Lukas 10 - Dakota Wowapi Wakan Kin

¹ Unkan taku kin hena iyohakam, Itancan kin toktokeca wikcemna śakowin cajewicayate, c̣a iye otonwe tona ekta ye kte cin, qa tokiya kaśta ekta ye kte cin, hena kohan ektakta nomnom yewicaśi.

² Qa hecen ewicakiya; Awicakehan woksapi kin tanka, tuka ḣtanipi kin e tonana ce; he on etanhan woksapi Itancan kin, he iye ḣtanipi kin beca woksapi kin en yewicaśi kte cin he icekiya po.

³ Ya po; iho, taḣincaska śunktokeca ehna unpi he iyecen ye ciśipi.

⁴ Mazaska opiye, qa wojuhadan, qa hanpa hena hduhapi śni po: qa tahepi wicaśta tuwedan okiyapi śni po.

⁵ Qa tukten tipi wan en tin idadapi kinhan, tokaheya, Wookiye tipi kin den un nunwe, eya po.

⁶ Unkan wookiye cinhintku kin en un kinhan wookiye nitawapi kin en iyahe kta: tuka hecece śni kinhan, ake en nihdipi kta.

⁷ Qa tipi kin he en ece un po, taku nic̣upi kin yuta qa yatkan dukanpi kta; tuwe ḣtani kin he wokajuju kicupi ece e kta: Tipi iyaza yapi śni po.

⁸ Qa tukten otonwe wanji en yaipi, qa iyowinniciyapi kinhan, taku nitokam enicihnakapi kin he ece yuta po.

⁹ Qa wayazanka en unpi kin hena asniwicaya po, qa, Wakantanka tokiconze kin he kiyedan nihiyohipi ce, ewicakiya po.

¹⁰ Qa tukte otonwe wanji en yaipi qa iyowinniciyapi śni kinhan, otonwe kin he canku kin en hdicupi qa heya po;

¹¹ Nitotonwepi watuśekśeca ountkapapi kin hee kaeś itkom unnicicatatapi ce; tuka Wakantanka tokiconze kin he kiyedan nihiyohipi kin sdonya po.

¹² Tuka heciciyapi ce, Anpetu kin he en otonwe kin he teḣiya un kte cin he Sodom aoptenya un kta ce, eya.

¹³ Korazin woteḣi niciyanka ce; Bethsaida woteḣi niciyanka ce; niyepi kin en wicoḣan tanka econpi kin hena Turos qa Sidon en econpi unkanś, wanakaja wahinske ojuha caḣota ahna en iyotanka iyopeic̣iyapi kta tuka.

¹⁴ Tuka wayacopi kin ekta niye teḣiya yaunpi kte cin he Turos Sidon kici aoptenya unpi kta.

¹⁵ Qa niye Kapernaum, yuwankan maḣpiya ekta aniyanpi kin, kuya wakanśica ti kin ekta iyaye niyanpi kta ce, eya.

¹⁶ Tuwe ananigoptanpi kin, he miye e anamagoptan; qa tuwe waḣtenidapi śni kin, he miye e waḣtemada śni; qa miś tuwe waḣtemada śni kin, he umaśi kin hee waḣteda śni ece, eya.

¹⁷ Unkan wikcemna śakowinpi qon wopidaya hdipi, qa heyapi; Itancan, nicaje kin eciyatanhan wakanśicapi kin iyepi kaeś anaungoptanpi ece.

¹⁸ Unkan hewicakiya; Maḣpiya kin eciyatanhan wakanhdi iyecen Satan hinḣpaya wanmdaka ce.

¹⁹ Iho, wowaśake cic̣upi, hecen warnduśka sinteḣda ko ayahanpi kta, qa toka token waśakapi esta isanpa yaunpi kta; hecen takudan ksuweniyanpi kte śni.

²⁰ Tuka wakan śice cin hena ananigoptanpi kin heon wiyuśkinpi śni po; tuka maḣpiya ekta caje oniwapi kin hee on wiyuśkin po, eya.

²¹ Unkan he ehan Jesus cante mahen iyuśkin, qa heya; Ate, maḣpiya maka ahna on Itancan, niye taku kin dena ksapapi, qa wayupikapi kin hena anawicayakiḣbe, c̣a hokśiyoqopa kin heca sdonyewicayakiye cin, he pidamayakiya ce; han, Ate; niye hecen iyonicipi kin heon etanhan.

