I. Korinth 7 - Dakota Wowapi Wakan Kin

¹ Wowapi en miyecagapi kin he icaḣtagya, wicaśta kin winoḣinca yutan śni kin he waśte.

² Tuka wiinaḣmanpi kte śni e heon etanhan wicaśta otoiyohi winoḣinca tawa hduhe kta, qa winoḣinca kin iś otoiyohi wicaśta hduha nunwe.

³ Unkan wicaśta kin iye tawicu kin wowaśte ecakicon kta, qa winoḣinca kin iś iye hihnaku kin nakun ecen ecakicon nunwe.

⁴ Winoḣinca kin iś iye tancan kin hduhe śni, tuka hihnaku kin he yuha, qa nakun wicaśta kin iś iye tancan kin hduhe śni, tuka tawicu kin he yuha.

⁵ Otoiyohi tancan eḣpekiciyapi śni po, ptecedan hehanyan, napin wicayadapi kinhan heceedan, takudan yute śni qa wocekiye eyapi kin en ocowasin yenic̣iyapi kte cin heon, kinhan ake napin yahdapi kta, unmana kinhan oic̣ihipi śni kin on Satan iyutanniyanpi kta naceca.

⁶ Hena hecon ciśipi kin e on hepe śni, tuka wahokonciciyapi kin heon.

⁷ Wicaśta owasin miye waun kin iyecen unpi kta wacin, tuka otoiyohi Wakantanka etanhan wicowaśake hduha un, wanji decetu, qa wanji iś kaketu.

⁸ Tuka tona tanśna un qa tona wiwazicapi kin hena, miye waun kin iyecen unpi kte cin he waśte kta, kewicawakiya.

⁹ Tuka oic̣ihipi śni kinhan kiciyuzapi kta; wakan kiciyuzapi kin ne waśte qa wacin itkon kin he śica.

¹⁰ Unkan tona kiciyuzapi kin hena kaken wahokonwicawakiya, qa he miye cinka epe śni, Itancan kin he heya; Winoḣinca iye hihnaku kin ahduśtan kte śni.

¹¹ Tuka ahduśtan kinhan tanśna un kta, qa iś ake hihnaku qon okiciye kta; qa wicaśta kin iye tawicu kin ihnuhan eḣpekiye cinhȧn.

¹² Unkan ehake, Itancan kin hee śni, miye cinka hecen epe kta; Hunkawanjin kiciyapi wan winoḣinca wicada śni kin heca uhe c̣a, he kici un iyokipi kinan, he ihnuhan eḣpekiye cinhan.

¹³ Qa winoḣinca wan wicaśta wicada śni kin heca yuhe c̣a, he kici un iyokipi kinhan, he iś nakun eḣpekiye kte śni.

¹⁴ Wicaśta wicada śni kin he iye tawicu kin on yuwakanpi, qa winoḣinca wicada śni un kin he nakun iye hihnaku on yuwakan kagapi. Hecece śni unkanś nieincapi kin aśapapi kta, tuka nakaha hena e wakan.

¹⁵ Tuka wicada śni un kin he unma kpagan kinhan hecen kpagan kta. Hena hecece cin en hunkawanjin kiciyapi, qa tawinoḣtin kiciyapi kin idakapi śni. Wakantanka wookiyo en unkicopi.

¹⁶ Winoḣinca, niś taku sdonyaya he, okinni nihihna niyakiye kta. Qa wicaśta kin, niś token sdonyakiya he, okinni nitawin niyakiye kta.

¹⁷ Tuka otoiyohi token Wakantanka wicaqu qa Itancan kin otoiyohi wicakico kin he iyecen mani nunwe. Hecen okodakiciye owasin en econ wicawaśi ece.

¹⁸ Tuwe bakiḣdayapi ecen kicopi hecinhan, bakiḣdayapi śni kin akite kte śni. Qa tuwe bakiḣdayapi śni ecen kicopi hecinhan, he bakiḣdaye kte śni.

¹⁹ Bakiḣdayapi kin he taku śni, qa bakiḣdayapi śni kin he nakun taku śni, tuka Wakantanka tawoahope opapi kin he tanka.

²⁰ Otoiyohi wicoḣtani en kicopi kin he en un kta.

