Johannes 20 - Dakota Wowapi Wakan Kin

¹ Anpetu wakan kin en, anpetu tokaheya hanḣanna ḣinca, nahanḣin otpaza, hehan Mary Magdalene hnakapi qon ekta i, qa inyan kin hnakapi etanhan icunonpa iyeyapi e wanyaka.

² Hehan inyang hde c̣a Simon Inyan hee, qa waonspewicakiye cin unma Jesus waśtekidake ciqon, hena en hi qa hewicakiya; Itancan kin hnakapi kin etanhan eyakupi, qa tukten hnakapi kin sdonunyanpi śni ye.

³ Unkan Inyan waonspewicakiye cin unma qon kici tankan inanpapi, qa en hnakapi qon ekta yapi.

⁴ Napin inyang yapi; qa waonspewicakiye cin unma qon hee duzahe c̣a Inyan kapa, qa iye tokaheya ehan i;

⁵ Patuś inajin, qa hnakapi kin aokasin, miniḣuha ecedan wanynka, tuka mahen iyaye śni.

⁶ Hehan iś Simon Inyan iyohi, unkan katinyan mahen iyaya, miniḣuha ecedan makata yanka wanyaka.

⁷ Miniḣuha pa akan ehnakapi kin he, miniḣuha umanpi qon en ope śni, he iś aiyog pehan yanka.

⁸ Hehan waonspewicakiye cin unma tokaheya hi qon he iś hnakapi kin mahen iyaya, qa iś eya wanyake c̣a wicada.

⁹ He wiconṭe etanhan ekicetu kta, eyapi, wowapi en kagapi qon he hinyaḣin tanyan sdonyapi śni.

¹⁰ Hehan waonspewicakiye cin hena iye tipi ekta icicawin hdapi.

¹¹ Tuka hnakapi kin itankan Mary e ecen najin, qa ceya. Unkan ceyaya patuś inajin, qa hnakapi kin en aokasin.

¹² Qa maḣpiya ohnihde nom wokoyake ska ece koyakapi kin hena wanwicayaka, Jesus tancan wanke ciqon itan anokatanhan, unma pa wanke ciqon eciyatanhan, qa unma iś siha qon eciyatanhan yukanpi.

¹³ Unkan, Winoḣinca, taku on yaceya he, eciyapi. Unkan iś, Itancan mitawa tancan kin icupi, qa toki ehnakapi kin sdonwaye śni ce, ewicakiya.

¹⁴ Heye c̣a hehan ihdamna unkan Jesus en najin wanyaka, tuka Jesus hee kin sdonye śni.

¹⁵ Unkan Jesus heciya, Winoḣinca taku on yaceya he; tuwe ayakita he. Unkan iś he wakicanye hee kecin, qa heon, Itancan, he niye iyacu hecinhan tokiya eyahnake cin omakiyaka ye, kinhan ewehdaku kta ce, eciya.

¹⁶ Unkan Jesus heciya, Mary. Unkan iye ihdamna, qa, Rabboni, eciya; he Waonspekiye eyapi.

¹⁷ Unkan Jesus heciya; Ihnuhan omayadutan kin; nahanḣin Ate ekta wahde śni ce. Tuka mihunkawanji ekta wicaye c̣a hewicakiya wo, Ate ekta wahde kta, he ate yayapi kin ee, he Wakantanka mitawa kin ee, qa niś he Wakantanka nitawapi kin ee ce, eya.

¹⁸ Hehan Mary Magdalene ku qa, Itancan kin wanhdake c̣a hena hecen eciye cin, waonspewicakiye cin owicakiyaka.

¹⁹ Anpetu kin he anpetu tokaheya kin ee, ihtayetu kin he en waonspewicakiye cin, Juda oyate kowicakipa, qa aonaic̣itag yukanpi, en Jesus wicacokaya inajin, qa, Wookiye nicipi un kte, ewicakiya.

²⁰ Hecen eye c̣a hehan nape cuwi ko wicakipazo. Waonspewicakiye cin Itancan kin wanyakapi, unkan wiyuśkinpi tanka.

²¹ Wookiye nicipi un nunwe, ake Jesus ewicakiya. Ate u maśi kin he iyecen miś ye ciśipi.

²² Hecen eye c̣a hehan awicaniya qa, Woniya Wakan icu po, ewicakiya.

²³ Tona woaḣtani wicayecicajujupi kinhan, hena wicakicicajujupi kta; qa tona wicayakipaganpi śni kinhan, hena wicakipaganpi kte śni.

²⁴ Ake nonpapi kin etanhan Thomas Didumos eciyapi he Jesus hi kin he icunhan en ope śni.

²⁵ Itancan kin wanunyakapi, waonspewicakiye cin unmapi kin eciyapi. Tuka iye kin hewicakiya; Maza on nape en okatanpi qon he wanmdake śni, qa napsukaza maza okatanpi kin en omdutan śni, qa cuwi nakun en nape yewaye śni kinhan, wicawada kte śni ce, eya.

²⁶ Unkan anpetu śahdogan iyohakam, hehan ake waonspewicakiye cin mahen yukanpi, qa Thomas owicapeya un. Hehan Jesus en hi, tiyopa onatag han, qa wicacokaya inajin, qa, Wookiye nicipi un nunwe, ewicakiya.

²⁷ Hehan Thomas heciya; Ninapsukaza uye c̣a minape kin wanyaka wo; qa ninape kin uye qa micuwi kin en oputkan wo, qa waceṭunhda śni wicada wo.

²⁸ Unkan Thomas ayupte c̣a heciya; Itancan mitawa, qa Wakantanka mitawa.

²⁹ Jesus heciya; Thomas, wanmayadake cin heon wicayada; tuka tona wanmayakapi śni eśta wicadapi kinhan, hena wicayawaśtepi ce.

³⁰ Unkan waonspewicakiye cin wanyakapi en taku tokeca ota wapetokeca Jesus econ, tuka hena eqe wowapi kin de en kagapi śni.

³¹ Tuka dena e owapi, heon Jesus he Messiya Wakantanka Cinhintku kin hee e wicayadapi kta; qa wicayadapi kin on, iye caje kin eciyatanhan, wiconi duhapi kta.