²² Atewaye cin he taku owasin yuhemakiya; qa Cinhintkuyapi kin he tuwe kin tuwedan sdonye śni, Ateyapi kin heceyedan; qa Ateyapi kin iś tuwe kin, Cinhintkuyapi kin iye qa tona owicakiyake kte cin henana sdonyapi ece.

²³ Unkan waonspewicakiye cin ekta ihduhomni, qa naḣmana heya; Taku wandakapi kin hena wiciśta tona wanyakapi kin hena yawaśtepi ece.

²⁴ Qa heciciyapi; Waayatapi kin wicaśtayatapi ko ota taku wandakapi kin hena wanyag cinpi, tuka wanyakapi śni; qa taku nayaḣonpi kin he naḣon cinpi, tuka naḣonpi śni, eya.

²⁵ Unkan inyun, wicoope aiapi kin heca wanji najin hiyaye, c̣a wawiyutanye, c̣a heciya; Waonspekiye cin, token ecamon qa owihanke wanin wiconi ohimic̣iye kta he.

²⁶ Unkan heciya; Wicoope kin en token ewapi he; token dawa ece he.

²⁷ Unkan waayupte, c̣a heya; Itancan Wakantanka nitawa kin he nicante kin ocowasin, qa ninagi ocowasin, qa nitowaśake ocowasin, qa nitawacin ocowasin on waśteyadake kta; qa niye inihdacin kin he iyecen nikiyedan un kin waśteyadake kta ce.

²⁸ Unkan heciya; Tanyan waadupta; hecen econ wo, kinhan yani kta ce.

²⁹ Tuka iye ihdaowotanna wacin, qa Jesus heciya; Unkan mikiyedan un kin he tuwe he.

³⁰ Unkan Jesus ayupte c̣a heya; Wicaśta wan Jerusalem etanhan Jeriko ekta iyaya; qa wamanonpi sa awicakipa, hena tawokoyake kin kipi, qa apapi, qa ṭe icakiś eḣpeya kihdapi.

³¹ Unkan ehantudan wawayuśna wanji canku kin he ohna hiyaya; qa he wanyake c̣ehan iyoopta iyaya.

³² Unkan Lewite heca wanji iś eya ehan i qehan, atonwe c̣a iyoopta iyaya.

³³ Unkan Samariya wicaśta wanji icimani un, he wanke cin en hi; qa wanyake c̣ehan onśida;

³⁴ Qa en i, qa kaśujapi kin paḣte c̣a wihdi miniśa ko en okaśtan; hehan iye taśunke kin akan yankekiye c̣a, owote tipi wan en ahi, qa awanyaka.

³⁵ Unkan ihanḣanna iyoopta ye kta, hehan kaśpapidan nom ehdaku, qa tipi tawa kin qu, qa heciya; Tanyan yuha wo, qa dena sanpa tona on dusote cinhan, tohan waku kinhan cic̣u kta ce.

³⁶ Iho, hena yamnipi kin, wamanonpi sa awicakipe ciqon wanji tukte ikiyidan un idukcan he.

³⁷ Unkan, Wanji onśida qon hee ce, eya. Henan Jesus heciya; Ye c̣a, iyecen econ wo.

³⁸ Unkan hetanhan iyoopta iyayapi, hehan otonwe wan en i; unkan winoḣinca wan Martha eciyapi, he iye ti kin en kico.

³⁹ Unkan he tankaku kin, Mary eciyapi kin he Jesus siha kin en iyotanke c̣a, oie kin naḣon ece.

⁴⁰ Tuka Martha wicoḣan ota on token cante yuza tanin śni; heon en hi qa heya; Itancan, mitanka eḣpemaye c̣a miśnana taku ota ecamon ece kin niś ekta ewacanni śni he; heon etanhan omakiye kta keciya ye.

⁴¹ Tuka Jesus waayupte c̣a heciya; Martha, Martha, taku ota yakicanda wacanni, qa on nagiyenic̣iya ece:

⁴² Tuka taku wanjidan cinpic̣a; unkan Mary taku waśte kin he kaḣniga, he icimana kipi kte śni ce.