Johannes 7 - Dakota Wowapi Wakan Kin

¹ Hena iyohakam Jesus Galile en un; Juda oyate ṭe yapi kta akitapi heon Juda makoce en un wacin śni.

² Juda oyate woacakśin wośnapi ece kin he wanna kiyedan aya.

³ Heon etanhan iye sunkawicaye cin heciyapi; Detanhan ya wo, qa Juda makoce kin en un wo, hecen waonspewicayakiye cin nioḣan ecanon ece kin hena wanyakapi kta.

⁴ Tuwe ihdutanin cin kinhan, taku naḣmana econ śni ece. Dena ecanon kta hecinhan, iho oyate kin en ihdutanin wo.

⁵ Sunkawicaye cin iyepi nakun wicadapi śni.

⁶ Heon Jesus hewicakiya; Miye anpetu kin hinyanḣin iyemicihantu śni; tuka niye qe anpetu kin ohinniyan wiyeya nioiyankapi.

⁷ Oyate kin śicenidapi okihipi śni, tuka miye e śicemadapi; wicoḣan tawapi kin hena śica e mdaotanin ece kin heon etanhan.

⁸ Niye qe wośnapi kte cin ekta ya po. Miye qe nahaḣin anpetu iyemicihantu śni, heon wośnapi kin he ekta mde kte śni ce.

⁹ Hena hewicakiye c̣a hehan Galile en un.

¹⁰ Tuka sunkaku iyayapi kin iyohakam hehan, iś wośnapi kte cin ekta ya, taninyan ye śni, tuka naḣmana ya.

¹¹ Wośnapi kin icunhan Juda oyate odepi qa, Tokiya un he, eyapi.

¹² Qa oyate kin iapi ota on aiepi. Apa, He wicaśta waśte ce, eyapi: qa toktokeca iś, Hiya, oyate kin wicahnayan ce, eyapi.

¹³ Juda oyate kowicakipapi, heon etanhan tuwedan taku ataninyan eye śni.

¹⁴ Wośnapi kin cokaya hdoipi, unkan Jesus tipi wakan ohna inajin, qa wowicakiyaka.

¹⁵ Unkan Juda oyate kin inihanpi qa heyapi; Wicaśta kin de tokiya tanhan wowapi kin onspe he; tohinni onspekiyapi śni qon.

¹⁶ Unkan Jesus awicayupte c̣a heya; Wociciyakapi kin de miye etanhan śni, tuwe u maśi kin he iye etanhan.

¹⁷ Tuwe iye tawacin ecen econ wacin kinhan, woyakapi kin de Wakantanka eciyatanhan hecinhan, qa iś miye cinka hena epa hecinhan, sdonye kta.

¹⁸ Tuwe iye en oie ic̣iye cinhan he iye towitan okide ece; tuka tuwe iś, tuwe uśi kin he towitan okicide kinhan, he iye wowicake, qa wicowicaśtaśni takudan en un śni.

¹⁹ Moses woope kin nic̣upi śni he; tuka tuweden woope kin ecen ecanonpi śni; taku on ṭemayayapi kta e ayakitapi he.

²⁰ Oyate kin ayuptapi qa heyapi; Wakan śica niyuhnaśkinyan; tuwe e ṭeniyan akita he.

²¹ Hehan Jesus waayupte c̣a hewicakiya; Wicoḣan wanji ecamon, unkan owasin niyuśinyayapi.

²² Moses baḣdayapi wicoḣan kin nic̣upi; he Moses etanhan śni, tuka hunkakewicayapi kin etanhan; unkan anpetu wakan eca wicaśta wan bayeciḣdayapi ece.

²³ Hecen anpetu wakan eca wicaśta wan bakiciḣdayapi hecinhan, on Moses woope kage ciqon yujujupi kte śni; wicaśta wan anpetu wakan en ocowasin okiziwaye cin heon cantamayahdepi he.

²⁴ Wiyacinyan wayacopi śni po, wokonze e eciyatanhan wayaco po.

²⁵ Hehan Jerusalem etanhan wanjikji heyapi; Tuwe ṭeyan akitapi kin he dee śni he.

²⁶ Unkan iho, kagi śni ia tuka tuwedan taku eciye śni. Wicaśta itancanpi kin awicakehan Messiya kin he dee e sdonyapi he.

²⁷ Tuka wicaśta kin de tokiyatanhan u kin sdonunyanpi; tohan Messiya hi kinhan, tokiyatanhan u kin tuwedan sdonye kte śni, eyapi.

