Jakob 4 - Dakota Wowapi Wakan Kin

¹ Niyepi ekta wicokicize qa wakinicapi kin tokiyatanhan u he; cantiheyayapi śica nihuhapi en wakis un kin hena eciyatanhan śni he.

² Cantiheyayapi tuka duhapi śni; wicayaktepi qa yuhe wacannipi, tuka icu oyakihipi śni; wicayakizapi qa zuya dapi, tuka taku duhapi śni, yadapi śni kin heon etanhan.

³ Yadapi tuka iyacupi śni ece, ecinśniyan yadapi kin on, cantiheyayapi śica on dusotapi kte cin heon.

⁴ Wiinayaḣmanpi qa wawiciḣaḣapi ecanonpi kin, wicoicage kin de waśtedapi kin he Wakantanka śicedaka e sdonyayapi śni he. Heon tuwe wicoicage kin de wotakuye wacin kinhan, he Wakantanka tokaya.

⁵ Wowapi wakan kin, Woniya en unyakonpi kin he winawizipi cantiheya ce, ituya eya idukcanpi he.

⁶ Tuka sanpa wowaonśida wicaqu ece; heon heya, Wakantanka waḣanic̣idapi kin wicakipajin, tuka tona onśikiḣanpi kin hena wowaonśida wicaqu ece.

⁷ Heon etanhan, Wakantanka ihukuya iyeic̣iya po. Wakanśica kipajin po, kinhan nanicipapi kta.

⁸ Wakantanka ikiyedan u po, hecen iś nikiyepidan u kta. Waḣtanipi sa, nape hdujaja po; qa wacin ninonpapi kin, cante hduecepidan po.

⁹ Iyokiśicapi, waśihdapi qa ceya po; iyaḣapi kin he wicaceya ee kta, qa widuśkinpi kin he woiyokiśice kta.

¹⁰ Itancan kin itokam makata eḣpeic̣iya po, kinhan yuwankan inicupi kta.

¹¹ Mihunkawanji, otoiyohi akiciiapi śni po. Tuwe hunkawanjitku aie c̣a hunkawanjitku hdaco kinhan, he woope kin aie c̣a woope kin yaco; tuka woope kin daco kinhan, woope kin ecen econpi kin henica śni, tuka wayaco kin henica.

¹² Woope kage cin he Wanjidan, he wanikiye c̣a nakun waihangya okihi. Wicaśta tokeca daco kin niś nituwe he.

¹³ Iho po, nakaha tona hehapi; Dehan, qa iś heyakecinhan, otonwe kin kae ekta unyanpi qa waniyetu wanji en unyakonpi kta, wopeuntonpi qa wiyopeunyanpi qa taku unkamnanpi kta ce.

¹⁴ Tuka heyakecinhan taku u kte cin sdonyayapi śni; yanipi kin he taku he, opo wan cistiyedan tanin qa hehan atanin śni kin he heca.

¹⁵ Kaken ehapi kta iyececa; Itancan kin iyowinunkiyapi qa unnipi kinhan, decen qa iś kaken econkupi kta ce.

¹⁶ Tuka nakaha waḣannic̣idapi kin on iduśkinpi; hecen wiyuśkinpi kin owasin śica.

¹⁷ Heon etanhan, tuwe taku waśte econ kta sdonkiya tuka econ śni eca, he woaḣtani ic̣icaga ece.