Kolosse 3 - Dakota Wowapi Wakan Kin

¹ Heon etanhan, Messiya kici piya inicagapi hecinhan, taku wankantuya Wakantanka etapa kin eciyatanhan, Messiya kiyotanke cin hen, un kin hena akita po.

² Taku wankan un kin hena awacin po, qa taku makata un kin hena awacinpi śni po.

³ Niṭapi, qa nitowiconi kin he Messiya kici, Wakantanka en naḣmanpi.

⁴ Tohan Mesaiya wiconi unkitawapi kin taninyan hiyu kinhan, hehan wowitan en, kici niyuotaninpi kta.

⁵ Heon etanhan, nihuhapi makata un kin hena kikte po: wiinaḣmanpi, waaśapapi, wawihnupi, tawacinśicapi, waicucupiktecin, he wakagapi ohodapi kin hee.

⁶ Hena on etanhan Wakantanka tocanniye kin woakta śni cincapi kin en awicau ece.

⁷ Ehanna hena ehna yanipi qehan, opeya mayanipi.

⁸ Tuka nakaha hena owasin ayuśtan po; wocanniye, wośihda, wocantiyahdepi, waakagapi, qa iapi śice cin niipi kin etanhan.

⁹ Ihnuhan oiyecitonpi śni kin; wicaśta tannike cin iye wicoḣan ko yahduśdokapi;

¹⁰ Qa wicaśta teca kin he wosdonye kin on yutecapi, waicaḣya ouncage kin eciyatanhan, he kodakapi.

¹¹ He en, Helenes, qa Juda wicaśta wanica; bakiḣdayapi qa bakiḣdayapi śni kin wanica; Ikcewicaśta qa Skuthes wicaśta kin wanica; wowidake un kin heca qa tawaiciyapi kin wanica, tuka Messiya he ocowasin, qa owasin en un.

¹² Heon etanhan, owotanna yaunpi qa waśtenidakapi kin, Wakantanka wicakaḣnige cin iyecen, wocantekiye koyaka po, qa wowaonśida, waḣanic̣idapi śni, wicowaḣbadan, qa wacintankapi kin hena ko.

¹³ Otoiyohi iyowinyeciciyapi, qa otoiyohi yecicajujupi kta, tuwe wicaśta tokeca on taku śihda kinhan, Messiya kin nicicajujupi kin he iyecen niś econ po.

¹⁴ Qa taku owasin akantanhan wocantekiye kic̣un po, he wicoowotanna iyakaśke cin ee.

¹⁵ Qa Wakantanka tawookiye kin nicantepi kin en waniconzapi nunwe, he en wicatancan wanjidan en nicopi kin pida un po.

¹⁶ Messiya oie kin wijinya en niunpi nunwe; woksape owasin on, Psalm, qa odowan, qa wakan dowanpi kin en, otoiyohi wahokonyeciciyapi, qa onspeyeciciyapi kta, qa nicantepi kin en wowaonśida yuha Itancan kin iyadowanpi kta.

¹⁷ Qa taku ecanonpi kinhan, wicoie qa wicoḣan kin unma tukte kaśta, Jesus Itancan kin caje on owasin econ po, qa on Wakantanka Ateyapi kin wopida eciya po.

¹⁸ Qa winoḣinca kin, nihihnapi kin wicihukuya un po, Itancan kin en hecetu kin he iyececa.

¹⁹ Wicaśta kin, nitawinpi kin waśte wicakida po, qa wicakigepi śni po.

²⁰ Śiceca kin, nihunkakepi kin taku owasin anawicakigoptan po, he Itancan kin iyokipi.

²¹ Qa ateyapi kin, nicincapi kin śihdawicayapi śni po, okinni wacin ibośakapi kte.

²² Wowidake yaunpi kin, tona wicaceḣpi eciyatanhan niyuhapi kin anawicakigoptan po; wicaśta iyokipiwicayapi kin iyecen, iśtapi kin itokam wawokiyapi kin hee śni, tuka nicantepi ocowasin on Wakantanka kokipa po.

²³ Qa taku ecanonpi kin owasin nicantepi kin eciyatanhan econ po, Itancan kin on etanhan, qa wicaśta kin on etanhan śni.

²⁴ Itancan kin etanhan woaiḣpeye iyunwin kin iyacupi kta he sdonyayapi; Messiya Itancan kin wowidake niyanpi nakaeś.

²⁵ Tuka tuwe śicaya econ kinhan, he eciyatanhan icu kta, qa wicaśta itohnake iwanyakapi kin wanica.