Johannes 16 - Dakota Wowapi Wakan Kin

¹ Wayaḣtanipi kte śni e heon dena taku kin ociciyakapi.

² Omniciye tipi kin etanhan tankan iyeniyanpi kta; nakun anpetu wan u kta, hehan tuwe kaśta niktepi kinhan, he Wakantanka iyokipiya kecin kta.

³ Atewaye cin sdonyapi śni, qa miś nakun sdonmayanpi śni, he etanhan henakiya hecen ecanionpi kta.

⁴ Tuka dena ociciyakapi, hecen tohan iyehantu kinhan, dena wanna eciciyapi kin he yeksuyapi kta. Qa dena otokahe ekta eciciyapi śni, hinyaḣin cicipi waun kin heon etanhan.

⁵ Tuka wanna tuwe umaśi kin he ekta wahde kta; qa wanjidan, Tokiya de kta he, emayakiyapi śni.

⁶ Tuka taku kin dena ociciyakapi, heon nicantepi kin ekta iyoniyakapi.

⁷ Tuka wowicake ece ociciyakapi; wahde cinhan heon tanyan yaunpi kta, qa wahde śni kinhan Wicakicanpte kin en nihipi kte śni; tuka wahde cinhan niyepi ekta uwaśi kta.

⁸ Unkan he tohan hi kinahan, woaḣtani, woowotanna qa woyaco kin on oyate kin sdonyewicaye kta:

⁹ Woaḣtani kin, wicamadapi śni kin heon:

¹⁰ Woowotanna kin, Atewaye cin ekta wahde kta, qa icimana wanmayadakapi kte śni, heon:

¹¹ Woyaco kin, oyate kin de itancan un kin he wanna yacopi, heon etanhan.

¹² Nakun taku ota eciciyapi kta mduha, tuka hena e qe nahanḣin yuha oyakihipi śni.

¹³ Tuka tohan Wowicake Woniya kin he iye hi kinhan, wowicake ocowasin en aniyanpi kta; iye atayedan on ie kte śni, tuka taku naḣon kin hena oyake kta, qa taku tokata ekta hena oniciyakapi kta.

¹⁴ Mayutan kte cin hee, taku mitawa kin hena icu, qa oniciyakapi kta.

¹⁵ Taku Ate tawa kin hena owasin mitawa; he etanhan, Tona mitawa kin hena icu, qa oniciyakapi kta ce, eciciyapi.

¹⁶ Wanna aśkayedan hehan wanmayadakapi kte śni; hehan akeś aśkadan ake wanmayadakapi kta, Ate ekta wahde kte cin heon.

¹⁷ Hehan waonspewicakiye cin iyakitedan hekiciyapi; Unkekiciyapi kin he taku hwo; Wanna aśkayedan wanmayadakapi kte śni, qa hehan aśkadan ake wanmayadakapi kta; qa, Ate ekta wahde kte cin heon.

¹⁸ Heon heyapi; Aśkayedan eye cin he taku he; taku eye cin sdonunyanpi śni ce.

¹⁹ Wiwangapi cinpi kin he Jesus sdonya, unkan heon hewicakiya; Wanna aśkayedan wanmayadakapi kte śni, qa hen ikiyedan wanmayadakapi kta, epe cin he, he token kapi hwo, otoiyohi eyeciyapi he.

²⁰ Wowicake, wowicake on heciciyapi; Nihinnic̣iyapi qa yaceyapi kta, tuka oyate kin iyuśkinpi kta; iyoniciśicapi kta, tuka iyoniciśicapi kin he wowiyuśkin wan en un kta.

²¹ Winoḣinca cinca ton kta eca yazan hda, wanna iyekicihantu kin heon; tuka tohan hokśiyoqopa ton eca, yazan hda qon he kiksuye śni, wicaśta oyate kin den tonpi eca wowiyuśkin ye cin heon.

²² He iyecen nakaha iyokiśin dukanpi, tuka ake wanciyakapi kta, kinhan nicantepi kin wiyuśkin kta, qa widuśkinpi kte cin he tuwedan nicipi kte śni.

²³ Unkan anpetu kin he en takudan imayanungapi kte śni. Wowicake, wowicake on heciciyapi; Taku micaje on Atewaye cin yakidapi kinhan nic̣upi kta.

²⁴ Nahaḣin dehanyan micaje on takudan yadapi śni. Da po, iyacupi kta, hecen wowiyuśkin ojudannic̣iyapi kta.

²⁵ Hena taku iyacinyan heciciyapi; tuka anpetu wan u kta, hehan wiyacinyan takudan eciciyapi kte śni, tuka taninyan Ateyapi kin on ociciyakapi kta.

²⁶ Tohan iyehantu kinhan micaje on taku yadapi kta, tuka Atewaye cin wocekiye eciciyapi kta, epe śni.

²⁷ Ate iye atayedan waśte nidapika, waśte mayadapike c̣a Wakantanka eciyatanhan wahi kin he wicayadapi kin heon.

²⁸ Atewaye cin eciyatanhan wau, qa oyate kin de en wicawahi Ake oyate kin eḣpewicawaye kta qa Ate ekta wahde kta.

²⁹ Wanna wiyacinyan iyae śni, ataninyan iyaa ce, waonspewicakiye cin eciyapi.

³⁰ Taku owasin sdonyaye c̣a, tuwe winiwange kta iyecece śni yaun e wanna sdonunyanpi; heon etanhan Wakantanka eciyatanhan yahi kin he wicaundapi, eyapi.

³¹ Jesus awicayupte; Wanna wicayadapi he.

³² Anpetu wan u kta qa wanna hiyohi, enanakiya otoiyohi yahdapi kta, qa miśnana eḣpemayayapi kta; tuka nakun miśnana waun śni, Atewaye cin he mici un.

³³ Wookiye amayaduhapi kta heon etanhan hena heciciyapi. Oyate kin de en wokakije duhapi kta; tuka wiyuśkin po, miye oyate kin ohiwicawaya ce.