Kolosse 4 - Dakota Wowapi Wakan Kin

¹ Unkan, itancan yaunpi kin, tona wowidake wicaduhapi kin hena, taku owotanna qa iyecetu kin wicaqu po; maḣpiya ekta wanji Itancan yayapi yanke cin he sdonyayapi.

² Ohinniyan cekiya un po, qa he en wopida eya wakta po.

³ Qa unkiye on wocekiye unkeyeciyapi kta, Wakantanka iapi tiyopa wan unkiciyuḣdokapi kta, Messiya tawowiyukcan kin unkoyakapi kta, on makaśkapi kin hee:

⁴ Hecen on, taku token epe kte cin ecen mdaotanin kta.

⁵ Tona tankan unpi kin hena on ksamyahan mani po, qa anpetu kin opekiton po.

⁶ Ohinniyan iyaapi kin wowaonśida en un, qa miniskuya on skuyeyapi kta, hecen wicaśta otoiyohi token awicaduptapi kte cin sdonyayapi kta.

⁷ Tucikos hunkawanjin kiciyapi waśtedakapi, qa waawanhdake owotanna, mici Itancan taokiye kin hee token waun kin owasin oniciyakapi kta.

⁸ Heon etanhan niyepi kin ekta ye waśi, token yaunpi kin he sdonye c̣a, nicantepi kin iyuśkin niyanpi kta;

⁹ Qa ne kici Onesimos ye waśi, he hunkawanjin kiciyapi owotanna, qa waśte enitanhanpi kin. Heniyoza taku owasin den un kin oniciyakapi kta.

¹⁰ Aristarkoa kici mekaśkapi kin he nape niyuzapi, qa Markos Barnabas tonśkaku nakun. He iwahoniyanpi, niyepi ekta niipi kinhan ti mahen u śi po:

¹¹ Qa Jesus, he nakun Justus eciyapi kin; hena e bakiḣdayapi kin etanhanpi. Henana Wakantanka tokiconze kin en tawaśi wicawaye c̣a, hena iyuśkin mayanpi.

¹² Epaphras enitanhanpi kin, Messiya taokiye kin hee nape niyuzapi; he ohinniyan wocekiye en, niyepi on nina cekiya, Wakantanka tawacin kin owasin en, owotanna, qa ecedan nayajinpi kte cin heon.

¹³ Qa he omdaka, niyepi on, tona Laodikia ekta un, qa tona Hierapolis ekta un kin, hena koya on nina ḣtaniiciya.

¹⁴ Lukas, pejihuta wicaśta waśte kin, Demas kici, nape niyuzapi.

¹⁵ Hunkanwanjin kiciyapi Laodikia ekta unpi kin hena nape wicayuza po, qa Numphas, qa iye ti kin ohna okodakiciye kin he nakun.

¹⁶ Wowapi kin de niyepi ekta yawapi kinhan, okodakiciye Laodikia ekta un kin hena nakun yawa wicakiya po, qa niś niyepi kin wowapi Laodikia etanhan kin he nakun yawa po.

¹⁷ Qa Arcippos kaken eciya po, Nitoḣtani Itancan kin etanan iyacu qon he awakicin wo, yahduśtan kta ce.

¹⁸ Palos he miye, nape kiciyuzapi kin de minape kin on wakaga. Makaśkapi kin kiksuya po. Wowaonśida niyepi en nicipi un nunwe. Amen.