Johannes 4 - Dakota Wowapi Wakan Kin

¹ Jesus waonspewicakiya ota ic̣icage c̣a baptem wicaqu, Johannes econ qon sam iyeya, Pharisee kin hecen naḣonpi, he Itancan kin sdonya.

² Tuka Jesus iye atayedan baptem wicaqu śni, waonspewicakiye cin hena heconpi.

³ Hehan Juda makoce kin ayuśtan, qa Galile heciya ake ekta hda.

⁴ Qa Samariya he en acankuye kta iyececu.

⁵ Hecen otonwe wan Sukar eciyapi Samariya makoce en, Joseph en ounye kta e Jakob atkuku qu qon he ikiyedan, he ekta hi.

⁶ Jakob miniyowe town kin he etu; Jesus mdokite hda, qa miniyowe kin he ahankeya iyotanka. Anpetu kin he en wiyotanhe cin hehantu.

⁷ Samariya oyate etanhan winoḣinca wan mini huwe hi; unkan Jesus, Mini maqu wo, eciya.

⁸ He icunhan waonspewicakiye cin otonwe kin ekta taku yutapi opeton iyayapi.

⁹ Winoḣinca Samariya oyate etanhan qon hecen eya, Juda wicaśta kin henica, Samariya oyate kin hematanhan, he tokeca e mini mayakida he. Juda oyate Samariya oyate kici takudan ikicitukapi wanice ciqon.

¹⁰ Jesus ayupte c̣a heciya; Wakantanka taku wicaqu kin he, qa, Mini maqu wo, eniciye cin he time kin sdonyaya unkanś, niye yakida kta, kinhan mini wiconi kin nic̣u kta tuka ce.

¹¹ Itancan, mini kin de temahentuya hiyeya qa takudan on edaku kte śni; tokiya tanhan mini wiconi kin duha he, winoḣinca kin eciya.

¹² Jakob ateunyanpi miniyowe kin de unqupi, qa etanhan iye mini yatkan, qa cinca qa tawanunyanpi ko, he hecon tuka niye iniyotan he.

¹³ Unkan Jesus ayupte ca heciya; Tuwe mini kin de etanhan yatke cin nakun ipuza kta;

¹⁴ Qa tuwe mini waqu kte cin etanhan yatke cin icimana ipuza kte śni. Tuka mini waqu kte cin he owihanke wanin wiconi iyahdeya kaduze kta, eya.

¹⁵ Unkan winoḣinca kin heciya; Itancan, mini kin he etanhan maqu ye, hecen imapuza kte śni, qa nakun icimana mini kin de huwe wahi kte śni, eya.

¹⁶ Unkan, Nihihna kico ya wo, qa den kici hi wo, Jesus eciya

¹⁷ Tuka winoḣinca kin waayupte c̣a heciya; Mihihna kin wanica ce. Nihihna wanica kehe cin he hecetu e ecen eha ce;

¹⁸ Nihihna zaptan, tuka nakaha hihnayaye cin de nitawa śni; hecen ehe cin he wicayaka ce, Jesus eciya.

¹⁹ Hehan winoḣinca kin heciya; Itancan, wicaśta wokcan kin henica imdukcan;

²⁰ Hunkake wicunyanpi paha kin de en ohodapi ece; tuka niye, Jerusalem he en wicaśta ohodapi ece e kta, kehapi ce.

²¹ Unkan Jesus heciya; Winoḣinca, wicamada wo, anpetu wan u ce, paha kin de en, qa Jerusalem nakun en, Ateyapi kin ohoyadapi kte śni.

²² Niye taku ohoyadapi kin sdonyayapi śni; unkiye taku ohoundapi kin sdonunyanpi ece. Juda oyate kin eciyatanhan wanikiyapi kin u ce.

²³ Tuka anpetu u kin he wanna hiyohi, tona wowicake eciyatanhan ohodapi kin hena woksape wowicake eciyatanhan Ateyapi kin ohodapi kta. Ateyapi kin he tona hecen ohodapi kte cin akita ece.

²⁴ Woksape kin he Wakantanka kin ee; qa tona ohoda kinhan hena woksape wowicake eciyatanhan ohoda kta.

²⁵ Hehan winoḣinca kin heciya; Messiya Sdayapi eyapi kin hi kta, tohan hi kinhan taku kin owasin unkokiyakapi kta e sdonwaya.

²⁶ He miye e ociciya ce, Jesus eciya.

²⁷ He icunhan waonspewicakiye cin en hdipi, qa winoḣinca kin kici okiciciya un kin heon yuśinyayapi. Tuka wanjidun; Taku ayakita he; qa, Tokeca kici iyaa he, eyapi śni.

