Johannes 19 - Dakota Wowapi Wakan Kin

¹ Unkan hehan Pilate Jesus icu qa kapsinpsinta.

² Unkan akicita wapepeka wapaha wan kazontapi qa wapaha kiyapi, qa śina to wan in kiyapi.

³ Qa, iho, Juda Wicaśtayatapi kin, eciyapi, qa nape on apapi.

⁴ Pilate ake tankan inanpe c̣a, Iho, wicaśta kin dee e tankan cicaupi, hecen on taku śica takudan en iyewaye śni e sdonyayapi kta, ewicakiya.

⁵ Hehan Jesus wapepeka wapaha kin un, qa śina to kin in, tankata inanpa. Unkan, Wanyaka po, wicaśta kin dee ce, ewicakiya.

⁶ Unkan wośna kagapi tankapi qa akicita tancanpi kin, he wanyag iheyapi hehan, panyehan heyapi, Icipaweḣ okatan wo, icipaweḣ okatan wo. Niśnana icupi qa icipaweḣ okatan po, miye qe taku śica econ takudan iyewaye śni, Pilate ewicakiya.

⁷ Wowakiconze wan unhapi, wowakiconze unhapi kin eciyatanhan ṭe kta iyececa, Wakantanka Cinhintku keic̣iye cin heon etanhan, Juda oyate kin eya ayuptapi.

⁸ Unkan Pilate iapi kin he naḣon qehan, iyotan inihan;

⁹ Qa woyaco tipi kin timahen kihde c̣a, Nitokiya tanhan he, Jesus eciya. Tuka Jesus ayupte śni.

¹⁰ Hehan Pilate heciya; Amayadupte śni he, Iciyaweḣ onicatanpi owakihi; qa niciyuśkapi nakun owakihi, he sdonyaye śni he.

¹¹ Hehan Jesus ayupte; Wankan tanhan taku kin de nic̣upi śni unkanś takudan on omayakihi kte śni tuka; heon tuwe niye en amahi kin he iye woaḣtani tanka.

¹² Hetanhan Pilate kiyuśkapi akita. Tuka, Wicaśta kin de yakiduśke cinhan Kesar takuyaye śni; tuwe wicaśtayatapi ic̣icage cinhan Kesar i en hiyeya ece, Juda oyate kin panyehan eyapi.

¹³ Pilate iapi kin he naḣon, unkan Jesus tankan yuha inanpa, qa oiyotanke tawa kin he ohna kiyotanka, inyan mdaya omanipi kin en, he Hebrew iapi kin etanhan Gabbatha eciyapi.

¹⁴ Woacakśin itokam anpetu piic̣iyapi ece kin hetu, qa wiyotanhe cin hehantu; Wicaśtayatapi nitawapi kin wanyaka po, Pilate Juda oyate kin ewicakiya.

¹⁵ Tuka, Icunonpa, icunonpa iyeye c̣a icipaweḣ okatan wo, panyehan eyapi. Wicaśtayatapi nitawapi kin de icipaweḣ owakatan kta he, Pilate ewicakiya. Unkan wośna kagapi tankapi kin ayuptapi; Kesar ecedan wicaśtayatapi unhapi ce.

¹⁶ Hehan icipaweḣ okatanpi kta e wicaqu. Unkan Jesus icupi qa tokan ayapi.

¹⁷ Unkan Jesus can susbeca kic̣in, qa makoce wan Wicapahu eciyapi, he Hebrew iapi on Golgotha eciyapi, he ekta aya.

¹⁸ Hen icipaweḣ okatanpi, qa wicaśta toktokeca nom itan anokatanhan ewicahdepi, qa Jesus okitahedan.

¹⁹ Unkan Pilate wowapi wan kage c̣a, can susbeca inkpa kin en ehnaka; JESUS NAZARETH ETANHAN, JUDA OYATE WICAŚTAYATAPI KIN.

²⁰ Wowapi kin de Juda wicaśta ota yawapi; makoce kin Jesus en icipaweḣ okatanpi kin he otonwe kin ikiyedan, qa he Hebrew, qa Helenes, qa Roma iapi henakiya wicoie kin on owapi.

²¹ Hehan Juda oyate etanhan wośna kagapi tankapi kin Pilate heciyapi; Juda oyate Wicaśtayatapi kin, eya owa śni wo; tuka, Juda oyate Wicaśtayatapi kin he miye ce, eic̣iye cin, hee e ecen owa wo.

