I. Timotheos 5 - Dakota Wowapi Wakan Kin

¹ Hunkayapi wan iyopeye śni wo, tuka ateyapi un kin iyecen wahokonkiya wo, qa tona hakaktapi kin hena nihunkawanji iyececapi kta;

² Winoḣinca tankapi kin hena iś inawicayaye cin iyecen, qa tona aśkatudan unpi kin hena tawinoḣtinwicayaye cin iyececapi kta, woyuecedan owasin en.

³ Wiwazicapi kin, tona awicakehan wiwazicapi un kin hena wicayuonihan wo.

⁴ Tuka wiwazica wan cinca wicaye cin, qa takojakpaku yuke cinhan, hena tokaheya wicowazi tawapi kin en wowaśte econ onspeic̣iciyapi kta, qa hunkake wicayapi kin iyunwin wicakicupi kta; taku waśte qa Wakantanka itokam oiyokipi kin hee.

⁵ Tuwe awicakehan wiwazica un kin he iśnana eḣpeyapi un, Wakantanka wacinye c̣a ohinniyan, hanyetu anpetu ko, wocekiye eyapi, qa hoyekiyapi kin en un.

⁶ Tuka tuwe iyokipi ic̣iya un kinhan, he ni un icunhan wanna ṭa.

⁷ Hena hecen iwahokonwicakiya wo, hecen iyaonpepioa śni unpi kta.

⁸ Qa tuwe tona wicayuhe cin, qa iyotan tiyohnaka tawa kin, taku wicakicamna śni kinhan, he wacinyanpi kin wanna ayuśtan, qa waawacin śni kin sam iyeya wicaśta śica.

⁹ Wiwazica waniyetu wikcemna śakpe ihukuya un kin he kaḣnigapi kte śni. He wicaśta wanjidan hihnaye ciqon,

¹⁰ Wicoḣan waśte on tanyan oyakapi, cinca icaḣwicakiya, oicimani kin wonwicaya, tona owotanna un siha wicakiyujaja, tona kakijapi kin owicakiya, qa wicoḣan waśte owasin amniheic̣iya en opa hecinhan.

¹¹ Tuka wiwazica tona aśkatudan wotapi kin hena wicakaḣnige śni wo; tohan Measiya en śkehanhan aye cinhan ake hihna tonpi kta;

¹² Qa tokaheya wacinyanpi qon he ayuśtanpi kin heon woyaco aihduhapi kta.

¹³ Qa nakun kujapi, qa ti iyaza yakonpi; qa kujapi hecedan śni, nakun taku oyakapi sa, qa waaiapi sa, taku eyapi kte śni kin hena eyapi ece.

¹⁴ Heon, tona nahaḣin wikoskapi kin hena hihna tonpi kta, einca tonpi kta, qa tiyohnaka hduhapi kta wacin, hecen toka kin taku iyawicaonpe kta okihi śni kagapi kta.

¹⁵ Wanna wanjikji icunonpa Satan ihakam iyayapi.

¹⁶ Wicaśta wanji, qa iś winoḣinca wanji wacinyan un kin, he wiwazica hduhe cinhan okiye kta; hecen okodakiciye kin tkeya qinpi kte śni, qa tona awicakehan wiwazica unpi kin hena ece owicakiyapi kta.

¹⁷ Waawanhdake un kin, tona tanyan awanhdakapi kinhan, hena wowitan icitakihna wicakiciyawapi kta, tona wicoie, waonspekiyapi ko, en ḣtanipi kin hena iyotan.

¹⁸ Wowapi wakan kin hecen eya, Tatanka aguyapi napan kin he iohmus sutaya iyacu kte śni. Qa ake, Tuwe ḣtani kin he taku on opetonpi qon iyohi ece.

¹⁹ Waayatanin nonpa, qa yamni duhe śni kinhan, hunka yapi un kin wanji en wiyaonpapi aupi kin anagoptan śni wo.

²⁰ Tona waḣtanipi kinhan hena owasin wicitokam taninyan iyopewicaya wo, hecen unmapi kin kokipapi kta.

²¹ Wakantanka itokam, qa Jesus Messiya Itancan kin, maḣpiya ohnihde wicakaḣnigapi kin hena ko wicitokam wahokonciciya, dena taku kin ecinśniyan wiyukcanpi wanin ecanon kta, qa wicaśta iwanyakapi kte cin on etanhan takudan ecanon kte śni.

²² Oḣankoya tuwedan nape aputake śni wo; qa wicaśta tokeca waḣtanipi kin en ope śni wo. Ecedan ihduha wo.

²³ Tokata mini ecedan yatke śni wo, nitezi kin on, qa waniyazan sa kin heon, miniśa waniqadan yatkan wo.

²⁴ Wicaśta wanjikji waḣtanipi kin taninyan han, qa itokam woyaco ekta awicaya; qa hunḣ wicihakam tanin ece.

²⁵ Qa he iyecen wicoḣan waśte wanjikśi taninyan un, qa tona hecece śni eśta anaḣbepica śni.