²⁸ Hehan winoḣinca kin wakiśkokpa eḣpeya kihde c̣a, otonwe kin ekta ki, qa wicaśta kin hewicakiya;

²⁹ Wicaśta wan taku ecamon qon owasin omiciyake cin he ito wanyagu miye. He Messiya kin ee śni he.

³⁰ Hehan otonwe kin etanhan enanpa, qa yanke cin en ai.

³¹ He icunhan waonspewicakiye cin cekiyapi qa, Itancan, wota wo, eciyapi.

³² Tuka iye hewicakiya; Taku yutapi sdonyayapi śni kin heca wate kta e mduha ce.

³³ Heon, Tuwe taku yutapi kahi he, wonspewicakiye cin ekiciyapi.

³⁴ Tuka Jesus hewicakiya; Tuwe u maśi kin he tawacin kin ecen ecamon kta, qa iye toḣan kin weciyuśtan kte cin he taku wate cin ee.

³⁵ Ehake wi topa kinhan taku mnaunyanpi kta ce, ehapi. Tuka miś kaken eciciyapi; Wankan etonwanpi qa maga kin wanyaka po, wanna owasin ska qa mnayanpi kin wanna iyehantu.

³⁶ Qa tuwe taku mnaye cin he wokajuju icu ece, qa owihanke wanin wiconi waskuyeca mnayan ece; hecen on tona woju, qa tona mnaye cin napin wiyuśkinpi kta.

³⁷ Wanji woju qa wanji mnayan, eyapi qon dee e wicakapi.

³⁸ Niye ḣtayanipi śni tuka wamnayanpi he econ ciśipi. Wicaśta tokeca ḣtanipi unkan he ḣtanipi kin en niye oyapapi.

³⁹ Winoḣinca kin, Token ecamon qon owasin omiciyaka ce, eye ciqon heon wicaśta Samariya oyate otonwe kin he en ota Messiya hee kin wicadapi.

⁴⁰ Heon Samariya oyate Jesus en hipi qa cekiyapi, iye tipi kin en un śipi. Unkan nonpa can hen un.

⁴¹ Unkan ia naḣonpi kin hehan wicota wicadapi.

⁴² Qa, Taku odake cin he etanhan wicaundapi kin hee śni, unkiś eya naunḣonpi, Messiya hee qa oyate wanikiye kte cin hee e sdonunyanpi, winoḣinca kin eciyapi.

⁴³ Anpetu nonpa iyohakam hehan hetanhan ye c̣a Galile heciya hda.

⁴⁴ Jesus iye atayedan hdaotanin, wicasta wokcan kin heca iye tamakoce kin en yuonihanpi śni ece.

⁴⁵ Unkan Galile ekta ki, hehan Galile wicaśta kin iyowinkiyapi, Jerusalem ekta wośnapi kin icunhan taku econ qon owasin wanyakapi kin heon etanhan; iś eya wośnapi kin ekta ipi nakaeś.

⁴⁶ Unkan Galile en Kana otonwe kin, mini ikceka miniśa icaḣye ciqon he ake en hdi. Unkan Kapernaum ekta wicaśta itancan wanji cinhintku wayazanka:

⁴⁷ He Jesus Juda makoce kin hetanhan Galile en hi, naḣon kin heon ekta ye c̣a cekiya, cinhintku kin asniye kta e ekta u kta; wanna te kta ikiyedan.

⁴⁸ Hehan Jesus heciya; Taku wowanyake wowapetokeca ko wandakapi śni keś wicayadapi kte śni ce.

⁴⁹ Unkan wicaśta itancan kin heciya; Itancan, micinkśi ṭe śni itokam kun u wo.

⁵⁰ Tuka Jesus heciya; Hunktiya wo, nicinkśi ni ce. Unkan wicaśta kin Jesus ie cin wicada, qa ekta hda.

⁵¹ Tiyatakiya hda, unkan wicaśta wowidake wicayuhe cin awicakipa, unkan, Nicinkśi kin ni ce, eya okiciyakapi.

⁵² Wi kin tohan yanka hehan asni aya he, eya iwicawanga. Unkan, Ḣtanihan wiyotanhan kitanna inaśdoka, hetanhan tancan kata ayuśtan ce, eyapi.

⁵³ Unkan atkuku kim tohan Jesus, Nicinkśi ni ce, eciye ciqon hehantu e kiksuya. Unkan iye qa tiyohnaka tawa koya wicadapi.

⁵⁴ Jesus Juda makoce etanhan Galile icicawin en hdi, wowapetokeca econ kin icinonpa kin he dee