Lukas 11 - Dakota Wowapi Wakan Kin

¹ Unkan tukten cekiya un, qa ayaśtan qehan waonspewicakiye cin wanji heciya; Itancan, wocekiye eya onspeunkiya po, Johannes waonspewicakiye cin onspewicakiye ciqon he iyececa.

² Unkan hewicakiya; Ceyakiyapi kinhan kaken eya po; Ateunyanpi maḣpiya ekta nanke cin, nicaje wakandapi nunwe: Nitokiconze kin u kte: Maḣpiya ekta nitawacin econpi kin he iyecen maka akan econpi nunwe.

³ Anpetu otoiyohi anpetu woyute unqu po.

⁴ Qa waunḣtanipi kin unkicicajuju miye, unkiś tona śicaya ecaunkiconpi wicunkicicajujupi kin he iyececa. Qa taku wawiyutanyan un kin en unkayapi śni po; tuka taku śice cin etanhan eunhdaku po.

⁵ Unkan hewicakiya; Niyepi kid wanji tuwe kodayayapi, qa hanye cokaya ekta yaipi, qa heyakiyapi; Koda, aguyapi yamni omaqu wo:

⁶ Mitakoda wanji icimani hi, tuka taku itokam ewahnake kta takudan mduhe śni ce.

⁷ Hehan iye timahen tanhan waayupte, c̣a heye kta; Nagiyemaye śni wo; tiyopa wanna natakapi, qa micinca om mahen imunka; hecen nawajin qa cic̣u kta owakitpani ce.

⁸ Heciciyapi; He kodaya on etanhan najin qa qu kte śni qeyaś, nina kitan kin heon etanhan, najin qa tona cin kinhan qu kta ce.

⁹ Nakun heciciyapi; Da po, kinhan nic̣upi kta; akita po, kinhan iyeyapi kta; katoto po, kinhan niciyuḣdokapi ece e kta.

¹⁰ Tuwe da eca he icu ece; qa tuwe akita eca he iyeya ece; qa tuwe katoto eca he kiciyuḣdokapi ece e kta.

¹¹ Cinca niyukanpi kin, wanji tukte cinhintku aguyapi kida kinhan, inyan wan qu kta he; qa iś hogan wan da kinhan, hogan on wamduśka wan qu kta he.

¹² Qa iś witka wanji da kinhan sinteḣda wan qu kta he.

¹³ Hecen niś niśicapi kin, nicincapi taku waśteśte wicayaqupi kte cin he onnispepi ehantanhan, iś iyotan maḣpiya Ateyayapi kin tona Woniya Wakan kidapi kinhan wicaqu kta ce, eya.

¹⁴ Hehan wakan śica wanji tankan iyayeya, unkan ia okitpani. Unkan wakan śice cin wanna tankan hinape c̣ehan, ia okitpani qon hehan ia; hecen oyate kin inihanpi.

¹⁵ Tuka apa heyapi; Beelzebub wakan śica itancan kin he eciyatanhan wakan śica napewicaya ece.

¹⁶ Qa apa toktokeca iś iyutanyanpi kta on maḣpiya eciyatanhan wowapetokeca kidapi.

¹⁷ Tuka tawacinpi kin sdonwicaye c̣a hewicakiya; Wokiconze kin tona iye iyakitedan kicipajinpi kin hena atakuni śni ece; qa tipi wanji iye ic̣ipajin kinhan he jujuwahan ece.

¹⁸ Qa Satan iś iye ic̣ipajin kinhan tokiconze kin he token ecin ecen he kta he. Beelzebub eciyatanhan wakan śica napewicawaya ece, kehapi kin heon etanhan.

¹⁹ Unkan miye Beelzebub eciyatanhan wakan śica napewicawaya ehantanhan, niye nicincapi kin hena tuwe eciyatanhan napewicayapi he; hecen iyepi kin niciyukcanpi kta.

²⁰ Tuka miye Wakantanka napsukaza on wakan śica napewicawaya ehantanhan, Wakantanka tokiconze kin awicakehan nihiyohipi ce.

²¹ Wicaśta wan waśake c̣a wipe ton ti awanhdake cinhan, hecen woyuha tawa kin tanyan hiyeya ece.

²² Tuka wanji ikapeya waśake cin he takpe hi, qa ktedan kinhan, tawipe wacinkiye ciqon he owasin ekiciyaku, hehan taku tawa qon pamni ece.

²³ Tuwe micica śni kin he makipajin; qa tuwe miciwapahi śni kin he wayumdeca ece.

²⁴ Woniya śapa kin wicaśta wan etanhan hinanpa eca makoce puze cin en ece un, qa oziic̣iye kta akita; tuka takudan iyeye śni kinhan, hehan heya; Wati etanhan wahinawape ciqon he ake ekta wahde kta ce.

²⁵ Unkan en hdi eca, wanna kahintapi qa ayuco yuśtanpi iyekiya ece.

²⁶ Hecen tokiya ye c̣a, woniya toktokeca iye kin isanpa wicaśtapiśni śakowin ewicayaku, qa hena en yapi, qa otipi: hecen wicaśta kin he otokahe kin isanpa oehake kin he śica ece.

²⁷ Unkan hena hecekcen eya icunhan, wicota kin etanhan winoḣinca wan ho wankan yeye c̣a heciya; Wicitpi etanhan inicage cin he, qa aze dazoke cin hena yawaśtepi ce.

²⁸ Tuka iye heya; Han, tuka tona Wakantanka oie kin naḣonpi, qa ecen econpi kin hena iś iyotan wicayawaśtepi ce.