²² Tuka Pilate waayupte; Taku owawa kin he wanna owawa ce, eya.

²³ Akicita Jesus icipaweḣ okatanpi, hehan tawokoyake icupi, qa wopamni tom kagapi, akicita otoiyohi kicipamnipi; qa nakun taśina icupi; śina kin he okagege wanica, wankan tanhan kun ihankeya kin hehanyan okagege codan kagapi:

²⁴ Heon etanhan iye iyakitedan hekiciyapi; Śina kin he unyuḣdecapi kte śni, econkupidan qa yeunkiyapi kta, hecen tuwe ohiye cinhan yuhe kta. Hecen wowapi en kagapi qon he iyecetu; Mi tawokoyake kicipamnipi, qa mitaśina kin he oeconna en yekiyapi ce. Unkan akicita kin hena hecen econpi.

²⁵ Unkan Jesus hunku, qa tankaku kicica, Mary Kleopas tawicu, qa Mary Magdalene, hena can susbeca kin icahda najinpi.

²⁶ Jesus hunku wanhdaka, qa en icunonpa ikiyadan waonspewicakiye cin wanji iyotan kidake ciqon wanhdaka, unkan, Winoḣinca, nicinkśi kin hee ce, hunku kin eciya.

²⁷ Qa waonspekiyapi kin he iś, Wanyaka wo, nihun kin hee ce, eciya. Unkan waonspekiyapi kin he anpetu kin hetanhan iye ti kin ekta aki.

²⁸ Wanna taku kin owasin ecetu Jesus wanyaka, qa wowapi en kagapi qon iyecetu kta e heon, Imapuza ce, eya.

²⁹ Unkan mini śkumna wakśica ojudan en icunhan han; mini śkumna icupi, qa nakun mini iyuḣepe wan en oputkanpi, qa peji ḣota hu wan icam yeyapi, qa i kin en qupi.

³⁰ Unkan Jesus mini śkumna icu qehan, Wanna yuśtanpi ce, eya; hehan pa makata iyeye c̣a taniya kin hiyuya.

³¹ Hehan Juda oyate kin Pilate cekiyapi, hu kawegapi qa etanhan icupi kta; hecen anpetu wakan icunhan, tancan kin can susbeca kin akan un kte śni, anpetu en piic̣iyapi kin wanna hehantu, qa anpetu wakan kin he anpetu tanka, heon.

³² Unkan akicita en hipi, qa tokaheya kin hu kawegapi, qa nakun unma kici icipaweḣ okatanki qon.

³³ Hehan Jesus ehan ipi, unkan wanna ṭa wanyakapi, heon hu kin kawegapi śni.

³⁴ Tuka akicita wanji wahukeza wan on cuwi kin en capa; unkan we mini ko au.

³⁵ Tuwe wanyake c̣a yaotanin kin he wayaotanin kin he wowicake. Wowicake eye cin he sdonkiya, qa hecen on wicayadapi kta.

³⁶ Hena hecetu, unkan wicowoyake wowapi en kagapi qon iyecetu; Hu kin wanjidan kawegapi kte śni ce.

³⁷ Qa nakun wowapi icinonpa hecen eya; Tuwe paḣdokapi kin he wanyakapi kta.

³⁸ Hehan ihakam Joseph Arimathea etanhan Pilate cekiya, Jesus tancan kin icu kta e heon; unkan iś eya Jesus waonspewicakiye cin wanji ee, tuka anaḣbeya, Juda oyate kowicakipe cin heon; unkan Pilate ayupta. He en u, qa Jesus tancan kin hdokiyahda.

³⁹ Unkan Nikodemos, tuwe tokaheya hanyen Jesus en hi qon hee, nakun en hi, qa pejihuta waśtemna nom icicahiyapi, tkeutapi opawinge ecetu, yuha hi.

⁴⁰ Hehan Jesus tancan kin icupi, qa miniḣuha ska iyapemnipi, pejihuta waśtemna iyahna, Juda oyate wicaśta hnakapi ece kin he iyececa.

⁴¹ Unkan icipaweḣ okatanpi qon he en ikiyadan wojupi wan han, wojupi he cin he en ohna wicaśta hnakapi wan iyuśtan yanka, tuwedan he ohna oonpapi śni.

⁴² Juda oyate piic̣iyapi anpetu kin he icunhan, ohna wicaśta hnakapi en ikiyadan yanke cin heon Jesus tancan kin en ohnakapi.