Johannes 21 - Dakota Wowapi Wakan Kin

¹ Hena iyohakam Jesus ake waonspewicakiye cin en ihdutanin, Tiherias mde kip etu; unkan ihdutanin kin he kaketu:

² Simon Inyan, qa Thomas Didumos eciyapi, qa Nathanael, Kana Galile makoce kin hetanhan, qa Zehedee cinhintku napin, qa waonspewicakiye cin tokeca nonpa, hena witayapi etu.

³ Ho wakuwa kta ce, Simon Inyan ewicakiya. Niyahna unyanpi kta ce, eciyapi. Hecenna yapi, qa wata wan en opapi, tuka hanyetu kin he takudan ktepi śni.

⁴ Ihanḣanna qehan wicihuta ekta Jesus najin; tuka waonspewicakiye cin Jesus hee kin sdonyapi śni.

⁵ Unkan Jesus hewicakiya, Hokśiyopa, taku yutapi duhapi he. Unkan, Hiya, eyapi.

⁶ Unkan hewicakiya; Ho kin he wata etapa kin eciyatanhan eḣpeya po, etanhan iyeyayapi kta ce. Unkan ecen iyoḣpeyapi, tuka ehaeś hogan kin ota kin heon ehdakupi okitpanipi.

⁷ Hehan waonspekiyapi wan Jesus waśtedake ciqon he Inyan heciya; Itancan kin hee ce. Simon Inyan, Itancan kin hee, eya naḣon qehan, tancodan un kin heon onḣdoḣda kic̣un qa minin eḣpeic̣iya.

⁸ Unkan waonspewicakiye cin unmapi kin wata cistinna wan ohna upi, huta kin icannan yakonpi, wiciśpa opawinge nom hehanyan, qa ho kin hogan ojudan akupi.

⁹ Wanna hutata kihunnipi, hehan petaga itkon wanyakapi, qa hogan aguyapi ko akan yanka.

¹⁰ Unkan Jesus hewicakiya, Hogan nakaha iyacupi kin etanhan aku po.

¹¹ Simon Inyan ekta ye c̣a ho kin ḣeyata hiyuya, hogan tankinyanyan ece opawinge qa sanpa wikcemna zaptan qa sam yamni; hogan kin ota ho kin ohnaka tuka iyuḣdece śni.

¹² Upi qa de yuta po, Jesua ewicakiya. Unkan waonspewicakiye cin etanhan, Tuwe niye he, eyapi kta tuka tuwedan tawaṭenye śni; Itancan hee kin he sdonyapi kin he etanhan.

¹³ Henan Jesus en ye c̣a aguyapi icu, qa wicaqu, hogan nakun iyecen econ.

¹⁴ Piya ekicetu kin etanhan, de iyamni Jesus waonspewicakiye cin en ihdutanin.

¹⁵ Unkan wotapi ayaśtanpi, hehan Jesus Simon Inyan heciya; Simon Jona cinhintku, dena eqe sam iyeya waśte mayadaka he. Han, Itancan, waśte cidaka e sdonyakiye ciqon, eya. Taḣincadan mitawa kin taku yutapi wicaqu wo, eciya.

¹⁶ Ake icinonpa, Simon Jona cinhintku waśte mayadaka he, eciya. Han, Itancan, waśte cidaka e sdonyakiya, eya. Taḣinca mitawa kin wo wicaqu wo, eciya.

¹⁷ Ake iciyamni, Simon Jona cinhintku waśte mayadaka he, eciya. Yamni akihde, Waśte mayadaka he, eya iwange cin heon Inyan iyokiśica; unkan heciya, Itancan, taku owasin sdonyaya; waśtecidake cin he sdonyaya. Hehan Jesus, Taḣinca mitawa kin wo wicaqu wo, eciya.

¹⁸ Wowicake, wowicake on heciciya; Koniśka qehan niye cinka ipiyag yeton qa tokiya yacin eca ekta da ece, tuka tohan winicaḣinca kinhan wicaśta tokeca wan ekta nape yeyakiye kta, kinhan ipiyag nicaton qa tokiya yacin śni eśta ekta aniye kta ce, eya.

¹⁹ Wiconṭe tukte e on Wakantanka yutan kta e he kiciyaotanin kta heon hecen eya. Hecen eye cin hehan, Miyahna u wo, eciya.

²⁰ Hehan Inyan hakikta, qa waonspekiyapi wan Jesus iyotan kidake ciqon hee wicihektam u e wanyaka, ḣtayetu wotapi icunhan maku kin ipahin wanke c̣a, Itancan, tuwe e wiyopeniye kta he, eye ciqon hee.

²¹ Inyan he wanyaka unkan Jesus heciya, Itancan, de iś taku e akipe kta he.

²² Ake tohan wahi kte cin hehanyan decen un kta wacin eśta, he etanhan initokeca he; niye miyahna u wo, Jesus eciya.

²³ Heon etanhan wicoie kin de hunkawanjinkiciyapi kin wicehna iyaya; waonspekiyapi kin de te kte śni, eyapi kin. Tuka Jesus, He te kte śni ce, eciye śni; tuka, Wahi kte cin hehanyan decen un kta, wacin eśta, he etanhan initokeca he.

²⁴ Taku kin hena waonspekiyapi kin he yaotanin qa wowapi en kaga; qa taku yaotanin kin he wowicake kin e sdonunyanpi.

²⁵ Nakun taku ota Jesus econ, tuka nakun hena owasin otoiyohi kagapi eśta, oyate hiyeye cin wowapi kagapi kte cin he yuhapi kta epce śni. Amen.