I. Timotheos 3 - Dakota Wowapi Wakan Kin

¹ Iapi kin he wowicake; tuwe waawanhdake unpi cin kinhan he wicoḣan waśte wan cin.

² Tuka waawanhdake cin he iyaonpepica śni un kta, winoḣinea wanjidan yuze kta, waktaya un kta, wacinksapa, waḣbayedan, oḣanpi, wowicakiyaka;

³ Miniśa en iyeiciye śni, waawicape śni, mazaska nina akite śni; tuka wacintanka, wacinko śni, waicucu wacin śni;

⁴ Iye tiyohnaka kin tanyan hduhe kta, qa wicowaḣbadan owasin on cinca kin anagoptan wicakiye kta.

⁵ Tuwe tiyohnaka tawa kin tanyan hduha okihi śni kinhan, ecin token Wakantanka taokodakiciye kin tanyan yuhe kta he.

⁶ Aśkatudan en opapi kin hecece kte śni, he heca kinhan, okinni waḣanic̣ida kin on Wakanśica tawoyaco kin ekta iyaye kta.

⁷ Qa tona itankan yakonpi kin hena tanyan oyakapi un kta, he hecetu śni kinhan, wowiḣaḣnya un kta, qa Wakanśica wihmunke tawa kin en iyoḣpaye kta.

⁸ Iś eya hunkayapi un kin hena nakun wacinksapapi kta, ceji jatapi śni, miniśa en iyeiciyapi śni, qa mazaska nina akitapi kte śni:

⁹ Wicanagi ecedan ohna wowacinye wowiyukcan kin yuhapi kta.

¹⁰ Hena e tokaheya wicayukcanpi kta, qa hehan takudan iyaonpepica śni kinhan, hunkayapi un kin en iyeyapi kta.

¹¹ Nakun iś tawicupi kin waḣbapidan kta, waaie śni unpi kta, waktaya unpi kta, taku owasin on owotanpidan.

¹² Hunkayapi un kin iś tawicu wanjidan kta, cinca wicayapi qa tiyohnaka tawapi kin tanyan hduhapi kta.

¹³ Tona hunkayapi un wicoḣan kin tanyan yuḣapi kin hena wowitan waśte hdamnanpi, qa Jesus Messiya wacinyanpi kin en waditaka ic̣icagapi.

¹⁴ Dena hecen wowapi cicaga, kohanna niye en ciu kta wacin.

¹⁵ Tuka tehan wai śni kinhan, deciya tanhan on token Wakantanka ti kin ohna opiniciye kta sdonyaye kta, he okodakiciye Wakantanka ni un tawa kin ee, wowieake ihupa qa taku ahe cin hee.

¹⁶ Unkan he taku aiepica śni, Wakantanka awacinpi kin he wowiyukcan tanka; Wakan tanka wicaceḣpi en ihdutanin qon, Woniya kin on yaowotanna kagapi, maḣpiya ohnihde kin wanyakapi, Ikcewicaśta kin ekta oyakapi, wicoicage kin en wicadapi, qa wowitan kin ekta wankan ehdakupi.