros taku śikśica yuha, he kiksuya wo; tuka nakaha iye kicanptapi qa niye kakiśniyanpi.

²⁶ Qa nakun unkiyotahedan kaksiza wan tanka yanka; hecen tona deciya tanhan niye ekta ye wacinpi keś okitpanipi ece; qa nakun heciya tanhan den ekta unhipi kta okitpanipi ece.

²⁷ Hehan heya; Heon ate, ceciciya ce, ate ti kin ekta ye yaśi kta;

²⁸ Misunka zaptan, hena wowicakiyake kta; iś eya okinni wokakije kin de en upi nun ce.

²⁹ Abraham heciya; Moses qa wicaśta wokcan kin hena yuhapi; hena iś anawicagoptanpi eśta śni.

³⁰ Tuka heya; Hiya, ate Abraham: tuka ṭapi kin eciyatonhan wanji ekta wicai unkanś, ihduecetupi kta tuka.

³¹ Unkan heciya; Moses qa wicaśta wokcan kin hena anawicagoptanpi śni ehantanhan, ṭapi kin eciyatanhan wanji kini qeyaś, nakun wicadapi kte śni ce, eya.