Johannes 11 - Dakota Wowapi Wakan Kin

¹ Unkan wicaśta wan wayazanka, Lazarus eciyapi, Bethani hetanhan, Mary qa cunku Martha totonwepi kin hee.

² Mary wihdi waśtemna on Itancan kin sdaye c̣a, paha kin on siha kin kipakinta, Lazarus he hunkawanjitku wayazanke cin hee.

³ Unkan tawinoḣtinpi kin, Itancan, wicaśta wan waśteyadake ciqon he wayazanka, eya hośi kaipi.

⁴ Jesus naḣon unkan hecen eya, Wowayazan kin he wiconṭe ekta śni, tuka he Wakantanka towitan kin ee, qa heon Wakantanka Cinhintku kin yuwitanpi kta.

⁵ Martha iye tankaku, Lazarus kici, Jesus waśte wicadaka.

⁶ Wayazanke cin naḣon, tuka anpetu nonpa ekta ye śni yanka.

⁷ Hehan Jesas waonspewieakiye cin hewicakiya; Juda makoce kin ekta unhdapi kta.

⁸ Unkan waonspewicakiye cin heciyapi; Itancan, nahanḣin aśkatudan Juda oyate kin inyan on nicininpi akitapi, qa ake ekta hde wacanni he.

⁹ Jesus waayupte; Anpetu wanjidan keś, wihiyayedan oape akenonpa śni he; tuwe anpetu icunhan mani kinhan naśna śni ece; maka akan iyoyanpa kin he wanyaka heon.

¹⁰ Tuka tuwe hanyen mani kinhan hee naśna kta, iyoyanpa takudan en un śni kin heon.

¹¹ Hena hecen eya; qa hehan iyohakam hewicakiya; Lazarus koda unyanpi qon iśtinma, ekta mde c̣a mduḣice kta ce.

¹² Hehan waonspewicakiye cin, Itancan, iśtinma hecinhan he hecetu kta ce, eyapi.

¹³ He wanna ṭa e Jesus heya; tuka iśtinmapi on oziic̣iya e heya kecinpi.

¹⁴ Unkan hehan Jesus taninyan hewicakiya; Lazarus wanna ṭa ce:

¹⁵ Qa he icunhan hen waun śni kin heon niyepi en wimduśkin, hecen on wicayadapi kta. Ho po, ekta unyanpi kta.

¹⁶ Hehan Thomas Didumos eciyapi kin he waonspewicakiye unmapi kin hewicakiya; Ekta unyanpi, qa kiei unṭapi kta ce.

¹⁷ Unkan Jesus en u qehan, ḣapi etanhan wanna topa can he sdonya.

¹⁸ Jerusalem Bethani ikiyedan, wiyutapi akezaptan ecetu hehanyan.

¹⁹ Unkan Martha Mary kici yukanpi en Juda oyate wicota magagaye wicaipi, hunkawanjitkupi kin heon.

²⁰ Jesus en u Martha naḣon, unkan itkokim ya; tuka Mary e timahen iyotanka yanka.

²¹ Hehan Martha Jesus heciya; Itancan, den yaun unkanś, mihunkawanji ṭe kte śni tuka;

²² Tuka detanhan taku Wakantanka yakida kinhan, Wakantanka nic̣u kta e sdonwayace.

²³ Nihunkawanji ekicetu kta, Jesus eciya.

²⁴ Eya woekicetu anpetu ihankeya kin hehan ekicetu kta e sdonwaya, Martha eya.

²⁵ Unkan Jesus heciya; Woekicetu qa wiconi kin he miye, tuwe wicamada kinhan toke ḣin ṭa eśta ni kta.

²⁶ Qa tuwe ni un, qa wicamada kinhan icimana ṭe kte śni. He wicayada he.

²⁷ Han, Itancan; Messiya Wakantanka Cinhintku makata hi kte ciqon he niye e wicawada ce, eciya.

²⁸ Unkan hena hecen eya, hehan hde c̣a, tawinoḣtin Mary anaḣbeyahan kico, qa heciya; Itancan kin den un, qa nico ce.

²⁹ He naḣon iheya, unkan oḣankoya najin hiyaye c̣a ekta ya.

³⁰ Nahanḣin Jesus otonwe kin ehan i śni, tuka Martha itkokipe ciqon he en un.

³¹ Hehan Juda oyate en yukanpi, qa magagayapi, he icunhan Mary oḣankoya najin hiyaye cin wanyakapi qehan, ihakam iyayapi qa, Wicaśta hnakapi ekta ceye kta e ekta ya, eyapi.