²⁹ Unkan oyate kin wanna en himniciyapi qehan, hewicakiya; Wicoicage kin de śica; wowapetokeca akitapi, tuka wowapetokeca takudan wicaqupi kte śni; Jonas waayate ciqon wowapetokeca tawa kin heceedan.

³⁰ Ninewe oyate kin Jonas wowapetokeca yuhapi qon, he iyecen wicoicage kin de Wicaśta Cinhintku kin wowapetokeca yuhapi kta.

³¹ Woyaco kin ekta itokaga wicaśtayatapi winoḣinca qon he wicoicage kin de itkom nawicajin, qa wicayaco kta; he iye maka owihanke tanhan Solomon toksape kin naḣon hi; unkan iho, wanji Solomon isanpa tanka den un ce.

³² Woyaco kin ekta Ninewe wicaśta kin hena wicoicage kin de on inajinpi kta, qa yacopi kta; he iye Jonas wowicakiyake cin on iyopeic̣iyapi; unkan inyun, wanji Jonas isanpa tanka den un ce.

³³ Tuwedan petijanjan wan ideya eca naḣmana ehde śni, qa iś ohna wiyutapi kin iyahdapśinyan hnake śni; tuka petijanjan ihupa wan akan ehde ece; qa hecen tona en hipi kinhan ojanjan kin wanyakapi kte.

³⁴ Wicatancan iyoyanpa kin wiciśta kin hee: heon etanhan niiśta kin hecetu kinhan, nitancan kin iś eya iyoyanpa ojudan ece; tuka niiśta kin he śica eca, nitancan kin iś eya ocowasin otpaza ojudan ece.

³⁵ Hecen iyoyanpa en niun kin he otpaze kte śni e wakta wo.

³⁶ Heon nitancan kin ocowasin iyoyanpa ojudan, qa tuktedan otpaze śni ehantanhan, petijanjan wan yeḣya ide iyoyamniyan kin he iyecen ocowasin iyoyanpa ojudan kta ce.

³⁷ Unkan heya icunhan Pharisee wan kico: hecen en i, qa wote kta iyotanka.

³⁸ Unkan wote śni itokam ihdujaja śni kin he Pharisee qon wanyake c̣ehan, inihan.

³⁹ Unkan Itancan kin heciya; Niye Pharisee kin, miniyatkan wakśica ko akapatanhan duskapi ece; tuka mahen tanhan wawicakipi wicoḣan śica ko onijupidan ece.

⁴⁰ Winitkotkopike cin, akapatanhan un kin he tuwe kaga hecinhan, he iś mahen un kin nakun kage śni he.

⁴¹ Tuka taku duhapi kin etanhanhan wicaqu po; kinhan taku owasin niciskapi kta ece.

⁴² Tuka Pharisee kin niyepi woteḣi niciyankapi ece; ceyakata, wacanga, waḣpe waśtemna ko owasin etanhan iwikcemnamna wicayaqupi ece; tuka wicoḣan owotanna Wakantanka waśtedakapi ko, hena acayakśinpi ece; dena e is ecen ecanonpi kta, qa unma qon oyakaptapi kte śni tuka.

⁴³ Pharisee kin niyepi woteḣi niciyankapi ece; omniciye tipi kin en oyanke waśteśte kin hena waśteyadakapi ece, nakun wopeton tipi kin ekta yaonihanyan oniciyapi kin.

⁴⁴ Wowapi kagapi qa Pharisee, wanaic̣iḣmanpi kin, woteḣi niciyankapi ece; wicaśta hnakapi tanin śni hiyeye c̣a wicaśta kin sdonye śni amanipi kin henicecapi ece.

⁴⁵ Unkan hehan wicoope aiapi kin heca wanji waayupte, c̣a heciya; Waonspekiye cin, hecen eha eca, unkiś eya ienunyahdepi ece.

⁴⁶ Unkan heya; Wicoope aiapi kin niś eya wotehi niciyankapi ece; waqinpi qinpi teḣika wicaśta qinwicayakiyapi ece qa niyepi kin napsukaza wanjidan on waqinpi kin dutanpi kte śni.

⁴⁷ Woteḣi niciyankapi ece; wicaśta wokcan wicahnakapi kin hena niye yakagapi, qa niyatepi kin hena wicaktepi qon.

⁴⁸ Atewicayayapi oḣanyanpi qon iyowinwicayakiyapi e awicakehan nihduotaninpi; he iye hena wicaktepi e wicakapi, qa niye wicaśta hnakapi kin wicayecagapi ece.

⁴⁹ Heon iś eya Wakhntanka toksape kin heya; Waayatapi qa wahośiyapi heca ekta yewicawaśi kta ce; unkan apa wicaktepi, qa onśiya wicakuwapi kta;

⁵⁰ Hecen maka kagapi kin ehantanhan wicaśta wokcanpi we papsonpi kin he owasin wicoicage kin de iwicawangapi kta;

⁵¹ Abel we kin hetanhan, qa Zacariyas tipi wakan wahna wośnapi kin okitahedan awihnuni qon he we kin iyahdeya: Awicakehan heciciyapi, He wicoicage kin de etanhan iwicawangapi kta ce.

⁵² Niye wicoope aiapi kin woteḣi niciyankapi ece; niś wosdonye iyuḣdoka yutokan edakupi, qa niye ohna idadapi śni, qa tona ohna iyayapi kte cin hena anawicayaptapi ece.

⁵³ Unkan hepa hecekcen ewicakiya icunhan, wowapi kagapi qa Pharisee kin taku ota eyekiyapi kta e nina ḣin nagiyeyapi:

⁵⁴ Taku iyaonpapi kta akitapi, heon taku i kin etanhan inanpe kta on hmunkapi kta iyapepi.