Johannes 18 - Dakota Wowapi Wakan Kin

¹ Jesus hena hecen eya, hehan waonspewicakiye cin om Kedron wakpadan kin akasanpa iyaya, hen can wojupi wan, unkan he en i, waonapewicakiye cin om.

² Unkan Judas wiyopeye cin he iś nakun makoce kin he sdonya, Jesus hen waonspewicakiye cin om emniciya ece qon heon.

³ Heon Judas akicita wicoun wan icu, qa akicita tancan ko, wośna kagapi qa Pharisee kin etanhan, om wipe yuhapi, qa petijaujan can itkonya ko yuha en yapi.

⁴ Jesus taku hiyahde kte cin owasin sdonkiya, itkowicakipe ca, Tuwe e oyadepi he, ewicakiya.

⁵ Jesus Nazareth etanhan, eya ayuptapi. Unkan Jesus, He miye ce, eya. Unkan Judas he wiyopeye ciqon ee en opa.

⁶ Unkan Jesus, He miye ce, ewicakiya hehan icicawin kihdapi, qa makata iḣpayapi.

⁷ Heon etanhan ake wiwicawanga; Tuwe ayakitapi he, eya. Unkan, Jesus Nazareth etanhan, eyapi.

⁸ Jesus waayupte; He miye ce, eciciyapi qon; hecen miye e omayadepi hecinhan dena ito kihdapi kta.

⁹ Wicoie wan eye ciqon he iyecetu kta, Tona mayaqu kin wanjidan eḣpewakiye śni ce.

¹⁰ Unkan Inyan mazasagye wan yuhe cin ehdaku, qa on wośna kagapi itancan ookiye wicaya wan noge etapa eciyatanhan ape c̣a kaśpa iyeya, ookiye unna kin he Malkos eciyapi.

¹¹ Hehan Jesus Inyan heciya; Mazasagye nitawa ojuha en iyekiya wo. Wiyatke Ate maqu kin he mdatke kte śni he.

¹² Juda oyate akicita tancan, akicita eyanpaha, akicita ikcedan ko Jesus yuzapi, qa paḣtapi.

¹³ Qa tokaheya Annas kaipi; Kaiaphas omaka kin he en wośna kagapi itancan kin he tunkanku kin hee.

¹⁴ Wicaśta wanjidan oyate kin on ṭe kte cin he hecetu kta ce, Juda oyate iwahokonwicakiye ciqon Kaiaphas ee.

¹⁵ Unkan Simon Inyan Jesus ihakam ya, nakun waonspewicakiye cin tokeca wan; unkan waonspewicakiye cin tokeca kin he wośna kagapi i tancan kin sdonya qon, heon hee wośna kagapi itancan tihocoka kin en Jesus kici iyaya.

¹⁶ Tuka Inyan e tankan tiyopa kin en najin. Hehan waonspewicakiye cin unma, wośna kagapi itancan sdonya qon, he tankan hiyu, qa tiyopa awanyake cin he okiye c̣a, Inyan tin hiyuya.

¹⁷ Hehan wikośka tiyopa awanyake cin he Inyan heciya; Wicaśta kin de waonspewicakiye cin wanji niye he. Unkan, Hemaca śni ce, eya.

¹⁸ Akicita eyanpaha wowidag wicayapi ko hen najinpi, sni hdapi qa cetipi; unkan he en petiśkanpi: unkan Inyan iś owicapeya inajin, qa petiśkan.

¹⁹ Hehan wośna kagapi itancan kin Jesus wiwanga, waonspewicakiye cin heon, qa iye woonspe tawa kin he nakun.

²⁰ Jesus ayupte; Oyate kin en taninyan womdaka ece; omniciye tipi etu, qa tipi wakan ko en, Juda oyate mniciyapi ece kin en ohinniyan waonspekiya waun, qa takudan anaḣbeyahan epe śni ce.