³² Jesus najin kin Mary ehan i, qa wanyake c̣ehan, ihukuya canpeśka makehde eḣpeiciye c̣a, Itancan, den yaun unkanś, mihunkawanji ṭe kte śni tuka, eciya.

³³ Mary ceye cin he Jesus wanyake c̣a, Juda wicaśta kici ipi kin hena nakun ceyapi; unkan iye atayedan comnihdazi, qa iḣniyanyan.

³⁴ Qa tokiya eyahnakapi he, eya. Unkan, Itancan, ekta u qa wanyaka ye, eciyapi.

³⁵ Jesus ceya.

³⁶ Hehan Juda oyate kin heyapi; Wanyaka po, ehan qon waśte dake ḣinca ce.

³⁷ Qa wicaśta wanjikji, Wicaśta iśta aohduta ee kaeś yukawa, wicaśta kin de ṭe śni unkiya okihi kta naceca ce, eyapi.

³⁸ Ake Jesus iye atayedan comnihdazi, qa wicaśta hnakapi kin en ya. He imnija oḣdoka ohna hnakapi, qa inyan wan tanka aokaṭinzapi.

³⁹ Inyan kin tokan iyeya po, Jesus eya. Wicaśta ṭe cin tawinoḣtin Martha heciya, Itancan, wanna topa can yanka e śicamna.

⁴⁰ Wicayada kinhan, Wakantanka towitan wandake kta ce, eciciye śni he, Jesus eciya.

⁴¹ Hehan inyan kin tokan iyeyapi; wicaśta ṭa wanke cin etanhan. Unkan Jesus iśta yuwankan ikikcu, qa heya; Ate ciyawaśte, namayaḣon kin heon;

⁴² Qa ohinniyan namayaḣon kin he sdonwakiya; tuka wicaśta hnakapi kin de en mitan okśan najinpi kin de on, he niye u mayaśi kin wicadapi kta e on hepe.

⁴³ Hecen eye c̣a hehan, Lazarus nunke cin hetanhan tankata hninanpa wo, awitukadan hoyekiya qa eya.

⁴⁴ Unkan wicaśta ṭe cin tankata hninanpa, siha nape ko paḣtapi, qa ite opemni tonpi kin hena ecehna. Kiyuśkapi qa ayuśtan po, iyaye kta, Jesus ewicakiya.

⁴⁵ Hehan Juda wicaśta Mary kici ipi qon, hena Jesus taku econ kin he wanyakapi, unkan wicota wicadapi.

⁴⁶ Tuka wanjikji Pharisee kin ekta wicakipi, qa Jesus taku econ kin owicakiyakapi.

⁴⁷ Hehan wośna kagapi Pharisee ko mniciyapi qa, Token econkupi he; wicaśta kin de taku wapetokeca ota econ kin, eyapi.

⁴⁸ Iyowinunkiyapi kinhan wicaśta owasin wicadapi kta; kinhan Roma oyate kin den upi kta, qa otonwe kin de unkasotapi, qa nakun unkitaoyatepi kin hena ko.

⁴⁹ Hehan wanji Kaiaphas eciyapi waniyetu kin he en wośna kagapi itancan kin hee hewicakiya; Takudan oyakaḣnigapi śni.

⁵⁰ Qa nakun awacannipi śni, wicaśta wanjidan oyate on ṭe cinhan, hecen on oyate kin wicate kte śni, he unkiyepi kin on hecetu kta ce, eya.

⁵¹ Iye etanhan on hecen eye śni, tuka omaka kin he en wośna kagapi itancan kin heon, Jesus oyate kin on ṭe kte cin he iyukcanyan heya.

⁵² Qa oyate kin heceedan śni, tuka Wakantanka cinca omdecahe cin hena owasin wanjidankiya kiwitaye kta.

⁵³ Hehan anpetu kin hetanhan witaya akiiapi, ṭeyapi kte cin heon.

⁵⁴ Heon etanhan Jesus Juda oyate kin wicehna taninyan omani śni, tuka makoce wan ḣewoskan ikiyedan wanke, otonwe wan Ephraim eciyapi kin he ekta ya, qa waonspewicakiye cin om he en un.

⁵⁵ Unkan woacakśin Juda oyate wośnapi kagapi wanna ikiyedan aya; unkan wanna kayehan oyate ota Jerusalem en kata iheya aya, woacakśin kin itokam piiciyapi kta.

⁵⁶ Hehan Jesus akitapi, qa tipi wakan kin ohna najinpi icunhan iyakitedan hekiciyapi; Token idukcanpi he; wośnapi kin en u kte śni he.

⁵⁷ Wośna kagapi tankapi qa Pharisee ko wanna wakiconzapi, tuwe Jesus tukten yanka sdonye cinhan, he oyake kta, hecen yuzapi kta.