Jakob 5 - Dakota Wowapi Wakan Kin

¹ Iho po, tona wijica yaunpi kin, wokakije nihiyahdepi kte cin hena on ceyapi qa śicahowaya po.

² Woyuha nitawapi kin kuka, qa nitawokoyake kin wamduśkadan yapotapi.

³ Mazaskazi qa mazaska nitawapi kin gigi aya; qa gigi kin he niyutaninpi kta, qa niceḣpipi kin ihangye kta, peta iyececa. Woyuha anpetu ehake kin amnanic̣iyapi.

⁴ Wanyaka po, tona maga nitawapi abaksapi wokajuju hnaye ayanicapi kin he howaya; qa tona aguyapi baniciksapi qon hoyeyapi kin he Sabaoth Itancan noge kin en hiyoḣpaya.

⁵ Maka akan woiyokipi imnahan yaunpi qa tanyan wayatapi ece; wapatapi anpetu kin en iyecen cante cemyakiyapi.

⁶ Wicaśta owotanna kin he dacopi qa yaktepi; tuka nicipajinpi śni.

⁷ Heon etanhan, mihunkawanji, Itancan kin hi kte cin hehanyan wacintanka po. Wanyaka po, wicaśta woju ece kin he maka waskuyeca waśte aicage cin hena ape yanke c̣a, on tehan wacintanka, magaju tokaheya qa nakun ehake kin ahinhe kte cin hehanyan.

⁸ Niś eya wacintanka po; cante hdusuta po; Itancan kin u kte cin he wanna kiyedan ihan.

⁹ Mihunkawanji, otoiyohi okiciḣinyanpi śni po, okinni niyacopi kta. Wanyaka po, Wayaco kin he tiyopa kin itokam inajin.

¹⁰ Mihunkawanji, wicaśta wokcan Itancan caje kin on iapi qon hena kakijapi qa wacintankapi on waonspekiya wicayuha po.

¹¹ Wanyaka po, tona wacintankaya unpi kin hena waśte kecanwicunkinpi ece. Job token wacintanka qon he nayaḣonpi, qa Itancan owihankeye cin he wandakapi; Itancan kin waonśida qa wawacinkta yuza tanka.

¹² Tuka mihunkawanji, taku owasin isanpa, Taku namaḣon ce, eyapi śni po, maḣpiya kin he, qa maka kin de, qa taku tokeca cajeyatapi ece kin nakun; tuka, han, ehapi kin he han ecedan kta, qa, hiya, ehapi kin he hiya ecedan kta; okinni woyaco kin en iyoyaḣpadapi nun ce.

¹³ Niyepi kin etanhan wanji kakija he; wocekiye eye kta. Wanji wiyuśkin he; odowan ahiyaye kta.

¹⁴ Niyepi kin ekta wanji wayazanka he; okodakiciye kin en hunkawicayapi kin wicakico kta; on cekiyapi qa Itancan caje kin on wihdi on sdayapi kta.

¹⁵ Unkan wacinyan cekiyapi kin he wayazanke cin asniye kta; qa Itancan kin he najinkiye kta; qa woaḣtani econ hecinhan, hena kicicajujupi kta.

¹⁶ Wayaḣtanipi kin otoiyohi okiciciyakapi qa otoiyohi wocekiye ekiciciya po, hecen anisnipi kta. Wicaśta owotanna nina waśagya cekiye cin he taku tanka okihi ece.

¹⁷ Elijah wicaśta wacinyuza iyeuncecapi, qa wocekiye on magaju kte śni e icekiya; unkan waniyetu yamni sanpa wi śakpe hehanyan maka kin ahinhe śni.

¹⁸ Hehan ake wocekiye eya, unkan maḣpiya kin magaju hiyuye c̣a, maka kin waskuyeca icaḣya.

¹⁹ Mihunkawanji, wanji enitanhanpi wowicake kin etanhan nuni, qa tuwe he ake ekta yuhomni kinhan,

²⁰ Tuwe wicaśta waḣtani sa wan canku onuni kin etanhan yuhomni kinhan, he wicanagi wan wiconṭe etanhan eyaku kta, qa woaḣtani ota akaḣpe kta e he sdonkiye kta.