²⁸ Hehan Jesus tipi wakan kin ohna waonspekiya icunhan hotankakiya heya; Tuwe miye kin sdonmayayapi, qa tokiya tanhan wau kin he nakun: qa miye cinka wahi śni; tuka tuwe u maśi kin he wicaka, eqe sdonyayapi śni.

²⁹ Tuka miye he sdonwakiya, he iye etanhan wahi, qa u maśi kin hee.

³⁰ Unkan heon ṭinsa yuze wacinpi, tuka nahaḣin iyehantu śni kin heon tuwedan nape on yutanpi śni.

³¹ Unkan oyate kin etanhan wicota he iye kin wicadapi qa heyapi; Tohan Messiya hi kinhan, de taku wapetogya econ kin, he sam iyeya hecon kta he, eyapi.

³² Oyate kin iyakitedan hekiciyapi he Pharisee kin naḣonpi; unkan wośna kagapi Pharisee ko, yuzapi kta e on akicita ekta ye wicaśpi.

³³ Hehan Jesus hewicakiya; Ehake tokata cistiyedan ocipapi waun kta, hehan tuwe u maśi kinhan heciya wahde kta.

³⁴ Omayadepi kta, tuka iyemayayapi kte śni; qa tokiya waun kin ekta yaupi kta eśta, oyakitpanipi kta.

³⁵ Hehan Juda oyate kin iyakitedan hekiciyapi; Tokiya ye kta he, qa iyeunyanpi unkokihipi kte śni: Helenes oyate kin ehna enanakiya iyayapi kin ekta ye ca, Helenes wowicakiyake kta he.

³⁶ Omayadepi kta tuka iyemayayapi kte śni, qa tokiya waun in ekta yaupi kta eśta, oyakitpanipi kta ce, eye cin wicoie kin he toketu he eyapi.

³⁷ Wośnapi anpetu ehake qa tanka kin en, Jesus najin qa hotankakiya heya; Tuwe ipuza kinhan en mau qa mini yatke kta.

³⁸ Tuwe wicamada kinhan, wowapi wakan eye cin iyececa, iye tanmahen tanhan wiconi mini wakpadan kaduze kta ce.

³⁹ Tuka Woniya, tona iye wacinyanpi kin icupi kte cin hee on hecen eya: he ehan nahaḣin Woniya Wakan kin wicaqupi śni, nahaḣin Jesus wowitan ehan i śni.

⁴⁰ Oyate kin etanhan wicota wicoie kin de naḣonpi qehan, Awicakehan wicaśta wokcan kin he dee ce, eyapi.

⁴¹ Toktokeca iś, Messiya kin he dee ce, eyapi. Tuka apa iś, Messiya Galile etanhan u kta he, eyapi.

⁴² Dawid wicoicage tawa kin etanhan Messiya hinanpe kta, qa Bethlehem otonwe Dawid en un qon hetanhan u kta ce, wowapi wakan eye śni he.

⁴³ Hetanhan oyate kin akipam wacinkiyuzapi.

⁴⁴ Qa hunḣ yuze wacinpi, tuka tuwedan nape on yutan śni.

⁴⁵ Hehan akicita kin, wośna kagapi Pharisee ko ekta icicawin wicakipi; unkan, Tokeca e ayahipi śni he, ewicakiyapi.

⁴⁶ Akicita kin awicayuptapi; Wicaśta kin tuwedan tohinni wicaśta kin de iyecen oie ye śni ce, eyapi.

⁴⁷ Hehan Pharisee kin iś awicayuptapi, Niś nakun nihnayanpi he.

⁴⁸ Wicaśta itancanpi kin wanjikji qa Pharisee ko he wicadapi he.

⁴⁹ Tuka oyate kin de, woope yukcanpi śni kin hena waḣtepi śni ce, eyapi.

⁵⁰ Nikodemos hanyetu ehan Jesus yanke cin en i qon, he itancanpi kin wanji ee, hewicakiya;

⁵¹ Woope unkitawapi kin, wicaśta token eye cin naḣon śni, qa taku econ kin atayedan sdon ye śni itokam, yaco he.

⁵² Unkan ayuptapi qa heciyapi; Niś Galile henitanhan he: Wawiwange c̣a wanyaka wo; wicaśta wokcan tuwedan Galile etanhan u śni ce.

⁵³ Hehan otoiyohi iye tipi kin ekta kihdapi.