I. Korinth 9 - Dakota Wowapi Wakan Kin

¹ Yewicaśipi kin hemaca śni he; tawa mic̣iye śni he; Jesus Messiya Itancan unkiyapi he wanmdake śni he; Itancan kin en mioḣan kin he niyepi śni he.

² Wicaśta tokeca ekta yewicaśipi kin hemaca śni eśta, niyepi kin ekta hemaca. Yewicaśipi kin en opeya waun kin ipuspe kin he niyepi, Itancan kin en.

³ Tona wimawangapi kin hena kaken awicamdupta ece:

⁴ Unkiye wauntapi qa waunyatkanpi unkokihipi śni he.

⁵ Yewicaśipi kin tokeca, qa Itancan hunkawanjinwicaye cin, qa Inyan iyececa, unkiye tankśiwicunyanpi wanji hdus unkayapi unkokihipi śni he.

⁶ Qa iś, miś miye Barnabas kiciśnana, wicoḣan ayuśtan owakihi śni he.

⁷ Tohantu kaśta tuwe iyunwin codan zuya iyaya he; tuwe hastanhanka iyuwi kin huhde qa etanhan waskuyeca yute śni he; qa tuwe taḣinca optaye wan hduhe c̣a optaye kin etanhan asanpi yute śni he.

⁸ Wicaśta akantu eciyatanhan hena hecen epa he; qa woope kin he hena hecen eye śni he.

⁹ Moses toope kin en kaken kagapi, Tatanka aguyapi napan kin he iohmus icu yaye kte śni ce. Wakantanka tatanka ihawicakta he;

¹⁰ Qa iś unkiyepi kin on hena hecen eya he. Unkiyepi kin on he wowapi en kagapi; hecen tuwe maḣyumdu kinhan woape en maḣyumdu kta, qa tuwe woape yuha aguyapi kapan kinhan he kici woape en okicipe kta.

¹¹ Unkiye ninagipi kin on taku unkonicijupi hecinhan, taku wicaceḣpi kin nitawapi kin he mnaunyanpi kte cin he taku tanka he.

¹² Wicaśta tokeca niyepi ekta wookihi kin de en okicipapi kinhan, unkiye unkiyotanpi śni he. Tuka wookihi kin he unkunpi śni; taku owasin unkapaspapi, Messiya tawootanin waśte kin anaunptapi kte śni kin heon.

¹³ Tona tipi wakan kin en kicanyanpi kin hena tipi wakan kin etanhan nipi ece sdonyayapi śni he; qa tona wahna wośnapi kin ekta oḣanyanpi kin hena wośnapi kin etanhan wotapi ece.

¹⁴ Hecen nakun Itancan kin woope kaga; tona wotanin waśte oyakapi kin hena wotanin waśte kin on nipi kta.

¹⁵ Tuka hena taku kin takudan iwacu śni, qa hecen ecamiconpi kte cin heon hena hecen wowapi wakage śni; miye maṭe kte cin hee waśte, qa tuwe imawinkta kin de ecetu śni miciciye kte cin he śica.

¹⁶ Wotanin waśte kin omdaka keś, he wowinkta wahdawa śni; wnecon makiyapi, qa wotanin waśte omdake śni ehantanhan wokakije micihan.

¹⁷ Qa he iyokipiya ecamon kinhan on iyunwin mduhe kta, tuka iyomakipi śni esta taku econmakiyapi wan maqupi.

¹⁸ Hecen taku mduhe kta he. Wotanin waśte omdake cinhan, Messiya tawootanin waśte kin iyunwin codan ewahde, qa hecen wotanin waśte kin en wowakihi kin tanyan mduhe kta.

¹⁹ Wicasśta owasin ekta wowidake śni waun tuka owasin wowidake mayuhe wicawakiya, wanjikśi okihiwicawaye kte cin heon hecamon.

²⁰ Juda oyate kin wieehna, Juda wicaśta kin hemaca, Juda oyate kin owicawakihi kte cin heon. Tona woope kin ihukuya un kin hena ekta woope yuha unpi kin hemaca, tona woope yuhapi kin hena owicawakihi kta.

²¹ Qa tona woope nicapi kin hena ekta woope codan unpi kin hemaca; —Wakantanka ekta woope codan waun śni tuka Messiya on woope yuha waun; tona woope nicapi kin hena owicawakihi kta.

²² Torik waśake śni kin hena en waśake śni se emaceca, tona waśake śni kin hena owicawakihi kta. Wicaśta owasin en taku owasin un kin hemaceca, wanjikji ni wicawaye kte cin heon.

²³ Wotanin waśte kin he on hecamon ece; hecen he en miś eya owape kta.

²⁴ He de sdonyayapi śni he; Tona oinyanke kin en inyankapi kin hena owasin inyankapi, tuka wicaśta wanjidan oqipe kin yekiya ece: Niś yeyakiyapi kta e iyecen inyanka po.

²⁵ Tuwe kaśta kici econ kte cinhan taku owasin iyatahde ic̣iye śni un. Hena wateśdake atakuni kte śni kin yekiyapi kta, tuka unkiye wateśdake ohinniyan un kte cin he unkakitapi.

²⁶ Heon etanhan miś hecen waimnanka, toketu tanin śni kin he iyecece śni; hecen nape on econ waun, tuwe okaduza ape cin iyecece śni;

²⁷ Tuka mitancan kin suta mic̣icage c̣a ṭinsmic̣iya; okinni wicaśta tokeca wotanin waśte kin owicawakiyaka eśta, miye qe ḣeyata iyemayanpi kte cin he kowakipa.