Lukas 13 - Dakota Wowapi Wakan Kin

¹ Unkan hehan en opapi kin wanjikji, Pilate token Galile wicaśta heca we kin iye wośnapi tawapi kin kici icicahiye ciqon, he okiyakapi.

² Unkan Jesus waayupte c̣a hewicakiya; Galile wicaśta kin decen ecawicaonpi kin heon etanhan Galile wicaśta owasin isanpa hena waḣtanipi sa kecannipi he.

³ Hiya; tuka niye nihduecetupi śni ehantanhan, niś eya owasin iyecen nitakunipi kte śni, eciciyapi ce.

⁴ Qa is Siloam conkaśke akeśahdogan awicahinḣpaye, c̣a wicakte qon, wicaśta owasin Jerusalem en unpi qon henana iyotan wicoḣan śicapi, kecannipi he.

⁵ Hiya; tuka niye nihduecetupi śni ehantanhan, niś eya owasin iyecen nitakunipi kte śni, eciciyapi ce, eya.

⁶ Unkan wiyacinpi kin de nakun owicakiyaka; Wicaśta wan hastanhanka iyuwi maga tawa kin en suken can wanji oju; unkan en waskuyeca ode hi, tuka takudan iyeye śni.

⁷ Hehan hastanhanka iyuwi maga kicanye cin he heciya; Can kin de ekta omaka yarnni wanna waskuyeca ode wahi, tuka ongedan iyewaye śni ece; kawanka wo; tokeca ecin maka yuśagya han he.

⁸ Unkan waayupte, c̣a heciya; Itancan kin, omaka kin de nakun ayuśtan wo, ecen ohomni maka waqe, c̣a tacesdi en ewahnake kta;

⁹ Okinni waskuyeca icaḣye kta; tuka wanice cinhan, hinnakaha hehan yahdawanke kta ce.

¹⁰ Unkan anpetu wakan icunhan omniciye tipi wan ohna waonspewicakiya yanka:

¹¹ Unkan iho, winoḣinca wan waniyetu ake śahdogan hehanyan woniya waśake śni kin yuha, tancan kin wanna pako icu, qa tokadan ihduowotanna śni.

¹² Jesus he wanyaka, unkan kico qa heciya; Winoḣinca waniyazanke cin etanhan niciyuśkapi ce.

¹³ Hehan nape kin ahnaka, unkan wancake owotanna icu, qa Wakantanka yaonihan.

¹⁴ Unkan anpetu wakan icunhan Jesus waasniyan kin on etanhan omniciye tipi idake cin he canteptanyan; hecen waayupte, c̣a oyate kin hewicakiya; Wicaśta kin ḣtanipi kte cin anpetu śakpe yukan ce; hecen anpetu kin hena en u po, qa asniniyanpi kta ce; tuka anpetu wakan icunhan upi śni po, eya.

¹⁵ Unkan Itancan kin waayupte c̣a heciya; Wanaic̣iḣbe cin, niyepi otoiyohi, anpetu wakan, tatanka qa iś śonśonna nitawapi kin yakiduśkapi qa miniyatkekiya adapi śni he.

¹⁶ Unkan winoḣinca kin de Abraham cunwintkuwicaye cin wanji ee, Satan iho, waniyetu ake śahdogan hehanyan kaśka hnaka, he iś anpetu wakan icunhan kiyuśkapi kte śni iyececa he.

¹⁷ Unkan hena hecen eye c̣ehan, kipajinpi qon owasin iśtecapi; unkan wokitaninyan taku econ qon hena owasin on oyate owasin iyuśkinpi.

¹⁸ Hehan heya; Wakantanka tokiconze kin he taku iyececa he; qa taku e imdacin kta he.

¹⁹ Sinape sukaza wanji iyececa, he wicaśta wan icu, qa maga tawa kin en iyoḣpeya; unkan icage, c̣a can tanka aya; unkan maḣpiya okinyanpi kin adetka kin en iyahanpi ece.

²⁰ Unkan ake heya; Wakantanka tokiconze kin he taku e imdacin kta he.

²¹ On napoḣyapi kin he iyececa, he winoḣinca wan icu, qa wotpanpi wiyutapi yamni en anaḣman, hecen ocowasin napogan ce.

²² Unkan otonwe qa otonwe ciqadan iyaza ye c̣a, waonspekiya; qa Jerusalem etkiya ya.

²³ Unkan tuwe heciya; Itancan, niwicayapi kte cin hena tonananpidan he. Unkan hewicakiya;

²⁴ Tiyopa cistiyedan kin he ohna dapi kta nina akita po: wicota ohna yapi akitapi kta, tuka okihipi kte śni, eciciyapi ce.

²⁵ Tipi tawa kin tohan wanna najin hiyaye, c̣a tiyopa kin ecen ikikcu, qa itankan nayajinpi, qa tiyopa yakatotopi, qa; Itancan, Itancan, unkiciyuḣdoka miye, ehapi; qa iye waayupte c̣a, Tonitanhanpi kin sdonwaye śni ce, eniciyapi kta;

²⁶ Hehan niś hehapi kta; Nanke cin en wauntapi, qa waunyatkanpi ece; qa niś ocanku unkitawapi kin ohnahna waonspeyakiye ciqon.

²⁷ Tuka iye heye kta; Toni, tanhanpi kin sdonwaye śni, eciciyapi ce; woowotanna śni ecanonpi ece kin owasin mitantanhan iyaya po.

²⁸ Abraham, qa Isaak, qa Jakob, qa wicaśta wokcan owasin Wakantanka tokiconze kin en opapi tohan wandakapi, qa niyepi kin tankan iyayeniyanpi kinhan, wicaceya hihdakokokapi ko yuke kta.

²⁹ Wiyohiyanpata, wiyoḣpeyata, waziyata, itokaga, henakiya eciyatanhan au, qa Wakantanka tokiconze kin en iyotankapi kta ce.

³⁰ Unkan iho, ehake yakonpi kin hena tokaheyapi kta; qa tokaheyapi kin hena iś ehake yakonpi kta ce, eya.

³¹ Unkan anpetu kin he en Pharisee kin wanjikji ekta hipi qa heciyapi; Detanhan ye c̣a tokan iyaya wo; Herod nikte kta cin.

³² Unkan hewicakiya; Yapi qa śungidan kin he heciya po; Iho, anpetu kin de qa nakun heyakecinhan, wakan śica napewicawaye c̣a, wayazankapi kin asniwicawaye kta, qa anpetu iciyamni kinhan mayuśtanpi kta ce.

³³ Takomni anpetu kin de, qa heyakecinhan, nakun iyokihe kin he en mawani kta iyececa; ecaeś Jerusalem itankan wicaśta wokcan wanji ṭe kte pica śni.

³⁴ Jerusalem, Jerusalem, wicaśta wokcan kin hena wicayakte, qa niye ekta u wicaśipi qon hena inyan on wicayakininpi ece; eca ijehan anpaohotonna wan ḣupahu oḣdateya cinca wicatpahi ece kin he iyecen niye nicinca kin wicacicipahi kta, tuka yacinpi śni.

³⁵ Iho, yatipi kin otiwota eḣpeniciyapi: qa, Tohanyan tuwe Itancan caje on u kin he yawaśtepi nunwe, ehapi śni hehanyan wanmayadakapi kte śni, awicakehan eciciyapi ce.