Jakob 2 - Dakota Wowapi Wakan Kin

¹ Mihunkawanji, Jesus Messiya, wowitan Itancan wacinyanpi kin, on wicaśta iwandakapi kte cin he yuhapi śni po.

² Nitomniciyepi kin en, wicaśta wan mazaskazi napcupe yuhe c̣a wokoyake waśte kic̣un kin en hi kinhan; qa nakun wicaśta waḣpanica wan heyake śica un kin en hi kinhan;

³ Qa tuwe wokoyake waśte kic̣un kin he tanyan ayatonwanpi, qa heyakiyapi, Oiyotanke waśte kin de en hiyotanka wo; qa wicaśta waḣpanica qon, Hen najin wo, qa iś, siha wahde kin ihukuya hiyotanka wo, eyakiyapi kinhan;

⁴ Otoiyohi tanyan canteyeciyuzapi śni, qa wicotawacin śica eciyatanhan widukcanpi śni he.

⁵ Naḣon po, mihunkawanji waśte; Wakantanka maka akan waḣpanicapi kin hena wicakaḣniga he, wacinyanpi on wijicapi, qa tona iye waśtedakapi wokiconze iwahowicaye ciqon he tawayapi kte cin.

⁶ Tuka niye waḣpanicapi kin waḣtewicayadapi śni. Wijicapi kin hena iyotanhan iyeniciyapi śni, qa woyaco oiyotanke kin en aniyanpi śni he.

⁷ Wicacaje waśte on cajeniyatapi ece kin he yaśicapi śni he.

⁸ Wowapi kin eciyatanhan, woope iyotan waśte, Nikiyedan un kin niye inihdacin waśteyadake kta ce, eyapi kin he ecen ecanonpi kinhan, tanyan ecanonpi kta.

⁹ Tuka wicaśta token ihduze cin ekta eyatonwanpi kinhan, woaḣtani ecanonpi, qa woope kin on śicaya econ oniyakapi ece.

¹⁰ Tuwe woahope owasin yuha eśta, wanjidan kicakse cinhan, he ocowasin on yacopi.

¹¹ Tuwe, Wawiciḣaḣapi ecanon kte śni ce, eye ciqon he iś nakun, Wamayanon kte śni ce, eya. Unkan wawiciḣaḣapi takudan ecanon śni eśta, wamayanon kinhan, wanna woope kin kiyecaksa.

¹² Tona woope on tawaic̣iyapi kin on wicayacopi kte cin hena iyecen iapi, qa econ po.

¹³ Tuwe waonśida śni kin he wowaonśida wanin woyaco ecedan qupi kta; qa wowaonśida woyaco kin kapeya iyuśkin ece.

¹⁴ Mihunkawanji, tuwe wacinyan keya eśta, iyecen wicoḣan yuhe śni kinhan, he taku iyokihi kta he. Wacinyan un kin he niyan okihi he.

¹⁵ Nihunkawanji qa nitawinoḣtin tancokapidan, qa anpetu iyohi woyute nicapi kinhan;

¹⁶ Qa wanji hewicayakiyapi, Wookiye on hdapo, cosic̣iyapi qa wipiic̣iya po; tuka taku wicatancan icakije cin hena wicayaqupi śni ehantanhan, taku iwaśtepi kta he.

¹⁷ He iyecen wacinyanpi kin, wicoḣan codan kinhan, he wanna ṭa, iśnana un kin heon.

¹⁸ Han, tuwe heye kta; Niye wacinyan yaun, qa miye wicoḣan mduha; hecen wacinyaye cin he nioḣan codan makipazo wo, kinhan mioḣan kin on wacinwaye cin he cicipazo kta ce.

¹⁹ Taku Wakan kin wanjidan he wicayada; he tanyan ecanon; taku wakan śicapi kin iś eya wicadapi qa cancanpi ece.

²⁰ Tuka, wicaśta wacinton śni kin, wacinyanpi wicoḣan codan kin he ṭa e sdonyaye kta he.

²¹ Abraham ateunyanpi kin he, cinhintku Isaak wahna wośnapi akan wahduśna qon he ehan, wicoḣan on yaowotanpi śni he.

²² Qa iye oḣan kin kici wacinye cin token oḣanye c̣a, wicoḣan on wacinye ciqon he yuśtanpi e wandaka he.

²³ Unkan hecen wowapi kin, Abraham Wakantanka wicada, unkan he woowotanna kiciyawapi, qa he Wakantanka takicuwa eciyapi ce, eyapi qon he yuecetupi.

²⁴ Heon, wacinyanpi ecedan on etanhan śni, tuka wicoḣan kin on wicaśta owotanna yawapi ece he wandakapi.

²⁵ Nakun Rahab witkowinna kin ohnihde unpi qon hena iyowinwicakiye c̣a canku tokeca ohna hde wicaśi qehan, iś eya wicoḣan on owotanna yawapi śni he.

²⁶ Wicatancan kin woniya codan un kin he ṭa ece, he iyecen wacinyanpi kin wicoḣan codan kinhan, he nakun ṭa ece.