²¹ Taku on wimayanunga he; token ewicawakiye cin tona naḣonpi kin hena e wiwicawanga wo, token epe cin he sdonyapi ce.

²² Hena hecen eya, unkan akicita eyanpaha wan en najin kin he Jesus apa, qa heya; Wośna kagapi itancan kin hecen adupta he.

²³ Unkan Jesus ayupte; Śicaya iwaa hecinhan taku śica epe cin he yaotanin wo; tuka tanyan epa hecinhan, tokeca amayapa he.

²⁴ Annas Kaiaphas wośna kagapi itancan kin paḣtapi ecen ekta aye wicakiye ciqon.

²⁵ He icunhan Simon Inyan petiśkan najin. Heon heciyapi; Waonspewicakiye cin he wanji niye he. Tuka anakiḣbe c̣a, Hemaca śni ce, eya.

²⁶ Wośna kagapi itancan kin wowidake tawa wan, Inyan noge kaśpe ciqon he takuya, Wojupi kin en kici yaun wanciyake śni he, eciya.

²⁷ Tuka ake Inyan anakiḣman; unkan he icunhan anpa ohotonna wan hoton.

²⁸ Hehan Kaiaphas etanhan woyaco tipi kin en Jesus aipi; unkan wanna anpa. Ihduśapapi kte śni e heon woyaco tipi kin en ipi śni, wośnapi kin hdutapi kta e heon.

²⁹ Unkan Pilate tankata hinanpe c̣a, en wicau qa, Wicaśta kin de taku e iyayaonpapi he, ewicakiya.

³⁰ Waayuptapi qa heciyapi; Wicaśta kin de oḣan śice śni unkanś unnicahipi kte śni tuka, eyapi.

³¹ Hehan Pilate hewicakiya; Niye ito eyaku po, qa wayeconzapi kin eciyatanhan yaco po. Hehan, Wicaśta ṭeyapi unkiye unkokihipi śni ye, Juda oyate eciyapi.

³² Hecen Jesus oie qon ecetu kta, token wiconṭe on ṭe kta eye ciqon he.

³³ Hehan woyaco tipi timahen Pilate kihde c̣a, Jesus en au wicakiye c̣a, Juda oyate wicaśtayatapi qon he niye he, eciya.

³⁴ Jesus ayupta; He niye cinka heha he; qa iś tuwe tokeca miye on hecen oniciyeka he.

³⁵ Pilate ayupte; Juda wicaśta hemaca he; nitaoyatepi kin hena, qa wośna kagapi tankapi kin he iye miye en anihipi. Token oyaḣanda he.

³⁶ Jesus ayupte; Wokiconze mitawa kin ne maka kin detanhan śni; wokiconze mitawa kin maka kin detanhan unkanś, mitaokiye kin kis unpi kta, qa Juda oyate kin makaśkapi kte śni tuka. Tuka nakaha wokiconze mitawa kin detanhan śni.

³⁷ Hehan Pilate heciya; Wicaśtayatapi kin henica he. Unkan Jesus ayupte; Wicaśtayatapi hemaca e ecen eha; hemaca kta e on matonpi, qa heon makata wahi, wowicake mdaotanin kta e heon. Tuwe wowicake eciyatanhan un kinhan he miho kin naḣon ece.

³⁸ Wowicake kin he taku he, Palate eciya. Hena hecen oie ya, unkan Pilate tankata inanpe c̣a, Juda oyate en wicaye c̣a, Wicaśta kin he taku śica econ takudan iyewaye śni, ewicakiya.

³⁹ Tuka wicoḣan duhapi kin heciyatanhan, woacakśin anpetu ehan unkipi eca, tuwe kaśka hnakapi wanji wakiyuśka ece qon. Juda oyate wicaśtayatapi kin de wakiyuśka yacinpi he, eya.

⁴⁰ Unkan ake owasin panyehan howayapi qa heyapi; Wicaśta kin dee kte śni, tuka Barabbas e hee kta. Unkan Barabbas e qe wawicaki sa kin heca.