Johannes 17 - Dakota Wowapi Wakan Kin

¹ Jesus hena hecen eye c̣a hehan iśta yuwankan icu, qa maḣpiya kin ekta etonwan qa, Ate wanna anpetu kin hiyohi, Nicinkśi kin hdutan wo, hecen on Nicinkśi kin nihdutan kta ce.

² Wicaceḣpi owasin on wowaśake yaqu qon, hecen tona yaqu kin owasin owihanke wanin wiconi wicaqu kta.

³ Unkan owihanke wanin wiconi kin he dee, wowicake Wakantanka niye e sdonniyanpi kta, qa Jesus Messiya uyaśi qon.

⁴ Maka kin akan ciyutan; qa wicokicanye mayaqu qon wanna owasin wahduśtan.

⁵ Unkan nakaha, Ate niye kin on miye mahdutan wo, wicoicage wanice cin he itokam wowitan niyeci hduha waun qon heon.

⁶ Oyate kin den wicaśta tona mayaqu kin hena en nicaje mdaotanin; hena nitawa, tuka hena mayaqu; unkan hena nioie qon niciyuhapi.

⁷ Taku mayaqu kin owasin he niye etanhan u, wanna sdonyapi.

⁸ Nioie mayaqu qon he wanna wicawaqu; unkan ieupi, qa niye eciyatanhan wahi kin he tanyan sdonyapi, qa niye e umayaśi kin he wicadapi.

⁹ Hena on wocekiye ewicaweciya, maka akan wicaśta kin hena on wocekiye eciciye śni, tuka tona mayaqu kin hena on wocekiye eciciye, hena nitawa kin he etanhan.

¹⁰ Taku mitawa kin hena owasin nitawa, qa niś taku nitawa kin hena mitawa, qa hena on wowitan waun.

¹¹ Wanna oyate kin dematanhan śni, tuka iye e oyate kin en opeya ni unpi, qa miye wanna nitankiyadan waku kta. Ate wakan, nicaje kin on dena mayaqu qon hduha wo, hecen unwanjidan qon iś iyecen wanjidan kta.

¹² Oyate kin den om waun kin he icunhan nicaje kin on wicawahduha. Mayaqu qon hena e wicawahduha, qa owasin eḣpekiyapi śni, wicaśta wayutakuni śni cinhintku kin hecedan eḣpekiyapi, hecen wowapi en un qon wanna iyecetu.

¹³ Wanna nitankiyadan waku kta, oyate kin den opeya waun kin en ehake hecen epa, hecen on mitowiyuśkin kin iyepi en wicakiyuśtanpi kta.

¹⁴ Nioie wicawaqu, qa oyate kin śice wicadapika, oyate kin hetanhanpi śni heon etanhan hececa, oyate dematanhan śni he iyecen.

¹⁵ Oyate kin detanhan ewicayahdaku kta e heon wocekiye eciciye śni, tuka taku śice cin he en anawicayecipte kta e heon.

¹⁶ Oyate kin de ematanhan śni kin he iyecen iś oyate kin de etanhanpi śni.

¹⁷ Wowicake nitawa kin he on wicayuwakan wo; nioie kin he wowicake.

¹⁸ Oyate kin deci u mayeśi qon, he iyecen iś oyate kin ecen ye wicawaśi.

¹⁹ Qa iyepi on miye mihduwakan, hecen on wowicake eciyatanhan wicayuwakanpi kta.

²⁰ Qa denana on wocekiye ewicaweciye śni, nakun tona wicoie oyakapi eciyatanhan wicamadapi kin hena keya.

²¹ Hecen on owasin wanjipidan kta, niye kin iyecen, Ate, miyecica, qa miś cicica; qa hecen iś unkicicapi kta; qa oyate kin niye u mayaśi kin he wicadapi kta.

²² Wowitan mayaqu qon he wanna wicawaqu; hecen on unwanjidan kin iyecen wanjipidan kta.

²³ Miś wicakici waun, qa niś mici yaun, hecen wanjidan en wicayuśtanpi kta; qa hecen niye umayaśi kin he oyate kin sdonyapi kta; qa waśtemayakida kin he iyecen waśtewicawakida ece.

²⁴ Ate, tona mayaqu kin hena, tokiya waun kin hen mici unpi kta wacin; hecen wowitan mayaqu qon he wanyakapi kta, wicoicage kin de itokam waśtemayakida kin heon etanhan.

²⁵ Ate owotanna, oyate kin sdonniyanpi śni ye, tuka miye sdonciye ciqon, qa dena iś niye e u mayaśi kin he sdonyapi.

²⁶ Unkan nicaje kin he sdonye wicawakiya qa nakun sdonye wicawakiye kta; hecen wawacinkta duza on waśtemayakida qon he dena en un kta, qa miś nakun owicawape kta.