Lukas 14 - Dakota Wowapi Wakan Kin

¹ Unkan Pharisee itancan wanji ti kin en anpetu wakan icunhan wote kta tin iyaya; unkan Pharisee kin awanyag kuwapi.

² Unkan iho, wicaśta wan dropsi ececa kin he itokam yanka.

³ Hehan Jesus waayupte c̣a, wicoope aiapi kin, qa Pharisee kin hena hewicakiya; Anpetu wakan icunhan waasniyanpi kte cin iyowinwicakiyapi he.

⁴ Tuka inina unpi. Hehan wicaśta qon eyaku, qa asniye, c̣a hdeśi;

⁵ Qa waayupte, c̣a hewicakiya; Niyepi kin wanji tatanka qa iś śonśonna yatonpi, qa anpetu wakan icunhan makoḣdoka wan ohinḣpaye cinhan, wancake hdicuyakiyapi śni naceca he.

⁶ Unkan hena on ayuptapi kta okitpanipi.

⁷ Unkan wicakicopi kin wiyacinpi wan owicakiyaka, oyanke tokapa ece kaḣnigapi kin he wanyake c̣ehan; qa hewicakiya;

⁸ Tuwe tohan kiciyuzapi kin ekta nicopi kinhan, oyanke tokapa kin en iyotanke śni wo; okinni nikapeya kinihanpi wanji kicopi kta;

⁹ Kinhan, sakim nicopi kin he u, qa, Wicaśta kin de kiyukan wo, eniciye cinhan, hehan hinakaha wowiśtenya oyanke hakakta kin hee ekta idotanke kta ce.

¹⁰ Tuka nicopi kinhan ye, c̣a oyanke hakakta kin en iyotanka wo; hecen nico kin he tohan u kinhan, Koda, wankan wapa ya wo, eniciye kta; hecen om wota idotanke cin hena niyuonihanpi kta.

¹¹ Tuwe kaśta ihduwankantu kinhan, hee yuhukun iyayeyapi kta ce; qa tuwe ihduhukuye cinhan, hee yuwankantuya ayapi ece e kta.

¹² Unkan hehan kico qon he heciya; tohan wiyotanhan wotapi, qa iś ḣtayetu wotapi yakage cinhan, kodawicayaye, c̣a nihunkawanji, qa takuwicayaye cin, qa nikiyedan wijinya unpi kin, hena wicakico śni wo; iś ake okinni nicopi, qa hecen nicicajujupi kta.

¹³ Tuka wotapi wan yakage cinhan, waḣpanicapi, qa huha ksawahanpi, qa huśtepi, qa iśtagongapi kin, hena wicakico wo;

¹⁴ Kinhan niyawaśtepi kta ce; hena nicicajujupi kta okitpanipi nakaeś, owotanpidan kinipi kte cin ekta nicicajujupi kta ce, eya.

¹⁵ Unkan opeya wota yankapi kin etanhan wanji hena hecen eya naḣon qehan, heciya; Wakankanka tokiconze kin en tuwe aguyapi yute kta hecinhan hee yawaśtepi ce.

¹⁶ Unkan hehan heciya; Wicaśta wan ḣtayetu wotapi wan tanka kage, c̣a wicota wicakico:

¹⁷ Qa wotapi kta wanna iyehantu, hehan taokiye wan wicakicopi qon hewicakiye kta ye śi; U po, wanna taku owasin wiyeya hiyeya ce.

¹⁸ Unkan owasin okonwanjidan ihdatokanpi. Tokaheya kin he heciya; Makoce onśpa opewaton, qa he wanhdag mde kta iyececa; ceciciya ce, micunni wo.

¹⁹ Unkan wanji tokeca heya; Tatanka tazaptan opewaton, qa iwicahdute mde kta; ceciciya ce, micunni wo.

²⁰ Unkan wanji tokeca heya; Winoḣinca wan mduza, hecen wau owakitpani ce.

²¹ Unkan hecen ookiye qon he ku, qa heyapi kin yuhe cin ecen okiyaka. Unkan hinakaha tipi tawa kin śihda, qa taokiye qon heciya; Koyaḣan wo, qa otonwe canku kin ekta ye, c̣a waḣpanicapi kin, huha ksawahanpi, huśtepi, iśtagongapi kin, hena den awicau wo, eya.

²² Unkan ookiye qon heya; Itancan kin, ehe cin he wanna ecen econpi, tuka nahaḣin okan ce, eya.

²³ Unkan Itancan kin ookiye qon heciya; Ocanku ḣince cin, qa maḣinatake ektakta ye, c̣a uwicakiya wo, hecen wati kin ojudan kta.

²⁴ Heciciya ce; Wicakicopi qon wanjidan kaeś wowahe cin etanhan onśpadan yutapi kte śni ce, eya.

²⁵ Unkan wicota ḣinca kioi yapi; hehan ihduhomni qa hewicakiya;

²⁶ Tuwe ekta mahi, qa atkuku, hunku, tawicu, cinca, sunkaku, tawinoḣtin kin, hena, qa iye ni kin heeś koya śicekida śni ehantanhan, waonspewicawakiye cin wanji ee kta okitpani ce.

²⁷ Qa tuwe kaśta cansusbeca kin kicin, qa miyahna u śni ehantanhan, waonspewicawakiye cin wanji ce kta okitpani ce.

²⁸ Niyepi kin wanji conkaśke yakagapi kta kecannipi ehantanhan, ito tokaheya idotankapi, qa yahduśtanpi kte cin iyena yatonpi hecinhan, he iyahdukcanpi śni he.

²⁹ Hecanonpi śni kinhan, okinni oahehde kin he wanna eyahnakapi, qa yahduśtanpi kte cin oyakitpanipi kinhan, tona wanyakapi kinhan owasin iniḣapi, qa heyapi kta;

³⁰ Wicaśta kin de taku kage kta, tuka hduśtan kta okihi śni ce.

³¹ Qa nakun wicaśtayatapi wan wicaśtayatapi tokeca azuye kte cinhan, ito tokaheya iyotanke, c̣a iye kektopawinge wikcemna wicayuhe cin hena on, tuwe kektopawinge wikcenma nonpa yuha takpe u kin he itkokipa okihi kta hecinhan, he ihdukcan śni naceca he.

³² Qa iś, unma kin hinaḣin itehan un, tuwe ekta ye śi, qa wokiyapi kida naceca.

³³ Iho, he iyecen niyepi kin tuwe taku yuhe cin owasin tpagan śni ehantanhan, waonspewicawakiye cin wanji ee kta okitpani ce.

³⁴ Miniskuya he waśte; tuka miniskuya woskuye kin en un śni ehantanhan, taku ecin on skuya kagapi kta he.

³⁵ Maga qa watuśekśeca paha kin unmana on waśte śni; tuka tankan eḣpeyapi ece. Tuwe noge winaḣon yukan hecinhan, naḣon kta ce.