Johannes 2 - Dakota Wowapi Wakan Kin

¹ Anpetu iciyamni kin hehan Galile makoce en otonwe wan Kana eciyapi hen kiciyuzapi omniciye kagapi; unkan Jesus hunku kin en opa.

² Jesus nakun waonspewicakiye cin om kiciyuzapi kin en kicopi.

³ Unkan miniśa wanna henakeca hehan, Jesus hunku kin heciya; Miniśa takudan yuhapi śni ye.

⁴ Unkan Jesus heciya; Winoḣinca hetanhan iwamayatokiya he; nahanḣin iyemicihantu śni ce.

⁵ Unkan hunku kin wayutan wicakiyapi, He tokeḣin emciyapi owasin ecen ecom, ewicakiya

⁶ Inyan wakiśkokpa śakpe en han, ohna Juda oyate ihdujajapi kta e hdepi; otoiyohi wiyutapi nom yamni kipi.

⁷ Wakiśkokpa kin mini ojudan okaśtan po, ewicakiya. Unkan ojugjudan okaśtanpi.

⁸ Hehan, Onge etanhan icupi qa omniciye itancan kin he kaya po, Jesus ewicakiya. Unkan kayapi.

⁹ Unkan omniciye kin en itancan kin onge yatkan uta, he mini tuka miniśa icaḣyapi, qa he tokiyatanhan kin sdonye śni, tuka wayutan wicakiyapi mini akupi qon hena sdonyapi, unkan itancan kin tawicu ton qon kico;

¹⁰ Qa heciya, Wicaśta eca miniśa waśte tokaheya yatke wicakiya ece; qa tohan wicaśta wipipi hehan taku aoptetu kin; tuka niye miniśa waśte ḣinca dehanyan yehnaka ce, eya.

¹¹ Galile makoce kin hen, Kana otonwe he en, Jesus toka taku wapetokeca econ, qa towitan hdutanin; unkan hecen waonspewicakiye cin wicadapi.

¹² He Iyohakam Kapernaum ekta apamahde iyaya, iye qa hunku qa sunkaku qa waonspewicakiye cin hena koya om; unkan anpetu tonana hen yakonpi.

¹³ Unkan Juda oyate woacakśin wośnapi tawapi kin wanna ikiyedan; heon Jesus Jerusalem ekta itanwankanhde iyaya.

¹⁴ Unkan tipi wakan kin en wicaśta kin eya, tatanka, taḣinca, wakiyedan ko wiyopewicakiyapi, qa maza ska tokiyopekiciyapi kin en iyotankapi e wanwicayaka;

¹⁵ Qa icapsinte cikciqadan yugaga wan kage c̣ehan, tipi wakan kin etanhan owasin tankan iyewicaya, taḣinca tatanka ko; qa mazaska tokiyopekiciyapi qon iś kada iyeya, qa can wahna wotapi kin he nakun paahdapśinyan eḣpeya.

¹⁶ Qa wakiyedan wiyopeyapi kin iś, Dena owasin tankan iyeya po, qa, Ate ti kin de wopeton tipi kagapi śni po, ewicakiya.

¹⁷ Unkan waonspewicakiye cin wowapi en kagapi qon he kiksuyapi, Yati owakiye cin he mayapota ce.

¹⁸ Hehan Juda oyate ayuptapi qa heciyapi; Tokiya tanhan he oyakihi qa hecanon he.

¹⁹ Unkan Jesus waayupte c̣a, Tipi kin de ihangya po, qa anpetu iciyamni kin han ake ekicetuwaye kta, ewicakiya.

²⁰ Waniyetu wikcemna topa qa sam śakpe hehanyan tipi kin de kagapi qa yuśtanpi qon, niye nakaha anpetu iyamnina ekicetu yaye kta he, Juda oyate kin eciyapi.

²¹ Tuka tipi eye cin he iye tancan kin he ka e heon etanhan heya.

²² Heon wiconṭe etanhan ihduekicetu, hehan hecen ewicakiye ciqon he waonspewicakiye cin kiksuyapi; unkan wowapi wakan qa Jesus taku ewicakiye cin hena koya wicadapi.

²³ Unkan Jerusalem en woacakśin wośnapi kin icunhan, taku wapetokeca econ kin hena wicota wanyakapi qehan iye caje kin on wicadapi.

²⁴ Tuka Jesus owasin sdonwicaye cin heon etanhan wacinwicaye śni.

²⁵ Qa wicaśta on tuwedan wayaotanin kta cin śni; iye atayedan wicaśta taku en un kin sdonya, heon etanhan.