Johannes 8 - Dakota Wowapi Wakan Kin

¹ Jesus Oliwe Paha kin ekta i.

² Qa ihanḣanna anpao hehan tipi wakan kin en ki, unkan oyate kin owasin en ahi; unkan en iyotanke c̣a wowicakiyaka.

³ Unkan wośna kagapi Pharisee ko winoḣinca wan naḣma ihduśaka e en kahipi, qa cokata ehdepi;

⁴ Qa heciyapi, Waonspekiye, winoḣinca kin de wawiciḣaḣapi econ wanka icunhan iyeyapi.

⁵ Unkan Moses, woope kin en, tona hececa kin inyan on wicakininpi kta, unkekiciyapi qon; tuka niś token ehe kta he.

⁶ Taku iyaonpapi kte cin he akitapi e heon etanhan he iyutanyan heciyapi. Tuka Jesus patuś inajin, qa nape on maka kin en owa.

⁷ Unkan kitanyan wiwangapi, hehan Jesus owotanna inajin, qa hewicakiya; Wanji tukte woaḣtani wanin yaunpi hecinhan, he tokaheya inyan on kinin kte.

⁸ Hehan ake patuś inajin qa ake maka kin en owa.

⁹ He naḣonpi, unkan iye tawacin on ihdacopi, heon wanjikjidan tankata kinanpapi, tokaheya wicaśta tanka unpi, qa ecen hakaktapi koya owasin; qa Jesus iśnana un eḣpeyapi, winoḣinca cokata hdepi qon he koya.

¹⁰ Unkan Jeans ihduowotanna, qa tuwedan wanyake śni, winoḣinca ecedan ecen najin, unkan heciya, Winoḣinca, wiyanionpapi qon owasin toki iyayapi he; tuwedan niyaeo śni he.

¹¹ Han, Itancan, tuwedan śni, eya. Miś eya ciyaco śni, hunktiya wo, tokata yeye cin icimana waḣtani śni wo, Jesus eciya.

¹² Hehan ake Jesus owicakiye c̣a heya; Oyate iyoyamwicaye cin he miye. Tuwe mihakam u kin he otpaza ehna mani kte śni, iyoyanpa wiconi hee tawa kta.

¹³ Hehan Pharisee kin heciyapi; Niye atayedan nihdaotanin, heon wadaotanin kin he wowicake śni.

¹⁴ Jesus waayupte c̣a hewicakiya; Miye atayedan mihdaotanin qeyaś mihdaotanin kin he wowicake; tokiya tanhan wahi kin he sdonwakiya, qa nakun tokiya mde kte cin he; qa niyepi kin tokiya tanhan wau, qa tokiya mde cin hena sdonyayapi śni.

¹⁵ Wicaceḣpi eciyatanhan wadacopi; tuka miye qe tuwedan mdaco śni.

¹⁶ Tuka nakun wamdaco kinhan, wamdaco kin he wowicake kta; miśnana waun śni, tuka Ateyapi u maśi kin he miciun ece.

¹⁷ Wicaśta nom waayataninpi kin he wowicake ce, woope duhapi kin en owapi qon.

¹⁸ Miye atayedan mihdaotanin, qa Ate u maśi kin he nakun mayaotanin.

¹⁹ Unkan, Niyate tukte e he, eciyapi. Jesus iś awicayupte, Sdonmayayapi śni, qa nakun Atewaye cin sdonyayapi śni: Miye kin sdonmayayapi unkanś, Ate iś nakun sdonyayapi kta tuka.

²⁰ Tipi wakan kin en mazaska opiye he cin he en, Jesus waonspewicakiya icunhan hena hewicakiya. Heca tuka tuwedan Jesus otan wacinpi śni, anpetu kin nahaḣin kicihi śni heon.

²¹ Hehan Jesus ake hewicakiya; Wahde kta, qa omayadepi ecen woaḣtani ehna niṭapi kta; qa tokiya wahde cin heciya dapi kta eśta oyakitpanipi kta.

²² Unkan Juda oyate kin heyapi; Iye ic̣ikte kta he. Tokiya mde cin heciya dapi oyakitpanipi kta ce, eye cin.

²³ Hehan iye hewicakiya; Niye kuya tanhan yaunpi; qa miye e wankan tanhan waun; maka kin detanhan yaunpi, tuka miye maka kin dematanhan śni.

²⁴ He etanhan wayaḣtanipi kin en niṭapi kta ce, eciciyapi. He miye kin wicayadapi śni kinhan wayaḣtanipi kin ehna niṭapi kta ce.

²⁵ Unkan, Tuwe niye he, eciyapi. Tokag ehan eciciyapi qon he dee, Jesus ewicakiya.

²⁶ Taku ota eciciyapi, qa ciyacopi kta e mduha; tuka tuwe u maśi kin he wowicake; qa taku emakiye cin owasin oyate kin owicawakiyaka ce.

²⁷ Iye Atkuku kin on hena hewicakiye cin he okaḣnigapi śni.

²⁸ Hehan Jesus hewicakiya; Tohan Wicaśta Cinhintku kin wankan eyahdepi kinhan, hehan he miye kin śdonyayapi kta, qa miye cinka takudan ecamon śni; tuka Ate taku onspemakiye cin hena ecedan ecen omdaka ece.

²⁹ Tuwe u maśi kin he mici un; Ate miśnana amahduśtan śni; taku iyokipi ecen ecamon ece, heon etanhan, eya.

³⁰ Hewicakiya icunhan wicota wanna wicadapi.

³¹ Heon Juda oyate kin etanhan tona Jesus wicadapi kin hena hewicakiya; Mioie kin ohinniyan oyapapi kinhan, awicakehan waonspewicawakiye cin he niyepi kta;

³² Kinhan wowicake kin sdonyayapi kta; qa wowicake kin he niciyuśkapi kta ce.

