I. Timotheos 6 - Dakota Wowapi Wakan Kin

¹ Wowidake un kin tona can napinpi kin ihukuya yukanpi kin hena itancan wicayawapi kin wicakinihanpi owasin okihi wicahdawapi kta, hecen Wakantanka caje qa tawoonspe kin ośtehdapi kte śni.

² Qa tona itancan wacinyan unpi kin heca ihukuya unpi kinhan, hena śicewicakidapi kte śni, om hunkawanjinkiciyapi kin heon; tuka hena wacinyan unpi, qa waśtewicadakapi, qa taku waśte kin en owicakicipapi kin heon sanpa owicakiyapi kta. Hena hecen onspewicakiye c̣a wahokonwicakiya wo.

³ Tuwe wicoie waśte, Jesus Messiya Itancan unkiyapi oie kin, wicoḣan ecedan kin eciyatanhan un kin hena wicada śni kinhan, qa togye waonspewicakiye cinhan,

⁴ He waḣanic̣ida, qa takudan sdonye śni un, tuka wakinicapi wiwangapi wicoie kin en cante kin ocowasin iyeic̣iya; hena etanhan winawizipi, wakinicapi, waośtehdapi, woawacin śica ko icaga.

⁵ Qa wicaśta tawacin śicapi kin ośkiśkeya hdokinicapi, wowicake yuhapi śni, qa taku kamnanpi kinhan, he Wakantanka ohndapi kin ee kecinpi. Tona hececapi kin hena awicayuśtan wo.

⁶ Wakantanka ohodapi kin woiyokipi kici he woyuha tanka.

⁷ Maka kin de en takudan unkahipi śni, qa awicakehan hetanhan takudan unkahdapi kte śni.

⁸ Hecen woyute, wokoyake ko unhapi kinhan, hena iyounkipipi kte.

⁹ Tona watonpika cinpi kinhan, hena taku wawiyutanyan un, qa mazaḣtakiyapi en iyoḣpayapi, qa witkotkoya cantiheyapi śica ota on kiumyanpi ece kin hena en, hena e waihangyapi, wicotakuni śni ko mahen wicaśta kin ocowasin iyoḣpewicayapi ece.

¹⁰ Taku śica owasin hutkan kin he mazaska waśtedakapi kin hee; he wanjikji inaḣnipi, qa on wacinyanpi kin etanhan iyaye yapi, qa wicokakije ota on caic̣ipapi.

¹¹ Tuka Wakantanka wicaśta tawa kin he niye, hena taku kin nakicipa wo; wicoowotanna, Wakan tanka ohodapi, wacinyanpi, wacautkiyapi, wacintankapi qa wowaḣbadan, hena akita wo.

¹² Wowacinye okicize waśte kin he en econ wo, owihanke wanin wiconi kin he icu wo, he en nicopi qa waayataninpi ota itokam wohdakapi waśte ecen oyahdake ciqon.

¹³ Wakantanka taku owasin nikiye cin he itokam, qa Jesus Messiya Pontios Pilate itokam owotanna wohdake ciqon he on ceciciya ce;

¹⁴ Aśape śni qa iyaonpepica śni, woahope kin de duhe kta, Jesus Messiya Itancan unkiyapi taninyan u kte cin hehanyan.

¹⁵ He tohan iyehantu kinhan, tuwe yawaśtepi, qa ecedan Wawokihi kin he taninyan hiyuye kta, wicaśtayatapi kin en Wicaśtayatapi, qa itancanpi kin en Itancan kin hee.

¹⁶ He isnana wiconi hduhe c̣a, iyoyanpa en hiyohipica śni kin he en ounyan, wicaśta kin tuwedan he wanyake śni, qa nakun wanyaka okihi kte śni; he wowitan, qa wowaśake owihanke wanin kiciun nunwe.

¹⁷ Tona maka kin den watonpike cin wahokonwicakiya wo, watankaic̣idapi kte śni, qa woyuha atakuni śni aya ece kin wacinyanpi kte śni, tuka Wakantanka ni un taku iyounkipipi kta e iyakic̣uya unqupi kin hee;

¹⁸ Taku waśte ece econpi kta, wicoḣan waśte ijicapi kta, wapamnipi, qa wawicaqupi ṭawatenyapi kta;

¹⁹ Taku tokata ihe cin he ekta ahehde waśte wan ic̣ihnakapi kta, hecen wiconi owihanke wanica yuhapi kta.

²⁰ Timotheos, taku yuheciciye cin hena tanyan yuha wo, qa ikcekceya ecinśniyan wakinicapi kin he nakicipa wo, wosdonye woitonśni akinicapi kin he nakun.

²¹ Wanjikji he en opapi, qa wacinyanpi kin icunonpa iyayapi. Wowaonśida niciun nunwe. Amen.