Johannes 13 - Dakota Wowapi Wakan Kin

¹ Anpetu en wośnapi ece kin itokam, anpetu qon wanna hiyohi, he en maka kin detanhan iyaye kta, Atkuku ektakiya hde kta, Jesus sdonkiya, tona maka akan tawa kin waśtewicadake cin hena owihanketa waśtewicakida.

² Wotapi ayaśtanpi hehantu; Judas Iskariot Simon cinhintku kin hee, Jesus wiyopeye kte cin, Wakanśica wanna hecen cante ozekiya.

³ Hehan Jesus Atkuku taku owasin tawa kiye ciqon he sdonkiya un, Wakan tanka eciyatanhan hi, qa ake Wakantanka ekta hde kta.

⁴ Hecen wotapi kin etanhan najin, qa śina ekihnaka; qa napipakinte wan icu, qa ipiyaka.

⁵ Qa hehan mini wakśica en okaśtan, qa waonspewicakiye cin siha wicakiyujaja, qa napipakinte wan ipiyake ciqon heon siha kin wicakipakinta.

⁶ Simon Inyan ehan ahi; unkan, Itancan, niye siha mayakidujaja kta he, eciya.

⁷ Unkan Jesus ayupte c̣a, Taku ecamon kin de nakaha sdonyaye śni, tuka ihakamya sdonyaye kta, eciya.

⁸ Icimana siha mayakidujaja kte śni, ake Inyan eciya. Hehan Jesus ayupte; Ciciyujaja śni kinhan takudan on miyecica kte śni, eya.

⁹ Hehan Simon Inyan heciya; Itancan, siha ecedan śni, tuka minape, mapa koya.

¹⁰ Unkan Jesus heciya; Tuwe wanna ihdujaja kin he takudan sanpa cin śni, siha ecedan yujajapi kta, eya wanna ocowasin ska; unkan niye niskapi, tuka iyuḣpapi śni.

¹¹ Tuwe wiyopeye kte cin he sdonya, heon etanhan, owasin niskapi śni ce, eya.

¹² Unkan siha wicakiyujaja yuśtan kin hehan śina ehdaku qa hdewin qa iyotanke c̣a, Taku tokaciconpi kin de sdonyayapi he, ewicakiya.

¹³ Waonspekiya qa Itancan, emayakiyapi ece; he tanyan ehapi; he miye nakaeś.

¹⁴ Heon etanhan miś miye Waonspekiya qa Itancan mayaduhapi kin, siha ciciyujajapi kinhan, niś eya otoiyohi siha yeciyujajapi kta iyececa.

¹⁵ Waonspeoiciyapi kin he niś he iyecen ecanonpi kta e hecaciconpi.

¹⁶ Ookiye unpi kin he Itancan kin iyakapa śni; qa tuwe u śipi kin he tuwe u śi hecinhan, he iś iye kapa śni, wowicake, wowicake eciyatanhan eciciyapi.

¹⁷ Taku kin dena sdonyayapi hecinhan, ecen ecanonpi kinhan waśteya yaunpi kta.

¹⁸ Taku epe cin de niye iyuḣpa heciciyapi śni; tona wicawakaḣnige cin hena sdonwicawakiya; tuka wowapi en kagapi qon yuecetu kta; Tuwe kici aguyapi wata ece kin he miye on siha yuwankan ehdaku ce.

¹⁹ Taku kin dena ecetu śni itokam ociciyakapi; hecen tohan iyecetu kinhan, he miye e wicayadapi kta.

²⁰ Tuwe tokiya yewakiye cin tuwe iyowinkiye cinhan, he miye e iyowinmaye; qa tuwe iyowinmaye cinhan, he tuwe u maśi kin he iyowinkiya, wowicake, wowicake eciyatanhan eciciya pi.

²¹ Jesus hena hecen eye c̣a hehan toksape kin ekta iyahdeic̣iya, hdaotanin qa heya; De dukanpi kin etanhan wanji wiyopemayayapi kta, wowicake, wowicake on eciciyapi ce.

²² Hehan waonspewicakiye cin opakiciḣta yukanpi, wanji tukte e on heye cin sdonyapi śni.

²³ Unkan Jesus waonspewicakiye cin wanji nina waśte kidake ciqon, he eca maku kin en makan iwanka.

²⁴ Heon Simon Inyan he wikiyuta, qa wanji tukte he on heye cin he iwange śi.

²⁵ Hehan he Jesus maku kin en iwanke c̣a, Itancan, he tuwe he, eya.

²⁶ Jesus ayupte; Wanji tukte ḣpanyanpi onśpa waqu kinhan hee kta, eya. Hecen onśpa ḣpanye c̣a, Judas Iskariot eciyapi Simon cinhintku he qu.

²⁷ Unkan Judas ḣpanyanpi kin icu, hehan Satan mahen iyaya. Hecen Jesus heciya; Taku ecanon kte cin kohanna econ wo.

²⁸ Wahna wotapi kin ihdukśan yukanpi kin, taku on heye cin tuwedan okaḣnigapi śni.

²⁹ Judas mazaska opiye yuhe cin heon, Jesus wośnapi kta on taku cinpi kin he opeton śi; qa iś, waḣpanicapi kin taku wicaqu śi, apa kecinpi.

³⁰ Unkan ḣpanyanpi qon he icu qehan, hecehnana tankan iyaya; wanna hanyetu hehantu.

³¹ He tankan iyaya, hehan Jesus hey a; Wanna Wicaśta Cinhintku kin yutanpi, qa nakun iye eciyatanhan Wakantanka iś yutanpi.

³² Qa iye eciyatanhan Wakantanka yutanpi hecinhan, hehan Wakantanka iś iye kin on hdutan kta, nakun kohanna hdutan kta.

³³ Hokśiyoqopa ehake ptenyedan ocipapi kta. Amayakitapi kta, qa Juda oyate ewicawakiye ciqon; Tokiya mde cin ekta yaipi kta oyakihipi śni ce; he iyecen nakaha eciciyapi.

³⁴ Woahope teca wan cic̣upi, otoiyohi waśteyecidapi kta; waśtecicidapi kin he iyecen waśteyecidapi kta.

³⁵ Heon waonspeciciyapi yaunpi kin wicaśta owasin sdonyapi kta, otoiyohi waśteyecidapi kinhan.

³⁶ Itancan, tokiya de kta he, Simon Inyan eciya. Jesus ayupte; Tokiya mde cin ekta de kta eśta nakaha oyakihi kte śni, tuka ihakamya mihektam yau kta, eya.

³⁷ Unkan Inyan heciya; Itancan, tokeca nakaha cihakam waun kta owakihi śni he; niye on wiconi mduhe cin eḣpewaye kta, eya.

³⁸ Jesus ayupte; Miye on wiconi nitawa eḣpeyaye kta he. Wowicake, wowicake on heciciya; Anpaohotonna kin hoton śni itokam yamni akihde sdonmayaye śni, kehe kta ce, eya.