I. Korinth 5 - Dakota Wowapi Wakan Kin

¹ Niyepi ekta wawiciḣaḣapi yukan keyapi; qa wawiciḣaḣapi kin he iyececa Ikcewicaśta kin ekta cajeyatapi śni, wanji iye atkuku tawicu kin yuze kte cin.

² Unkan niye waḣannic̣idapi; on iyoniciśicapi kta tuka; hecen tuwe hecon kin niyepi etanhan iyaye yapi kta.

³ Miye mitancan on ekta opeya ciunpi śni, tuka micante on en waun seca, heon en waun kin iyecen wanna mduśtan; tuwe hecon kin,

⁴ Mniniciyapi qa mitoksape duhapi kinhan, Jesus Messiya Itancan unkiyapi caje kin on, qa Jesus Messiya Itancan unkiyapi towaśake kin yuha,

⁵ Wicaśta kin he Satan yaqupi kta, ceḣpi yutakuni kte śni, hecen Jesus Itancan kin taanpetu kin en nagi kin ni kta.

⁶ Iniwinktapi kin he waśte śni. Taku on napoḣyapi kin waniqadan aguyapi ocowasin napoḣya ece e sdonyayapi śni he.

⁷ On napoḣyapi tannike cin eḣpeya po; hecen aguyapi teca qa napoḣye śni yaunpi kta. Messiya wohduze unkitawapi kin he iye kaeś unkiyepi on wośnapi.

⁸ Heon etanhan wohduze kin en unkopapi kta, on napoḣyapi wanakaja qa wocanniye wicośice ko on napoḣyapi kin he unhapi kte śni, tuka wicoowotanna wowicake ko on napoḣyapi kin hee unkunpi kta.

⁹ Wowapi en kaken cicagapi; Wiinaḣmanpi kin om mayanipi kte śni.

¹⁰ Tuka wicoicage kin de en wiinaḣmanpi, qa tona waicucupi kte cin, qa wawicaki sa, qa tona wakagapi ohodapi kin hena e wicawake śni; unkanś wicoicage kin de etanhan tankan dapi kta tuka.

¹¹ Tuka nakaha kaken wowapi cicagapi, tuwe hunkawanjin kiciyapi eciyapi kin he wiinaḣman, qa waicucukte cin, qa wakagapi ohoda, qa waaie sa, qa witko sa, qa wawicaki sa heca kinhan, kici yaunpi kte śni, ihnuhan kici wayatapi kinhan.

¹² Tona tankan unpi kin hena token ecin wicamdaco kta he; tona timahen un kin hena wicadacopi śni he.

¹³ Tuka tona tankan un kin hena Wakantanka wicayaco ece. Hecen wawiciḣaḣapi econ qon he niyepi kin etanhan tankan iyeya po.