I. Timotheos 4 - Dakota Wowapi Wakan Kin

¹ Woniya kin atayedan heya, Anpetu ihankeya kin en, wanjikśi wacinyanpi kin ayuśtanpi kta, qa woniya śapa wahnaye sa, qa taku wakan śica tawoonspe ko anagoptanpi kta.

² Wicahnayanpi on itonśni iapi kta, nagipi kin maza kata on guguyapi kin heon.

³ Winoḣinca wicayuzapi kin he teḣindapi, qa woynte, tona wowieake wicadapi, qa sdonyapi kin hena wopida eya icupi kta e Wakantanka kaga, hee yute śni wicaśipi kta.

⁴ Taku Wakantanka kage cin he owasin waśte, qa wopida yuha icupi kinhan, takudan oḣinyanpi kte śni.

⁵ He Wakantanka oie, wocekiye ko on yuwakanpi.

⁶ Hena taku kin hunkawanjinkiciyapi kin kiksuyewicayaye cinhan, Jesus Messiya taokiye waśte yaun kta, wacinyanpi, wicoie, qa woonspe waśte ekta iyohiyaye cin hena en tanyan icaḣniyanpi kta.

⁷ Tuka iapi śice cin, wakanka hitunkakanpi yuhapi ko nakicipe c̣a, Wakantanka awacinpi kin he amniheic̣iya wo.

⁸ Wicatancan yeic̣iyapi kin he taku cistinna okihi; tuka Wakantanka awacinpi kin he taku owasin okihi, wiconi kin de, qa wanji u kte cin iwahoyapi kin en un.

⁹ Wicoie kin he wowicake, qa owancaya anagoptanpi kta iyececa;

¹⁰ Wakantanka ni un wicaśta owasin Wanikiya tawapi, qa iyotan tona wicadapi kin hena, he wacinunyanpi kin heon ḣtaunnipi, qa ośtehdapi unyakonpi.

¹¹ Hena taku kin iwahokonwicakiye c̣a onspewicakiya wo.

¹² Koniśka yaun kin heon tuwedan iwaḣtenida kte śni; tuka tona wicadapi kin hena waonspewicakiya wo, wicoie kin en, wicoḣan kin en, wacantkiyapi kin en, woksape kin en, wacinyanpi kin en, woyuecedan kin en.

¹³ Wowapi yawapi, qa wahokonwicakiyapi, waonspewicakiyapi ko, hena econ wo, en wai śni kin hehanyan.

¹⁴ Taku wawokihi en niun kin, wokcanpi, qa waawanhdake unpi, nape aniputakapi kin on nic̣upi qon he akiktonje śni wo.

¹⁵ Hena taku kin awacin, qa ocowasin en yeiciya wo, hecen onspenic̣iciye cin owasin sdonyapi kta.

¹⁶ Atayedan awaic̣icin, qa woonspe nitawa kin awakicin wo, he hduha wo. Hecanon kinhan ninic̣iye c̣a, tona naniḣonpi kin hena nakun niwicayaye kta.