I. Korinth 6 - Dakota Wowapi Wakan Kin

¹ Wicaśta wan taku icanśin niyanpi kinhan token ecin owotanna oḣanye śni unpi kin en yukcanpi kta e ayaipi he, qa wicaśta wacinyan unpi kin en ayaipi śni.

² Tona wacinyan unpi kin hena wicoicage kin yacopi kta e sdonyayapi śni he. Unkan niyepi wicoicage kin dacopi kta hecinhan, taku iyotan cistinna kin hena iyukcan iyenicecapi śni he.

³ Maḣpiya ohnihde kin hena eepi kaeś wicunyukcanpi kta e sdonyayapi śni he. Hecen wiconi kin de en taku hiyeye cin sam iyeya unkokihipi.

⁴ Heon etanhan wiconi kin de en taku iyukcanpi kte cin duhapi kinhan, tona okodakiciye kin en yuonihanpi śni kin hena iyukcan wicaśi po.

⁵ Iniśtecapi kte cin heon hepa. Niyepi ekta wicaśta ksape c̣a tuwe hunkawanjitkupi kin wiyukcan okihi kte cin wanica he.

⁶ Tuka hunkawanjinkiciyapi kin taku iyakicionpapi ece, qa he nakun wacinyanpi śni kin wicitokam.

⁷ Hecen taku iyayecionpapi kin he śicaya ecanonpi ece. Tokeca e śicaya ecaniconpi kin ayatpaspapi śni he. Tokeca taku nicipi kinhan wacin tanka yec̣unpi śni he.

⁸ Tuka niye śicaya ecanonpi, qa wawicayakipi ece, qa he nihunkawanjipi kin.

⁹ Tona owotanna śni un kin hena Wakantanka tokiconze kin tawapi kte śni e sdonyayapi śni he. Ic̣ihnayanpi śni po: wiinaḣmanpi, qa wakagapi ohodapi sa, qa wawiciḣaḣapi econpi sa, qa winyan ic̣idapi kin, qa iwicahu sa.

¹⁰ Qa wamanonpi sa, qa waicucukte cin, qa witkopi sa, qa wawicakipi sa, henakiya Wakantanka tokiconze kin tawapi kte śni.

¹¹ Qa niś niyepi kin hunḣ henicecapi tuka, tuka niyujajapi; tuka niyuwakanpi; tuka niyuowotanpidan, Jesus Itancan kin cajeyan qa Wakantanka unkitawapi Taniya kin on.

¹² Taku owasin ecamon kta e iyowinmakiyapi, tuka taku owasin ecamon kta iyecece śni; taku owasin ecamon kta e iyowinmakiyapi, tuka takudan imadake kte śni wacin.

¹³ Woyute kin he wicatezi kin kicagapi, qa wicatezi kin iś woyute kicagapi, tuka henioza Wakantanka ihang ye kta. Unkan wicatancan kin he wiinaḣmanpi on kagapi śni, tuka he Itancan kin kicagapi, qa Itancan kin he iś wicatancan kin tawa kta.

¹⁴ Unkan Wakantanka wanna Itancan kin najin kiye c̣a, nakun iye towaśake kin on najin unkiyapi kta.

¹⁵ Nitancanpi kin hena Messiya huha kin ee sdonyayapi śni he. Hecen Messiya huha kin iwacu, qa witkowinna wan huha wakiye kta he. Hiya, hecetu śni.

¹⁶ Tuwe witkowinna wan en kici iyaihdaśke cin he kici tancan wanjidan, sdonyayapi śni he. Henioza ceḣpi wanjidan kta ce, eye ciqon.

¹⁷ Tuka tuwe Itancan kin en kici iyaihdaśke cinhan he iye kici woniya wanjidan.

¹⁸ Wiinaḣmanpi kin nakicipa po. Woaḣtani wicaśta econ kin owasin wicatancan kin itankan un, tuka tuwe wiinaḣman kinhan he iye tancan kin en waic̣iḣtani.

¹⁹ Tokeca, nitancanpi kin hena Woniya Wakan Wakantanka nic̣upi, qa niyepi en un kin he tipi tawa kin hee, qa hecen tawa nihdawapi śni e sdonyayapi śni he.

²⁰ Taku tanka iyopeniyanpi, heon nitancanpi ninagipi ko on Wakantanka yatan po, hena Wakantanka tawa.