Lukas 15 - Dakota Wowapi Wakan Kin

¹ Unkan hehan wamnayanpi qa waḣtanipi sa, hena owasin naḣonpi kta e on en ahi.

² Unkan Pharisee kin wowapi kagapi ko ikapapi qa heyapi; Wicaśta kin de waḣtanipi sa iyowinwicakiye c̣a om wota ece.

³ Hehan wiyacinpi kin de owicakiyake c̣a heya;

⁴ Niyepi kin etanhan wicaśta wanji taḣinca wanunyanpi opawinge wicayuhe c̣a, wanjidan kitanin śni kinhan, wikcemna napkin wanka sanpa napcinwanka kin hena makotahedan en awicayuśtan, qa tanin śni qon he tohanyan iyeye śni hehanyan okide śni naceca he.

⁵ Qa tohan iyeye cinhan, wiyuśkinyan hiyete akan akionpa ece.

⁶ Qa wanna tiyata ki ec̣a, kodawicaye c̣a, ikiyedan tipi kin hena witaya wicakico, qa hewicakiya; Miciiyuśkin po, taḣinca wanunyanpi wan makitanin śni qon he wanna iyewakiya ce.

⁷ Heciciyapi ce; he iyececa, waḣtanipi sa wanjidan iyopeic̣iya eca, maḣpiya ekta wiyuśkinpi ece e kta, wicaśta owotanna qa woaḣtani on iyopeic̣iyapi kta iyececapi śni wikcemna napcinwanka sanpa napcinwanka on iyecen wiyuśkinpi kte śni.

⁸ Qa nakun winoḣinca tuwe kaśpapidan wikcemna yuhe, c̣a wanji togeḣpekiye cinhan, hecen petijanjan ideye, c̣a tipi kin kahinte, c̣a tohan iyekiye śni kin hehanyan okide śni naceca he.

⁹ Qa tohan wanna iyeye cinhan, kodawicaye cin, qa ikiyedan tipi kin hena witaya wicakico qa hewicakiya; Miciiyuśkin pe, kaśpapidan toki eḣpewakiye ciqon he wanna iyewakiya ce.

¹⁰ He iyececa waḣtanipi sa wanjidan iyopeic̣iya ec̣a, on Wakantanka taoḣnihde kin wicitokam wiyuśkinpi ece, eciciyapi ce.

¹¹ Unkan heya; Wicaśta wan cinhintku nonpa.

¹² Unkan hakakta kin he atkuku kin heciya; Ate, woyuha mitawa kte cin he micu wo. Unkan woyuha kin akipam wicaqu.

¹³ Unkan iyohakam anpetu tonana hehan cinhintku hakakta qon he taku owasin witaya tpahi, qa itehanyan makoce wan ekta icimani iyaya; qa hen śicaya oḣanyanpi kin on taku yuhe cin hdutakuni śni.

¹⁴ Unkan wanna owasin hdusote c̣ehan, makoce kin he en wicaakiḣan tanka icaga; hehan iye wicakiś un.

¹⁵ Qa makoce kin hen unpi kin wanji ekta ye c̣a kici yanka: unkan he kukuśe wo wicaqu kta e maga kin ekta ye śi.

¹⁶ Unkan omnica kukuśe yutapi kin hee etanhan wipiic̣iye wacin; tuka tuwedan takudan qu śni.

¹⁷ Unkan ic̣iksuye c̣ehan heya; Ookiye opetonpi heca aguyapi iynkic̣uya yuhapi kin tona ate wicayuha hwo; qa miye e wotektehdapi on atakuni śni amayan ce.

¹⁸ Ito nawajin qa ate ekta wahde kta, qa hewakiye kta; Ate, maḣpiya kin en, qa niye nakun nitokam wawaḣtani:

¹⁹ Qa detanhan cincamayaye kta iyemacece śni; wicaśta opewicayaton kin he iś wanji iyececa makaga wo, epe kta ce.

²⁰ Unkan najin hiyaye c̣a atkuku kin ekta hda. Tuka nahaḣin itehan atkuku wanhdake c̣a onśikida, qa ekta inyang ye c̣a, poskin hduze c̣a i itputaka.

²¹ Unkan cinhintku kin heciya; Ate, maḣpiya kin en qa niye nitokam wawaḣtani; qa detanhan cincamayaye kta iyemacece śni ce.

²² Tuka atkuku taokiye kin hewicakiya; Śina iyotan waśte kin he aupi qa inkiya po; qa mazanapeupe wan nape kin en iyekiya po, qa hanpa ohekiya po:

²³ Qa ptejicadan cemyapi kin he den aupi qa kte po; wauntapi qa unkiyuśkinpi kta ce:

²⁴ Micinkśi kin de ṭa, tuka kini; tanin śni, tuka iyeyapi ce, eya. Unkan hinnakaha wiyuśkinpi.

²⁵ Tuka cinhintku tokapa qon he magata un; unkan ti kiyedan ku hehan dowanpi qa wacipi naḣon.

²⁶ Unkan ookiye wanji kipan, qa token he kapi hecinhan he iwanga.

²⁷ Unkan heciya; Nisunka hdi; unkan ni un, qa zaniyan hdi kin on etanhan niyate ptejicadan cemyapi qon he kikte ce, eya.

²⁸ Unkan hecen śihda, qa tin kihde wacin śni: hehan atkuku kin tankan hiyu, qa cekiya.

²⁹ Unkan waayupte c̣a atkuku kin heciya; Wanyaka wo, wanna waniyetu ota ociciye c̣a tohinni nioie kawape śni; hececa eśta kodawicawaye cin om wimduśkin kta e tacincadan wan tohinni mayaqu śni.

³⁰ Tuka nicinkśi witkowinpi kin om woyuha nitawa kin temniciye cin de hdi ca, wancake ptejicadan cemyapi kin he yecicaṭa ce, eya.

³¹ Unkan heciya; Cinś, ohinniyan mici yaun, qa taku mitawa kin he iyuḣpa nitawa.

³² Nisunka kin de ṭa, unkan kini; tanin śni, unkan iyeyapi kin, on etanhan ito cante unwaśtepi, qa unkiyuśkinpi kte cin he hecetu ce.