I. Timotheos 2 - Dakota Wowapi Wakan Kin

¹ Heon, taku owasin itokam, wicaśta kin owasin on, wokidapi, wocekiye, waiciyapi wicoie, wopida ko eyapi kta wacin.

² Wicaśtayatapi kin hena on, qa tona itancan unpi kin owasin on, hecen woohodapi owasin qa wicoḣan owotanna kin en, owanjidan unkanpi qa wikope śni unnipi kta.

³ He waśte, qa Wakantanka Wanikiya unkitawapi kin itokam woiyokipi kin hee.

⁴ He iye wicaśta owaain nipi, qa wowicake sdonyapi kin en hipi kte cin he cin.

⁵ Taku Wakan wanjidan, qa Taku Wakan qa wicaśta kiei wiciyotahedan un kin wanjidan, Jesus Messiya wicaśta kin hee.

⁶ He iye atayedan owasin opewicakiton kta e ic̣ic̣u, anpetu tawa kin waayatanin kte cin heon.

⁷ He en eyanpaha qa yeśipi kin heca makagapi; Messiya en wowicake epa, itonśni mawanica; wowacinye wowicake ko Ikcewicaśta onspe wicawakiye kte cin heon.

⁸ Heon, wicaśta kin owancaya, wocanniye, waakinicapi ko wanin nape aśape śni kiyugan cekiyapi kta wacin.

⁹ Qa winoḣinca kin iś eya iyecen wokoyake oiyokipi kin kic̣unpi kta, qa tawacin waśte, wacin tankapi koya; qa paha sonpi, mazaskazi, inyan okitanin kin, qa wokoyake taku ota iyopeyapi kin hena ko unpi kte śni;

¹⁰ Tuka wicoḣan waśte kin hena, taku winoḣinca tona Wakantanka awacinpi kin iyokipipi kin hee.

¹¹ Qa winoḣinca kin inina un, qa taku owasin en wanaḣon yanke c̣a on onspeic̣iciye kta.

¹² Tuka winoḣinca kin iś waonspekiye c̣a wicaśta kin iwankam un kta e iyowinwakiye śni, ho inina yanke kta.

¹³ Adam he tokaheya kagapi, qa hehan Ewe.

¹⁴ Qa Adam hnayanpi śai, tuka winoḣinca kin iye hnayanpi, qa hecen woaḣtani hiyahdeya.

¹⁵ Tuka iś eya cinca tonpi kin en niyanpi kta, wacinyanpi, wacantkiyapi, wicoḣan waśte qa wacintankapi kin hduha yukanpi kinhan.