Jakob 3 - Dakota Wowapi Wakan Kin

¹ Mihunkawanji, wicota waonspekiya unpi śni po; woyaco iyotan tanka unkicupi kta e sdonyayapi.

² Owasin taku ota on waunḣtanipi ece. Tuwe oie on waḣtani śni kinhan, he wicaśta yuśtanpi qa tancan ocowasin hdaśke kta okihi.

³ Wanyaka po, śuktanka anaungoptanpi kta e heon iikiyuwi i kin en iyewicunkiciyapi; qa tancanpi ocowasin wicunyuhomnipi ece.

⁴ Wita wata kin hena nakun wanyaka po, tankinkinyan qa tate ohitika on kaha iyeyapi eśta, iyupse yuza cistinna on token itancan kin cin eca, yuhomnipi ece.

⁵ He iyecen wicaceji kin taku cistinna, tuka tanka ic̣ida ece. Iho, peta cistinna keś can tanka ideya ece.

⁶ Wicaceji kin he peta, qa woaḣtani iyatahdepi; hecen wicaceji unhuhapi kin ehna un, wicatancan kin ocowasin aśamya, qa wicoicage ohomniyan aideye c̣a, iś eya wakanśica ti kin etanhan ideic̣iya.

⁷ Woteca ocaje owasin, qa taku kinyan unpi, taku sdohan unpi qa miniwanca mahen unpi kin, henakiya etanhan wicaśta wanunyanpi wicakage c̣a wicayuha:

⁸ Tuka wicaceji kin he tuwedan yuwaḣbaka okihi śni; he wośice wicaśta śni, pejihuta śica on wicaṭa ece kin he ojudan.

⁹ He on Wakantanka Ateyapi kin unyawaśtepi; qa he on wicaśta akantu, Wakantanka ouncage iyecen kagapi kin hena wicunyaśicapi ece.

¹⁰ Wicai wanjidan etanhan wayawaśtepi qa wayaśicapi kin hinanpa ece. Mihunkawanji, hena hecetu śni.

¹¹ Miniyowe wan oenape wanjidan etanhan, mini waśte qa nakun mini pa ḣinca hiyuya he.

¹² Mihunkawanji, suken can wan Oliwe waskuyeca aicaga, qa iś hastanyanka iyuwi wan suken waskuyeca okihi he; he iyecen miniyowe wan mini waśte qa nakun mini pa ḣinca hiyuye śni ece.

¹³ Enitanhanpi tuwe wicaśta ksape c̣a wiyukcan un he; woksape wowaḣbadan on tanyan aihduhe cin eciyatanhan iye oḣan waśte hdutanin kte.

¹⁴ Tuka winawizipi pa ḣinca, qa wakinicapi nicantepi kin en duhapi kinhan, ihnuhan widuśkinpi qa wowicake kin on iyatonpi śni kin.

¹⁵ Wicoksape kin he wankantanhan u śni; tuka maka kin etanhan, wicaceḣpi etanhan, qa wakanśica iyececa.

¹⁶ Tukten winawizipi qa wakinicapi yuke cinhan, wicotoketu tanin śni qa wicoḣan śica owasin hen un ece.

¹⁷ Tuka woksape wankantanhan un kin he tokaheya ecedan, hehan wokiyapi kaga, waḣbadan, waanagoptan, wowaonśida qa waskuyeca waśte on ojudan, owotanna wiyukcan qa owotanna wohdaka ece.

¹⁸ Unkan tona wookiye kagapi kin hena woowotanna waskuyeca kin wookiye en owicakicijupi ece.