I. Korinth 8 - Dakota Wowapi Wakan Kin

¹ Unkan taku wakagapi wakiyuśnapi kin icaḣtake, owasin wookaḣnige unhapi sdonunkiyapi. Wookaḣnige kin he tankaic̣idapi kaga, tuka wacantkiyapi kin he tanka icaḣya.

² Tuwe taku sdonya kecin kinhan he nahaḣin sdonye kte cin iyecen takudan sdonye śni.

³ Tuka tuwe Wakantanka waśte dake cinhan Wakantanka he iye sdonya.

⁴ Taku Wakagapi wakiyuśnapi kin yutapi kin he icaḣtake, wakagapi maka akan un kin he taku śni sdonunyanpi, qa Taku Wakan wanjidan, hecedan yukan.

⁵ Taku wakan eciyapi kin maḣpiya ekta qa maka akan yukan eśta; taku wakan ota, qa itancan kiyapi kin nakun ota keyapi ece:

⁶ Tuka unkiye, Taku Wakan wanjidan Ateyapi kin hee unhapi, he etanhan taku owasin u, qa he en unkiye unyakonpi; qa Jesus Messiya Itancan kin wanjidan, he on taku owasin un qa he eciyatanhan unkiyepi.

⁷ Tuka owasin hecen okaḣnigapi śni. Wanjikji anpetu dehanyan wakagapi sdonyapi, taku wakagapi wakiyuśnapi kin iyacinyan yutapi ece; hecen nagi suta śni kin hena aśamyapi.

⁸ Taku untapi kin eciyatanhan Wakantanka iyokipi unyanpi śni; wauntapi kinhan heon etanhan sanpa unwaśtepi śni, qa wauntapi śni kinhan heon sanpa unśicapi śni.

⁹ Tuka ihnuhan wawoyakihipi kin de tona waśake śni un kin hena en wonahnaye kte cin.

¹⁰ Niye osdonya yaun kin, wakagapi tipi kin en wota idotanke cin tuwe wanniyake cinhan, wicaśta nagi waśake śni un kin he taku wakagapi wakiyuśnapi kin yuta onspeyakiye kte śni he.

¹¹ Hecen nihunkawanji waśake śni un kin, on Messiya ṭe cin he ihangyapi kta, niye wasdonyaye cin heon etanhan.

¹² Tuka hunkawanjin kiciyapi kin en hecen wayaḣtanpi, qa iye nagipi kin waśake śni kin nagiyeyayapi eca, Messiya en wayaḣtanipi ece.

¹³ Heon etanhan woyute kin mihunkawanji waḣtaniye cinhan, ohinniyan tado wate śni waun kta, okinni mihunkawanji waḣtaniwaye kta.