²¹ Wowidake un kin henica ecen nicopi kinhan he ekta ewacin śni wo; tuka tawa nic̣iye kta e oyakihi kinhan he en oyaḣan de kta.

²² Tuwe wowidake un kin he Itancan kico kinhan, hee Itancan kin on tawa ic̣iya; qa nakun tuwe tawa ic̣iye cin hecen kicopi kinhan he Messiya wowidake tawa kin hee.

²³ Teḣiya openitonpi, heon wicaśta akantu wowidag niyanpi śni nunwe.

²⁴ Mihunkawanji, otoiyohi taku en un hecen kicopi kin he en Wakantanka kici un nunwe.

²⁵ Unkan hokśiwinpidan icaḣtagya, Itancan kin eciyatanhan woope tukudan mduhe śni. Tuka miye owotanna waun kta Itancan kin ionśimakida, hecen token wacin mduze cin owahdake kta.

²⁶ Nakaha wicokakije kin on etanhan de waśte kepce, wicaśta kin ecen un kte cin he waśte.

²⁷ Winoḣinca en iyanihdaśka he; etanhan nihdu̇śke kta akite śni wo. Qa winoḣinca en iyanihdaśke śni he; winoḣinca wan akite śni wo.

²⁸ Tuka winoḣinca duza eśta wayaḣtani śni, qa hokśiwinna wan hihnaton eśta waḣtani śni; tuka hena e wicaceḣpi ekta wicokakije yuhapi kta; hececa eśta ito itoncipapi.

²⁹ Tuka mihunkawanji kaken epe kta; Wanna tokata ptenyedan; tona winoḣinca yuhapi kin hena winoḣinca tonpi śni kin iyecen unpi kte.

³⁰ Tona ceyapi kin hena ceyapi śni kin iyececapi kte; tona iyuśkinpi kin hena iyuśkinpi śni kin iyececapi kta; qa tona wopetonpi taku yuhapi śni kin iyececapi kta.

³¹ Qa tona maka kin de wowinyunyanpi kin śicaya yuhapi kin iyececapi kte śni; wicoicage kin de ouncage kin atakuni śni nya.

³² Tuka takudan icante śice śni yaunpi kta wacin. Tuwe tawicu ton śni kin he Itancan taku tawa kin awacin yanka, token Itancan iyokipi ye kta.

³³ Tuka tuwe tawicu ton kin he wicoicage kin en taku awacin yanka, token tawicu kin iyokipi ye kta.

³⁴ Qa nakun winoḣinca hihna ton qa witanśna un kin hena kici akidecece śni. Hihna ton śni kin he Itancan taku tawa kin awacin yanka, tancan nagi ko wakan un kta heon. Tuka hihna ton kin he wicoicage en taku un kin awacin yanka, token hihnaku kin iyokipi ye kta.

³⁵ Tanyan yaunpi kta heon hena hepa. Taku on hmankapi kin nitokam ewahnake kta e hee śni; tuka wacinktonja wanin, qa wiciyokipi kin en Itancan kin oyapapi kta e heon.

³⁶ Tuka tuwe iye cunwintku tanśna un kin tanyan ecakicon śni kecin, qa wanna wikośka hecinhan, qa he iyecetu kinhan, token cin kinhan ecen econ eśta, waḣtani kte śni; wakan kiciyuzapi kte.

³⁷ Tuka tuwe iye cante kin en sutaya un qa tokan tanhan hecon kiynpi śni, qa iye tawacin kin oic̣ihi, qa cunwintku tanśna un hduhe kta e cante mahen ic̣iconze cinhan he tanyan econ.

³⁸ Hecen tuwe kiciyuzapi kin en wicaqu kinhan he tanyan econ, qa tuwe kiciyuzapi kin en wicaqu śni kin he sanpa tanyan econ ece.

³⁹ Winoḣinca kin tohanyan hihnaku ni un kin hetianyan wicoope kin on kaśkapi; tuka hihnaku kin ṭe cinhan hehan tawaic̣iya, tuwe tokeca cin kinhan he hihnaye kta okihi, Itancan kin en un kin hecedan.

⁴⁰ Tuka ecen yanke cinhan he iyotan waśteya un kta imdukcan, qa Wakantanka Taniya kin he mduha kepce.