Kolosse 1 - Dakota Wowapi Wakan Kin

¹ Palos, Wakantanka tawacin kin eciyatanhan, Jesus Messiya yeśi qon he, qa Timotheos hunawanjin unyanpi kin kici,

² Kolosse ekta tona owotanna un, qa hunkawanjin kiciyapi Messiya wacinyanpi kin hena, wowapi cicagapi. Wowaonśida wookiye ko, Wakantanka Ate unyanpi, qa Jesus Messiya Itancan kin etanhan, niyepi kin en nicipi un nunwe.

³ Ohinniyan wocekiye unkeniciyapi, qa on Wakantanka Jesus Messiya Itancan unkiyapi Atkuku kin wopida unkekiciyapi.

⁴ Jesus Messiya wacinyayapi, qa tona owotanna un kin owasin waśte wicayadakapi kin he naunḣonpi;

⁵ Woape maḣpiya kin ekta enicihnakapi kin on, he ehanna wotanin waśte wicoie wicakapi kin en nayaḣonpi kin;

⁶ He en nihipi, maka kin owancaya iyaye cin he iyececa, qa waskuyeca aicaga, niyepi kin en nakun, anpetu kin en nayaḣonpi, qa awicakehan Wakantanka towaonśida iyacupi qon ehantanhan.

⁷ Epaphras unkitawaśipi waśte, qa niyepi on Messiya taokiye wicake cin he hena hecen onspeniciyapi;

⁸ Qa Woniya kin en wacanyakiyapi kin he nakun unkokiyakapi.

⁹ Heon anpetu kin he naunḣonpi; kin ehantanhan niyepi on cekiya unkayaśtanpi śni, qa woksape owasin, wookaḣnige ko en, iye tawacin sdonyapi kin on, onijupidan kte cin he unkidapi ece.

¹⁰ Hecen taku iyokipi kin owasin on, Itancan kin en tanyan mayanipi kta, wicoḣan waśte owasin en, waskuyeca icaḣyayapi, qa Wakantanka sdonyapi kin en sanpa inicagapi kta.

¹¹ Iye towitan wowaśake kin eciyatanhan, wicookihi kin owasin on waśagniyanpi kta, wadiwicatake cin owasin on etanhan, qa wacin tankapi, wiyuśkinpi kici:

¹² Qa Ateyapi kin wopida eyakiyapi kta, he iyoyanpa ekta tona owotanna un kin woaiḣpeye tawapi kte cin en ounpapi kta e iyehantu unyanpi:

¹³ He otpaza wowaśake kin etanhan unkiyuśpapi, qa iye Cinhintku waśte kidake cin tokiconze kin en ounye unkiyapi:

¹⁴ He en, iye we kin eciyatanhan, wopekitonpi unhapi, woḣtani kajujupi kin hee:

¹⁵ Wakantanka wanyagpica śni un kin ouncage kin hee, qa taku kagapi kin owasin en tokapa kin hee:

¹⁶ Iye eciyatanhan taku owasin kagapi, maḣpiya ekta un qa maka akan un kin hena, taku wanyakapi qa taku Wanyagpica śni, oiyotanke kin, wokiconze kin, wicogkanśkan kin, qa wicowaśake kin; taku owasin iye on icaḣyapi kin hena iye ic̣icaga:

¹⁷ Qa taku owasin itokatam un kin he iye, qa he on taku owasin ecen han:

¹⁸ Qa iye tancan kin okodakiciye kin hee, qa pa kin he iye, qa otokahe kin, wiconṭe etanhan tokaheya tonpi kin hee, hecen iye taku owasin en tokapa un kta.

¹⁹ Iye ohna taku ocowasin ounye kte cin he Atkuku kin iyokipi.

²⁰ Qa iye can susbeca we kin eciyatanhan wookiye kage c̣a, heon etanhan taku owasin iye kici okiciciye wicaye kta, taku maka akan un, qa taku maḣpiya ekta un kin hena, iye on.

²¹ Qa niś niyepi, ehanna oyate nitokecapi, qa nitawacinpi kin en toka kin henicapi, wicoḣan śice cin on, tuka nakaha he kici wokiyeniyan nicagapi;

²² Iye ceḣpi tancan kin en ṭe cin eciyatanhan, hecen iye itokam owotanna, qa waaśapapi śni qa takudan iyaonpepica śni, inajin niyanpi kta:

²³ Wacinyayapi kin en nayajinpi kinhan, sutaya yaunpi, qa ṭinsa nayajinpi, qa wotanin waśte woape nayaḣonpi kin etanhan nihinḣpayapi śni kinhan; he maḣpiya kin ihukuya wicaśta hiyeye cin owasin owicakiyakapi, qa he en Palos he miye ookiye makagapi:

²⁴ Nakaha niyepi kin on etanhan makakije cin neon imduśkin, qa Messiya wokakije tawa, taku miceḣpi kin en yuśtanpi śni kin hena iye tancan kin, okodakiciye kin hee, on weciyuśtan kta.

²⁵ He en ookiye makagapi, Wakantanka wokonze kin eciyatanhan, he niyepi on maqupi, Wakantanka oie kin mduecetu kte cin heon.

²⁶ Taku oyakapi śni kin, wicoicage qa wicoun ota kin ehantanhan anaḣmanpi kin, he nakaha tona owotanna iye tawa wicaye cin hena owicakiyaka.

²⁷ Ikcewicaśta kin ekta taku otanin śni kin de wowitan woyuha kin tinskokeca kin, he Wakantanka hena sdonye wicakiye kta, he niyepi kin en Messiya wowitan woape kin hee.

²⁸ He unkiye unyaotaninpi, wicaśta kin owasin wahokonwicunkiyapi qa wicaśta owasin onspewicunkiyapi ece, woksape owasin on; hecen Jesus Messiya en wicaśta otoiyohi owotanna inajin wicunkiyapi kta.

²⁹ Heon miś eya ḣtawani, iye oḣan kin miye en waśagya oḣanye cin he eciyatanhan inawahni.