³³ Hehan ayuptapi; Abraham towicoun kin unketanhanpi, qa tohinni tuwedan wowidag unyanpi śni; hecen, Niciyuśkapi kta ce, ehe cin he token heha he.

³⁴ Jesus awicayupte; Wowicake, wowicake on heciciyapi, Tuwe woaḣtani econ kin he woaḣtani en wowidake un ece.

³⁵ Qa wowidake un kin he ohinniyan tipi kin ohna un śni ece; tuka Cinhintku kin hee ohinniyan timahen ounyan.

³⁶ Heon Cinhintkuyapi kin niciyuśkapi hecinhan, awicakehan tawanic̣iyapi kta.

³⁷ Abraham towicoun kin enitanhanpi sdonwaya; tuka ṭe mayayapi yacinpi, mioie kin en niunpi śni, heon etanhan.

³⁸ Taku Ate ekta wamdake cin hena omdaka ece; qa niś niyate ekta taku wandakapi kin hee ecen ecanonpi ece.

³⁹ Hehan ayuptapi qa heciyapi; Abraham he ateunyanpi kin ee. Unkan Jesus hewicakiya; Abraham cinca kin he niyepi unkanś, Abraham oḣanye cin he ecen ecanonpi kta tuka.

⁴⁰ Tuka nakaha ṭemayan ayakitapi, wicaśta wan wowicake Wakantanka eciyatanhan nawaḣon kin he ociciyakapi kin he miye tuka: Abraham e qe hecen econ śni qon.

⁴¹ Niyatepi oḣan kin hee eoen ecanonpi ece, eya. Hehan heciyapi; Tuwe cinca tanin śni kin heuncapi śni; ate unyanpi wanjidan unhapi, Wakantanka kin hee.

⁴² Heon Jesus hewicakiya; Wakantanka he ateyayapi unkanś waśte mayadakapi kta tuka; miye kin Wakantanka kin hetanhan wahinape c̣a wau; qa miye cinka wahi śni, iye kin u maśi.

⁴³ He tokeca e iwae cin eyakaḣnigapi śni he; mioie kin anagoptan wacannipi śni kin heon etanhan.

⁴⁴ Wakanśica ateyayapi kin henitanhanpi, qa niyatepi tawacin kin ecen ecanonpi yacinpi ece. He otokahe etanhan tinwicakte kin heca, qa wowicake kin en najin śni, wowicake takudan en un śni nakaeś. Tohan woitonśni oyaka eca, he iye cinka ohdaka ece; iye kin woitonśni sa, qa woitonśni atkuku kin hee.

⁴⁵ Tuka miye wowicake ecioiyapi kin, heon etanhan wicamayadapi śni.

⁴⁶ Niyepi kin wanji tukte he wawaḣtani e duwicakapi he. Qa wowicake epe cinhan, tokeca e ẇicamayadapi śni he.

⁴⁷ Tuwe Wakantanka etanhan kin he Wakantanka oie anagoptan. Niye Wakantanka anayagoptanpi śni ece, heon etanhan henitanhanpi śni.

⁴⁸ Hehan Juda oyate kin ayuptapi qa heciyapi; Samariya oyate henitanhan, qa Wakanśica niyuhnaśkinyan ce, unkeniciyapi qon he wicaunkapi ce.

⁴⁹ Jesus ayupte; Wakanśica mayuhnaśkinye śni; tuka Ate wahduwitan, qa niye wowiśtenmayayapi.

⁵⁰ Miye mitowitan awecite śni; tuka tuwe waakite c̣a wayaco yukan ce.

⁵¹ Wowicake, wowicake eciyatanhan heciciyapi, Tuwe mioie kin de yuhe cinhan, tohinni wiconṭe wanyake kte śni, eya.

⁵² Hehan Juda oyate kin heciyapi; Wakanśica niyuhnaśkinyan e dehan iyotan sdonunyanpi. Abraham hee kaeś ṭa, qa wokcanpi kin hena nakun ṭapi; tuka niye, Tuwe mioie yuhe cinhan tohinni wiconṭe ute kte śni ce, eha ce.

⁵³ Abraham ateunyanpi kin hee kaeś ṭe cin, niye e iniyotan he. Wokcanpi kin nakun heepi kaeś ṭapi; qa niye nituwe e nicic̣aga he, eyapi.

⁵⁴ Unkan Jesus waayupte; Miye cinka mihduonihan kinhan, mitowitan kin he taku kte śni; tuka Atewaye cin he mahduonihan ece; unkan he Wakantanka nitawapi, kehapi.

⁵⁵ Heca eśta tohinni sdonyayapi śni; tuka miye e sdonwakiya. Qa he sdonwaye śni ce, epe cinhan, miś eya niyepi iyecen iwaton kte śni; tuka miye sdonwaya, heon etanhan oie kin tanyan weciyuha.

⁵⁶ Abraham ateyayapi qȯn mitaanpetu kin wanyake kta cin ḣinca; unkan he wanyake c̣a iyuśkin ce, eya.

⁵⁷ Hehan Juda oyate kin heciyapi; Nahaḣin waniyetu wikcemna nizaptan śni, tuka Abraham wandaka he.

⁵⁸ Jesus hewicakiya; Wowicake, wowicake eciyatanhan heciciyapi; Abraham un qon he itokam wanna waun ce, eya.

⁵⁹ Hececa unkan inyan icupi, qa on kininpi kta; tuka Jesus naic̣iḣbe c̣a, tipi wakan etanhan wicehna tanhan tankata inanpe c̣a, etoopteya iyaya.